Gisagara: Impinduka ku mibereho y’imiryango 120 yatujwe mu mudugudu w’icyitegererezo ivanwe muri nyakatsi (Amafoto)

Yanditswe na Prudence Kwizera
Kuya 4 Nyakanga 2020 saa 01:22
Yasuwe :
0 0

Imiryango 120 yo mu Murenge wa Mamba mu Karere ka Gisagara yahoze iba mu nzu za nyakatsi n’indi yari ituye mu manegeka, yarahavanwe ijya gutuzwa mu mudugudu w’icyitegererezo wa Mamba (IDP Model Village) yubakiwe na Leta y’u Rwanda.

Batujwe mu nzu nziza zubatse mu Mudugudu wa Ruhuha mu Kagari ka Gakoma, bose hamwe ni abantu 659. Ni inzu zibereye ijisho ku muntu uzirebera ahirengeye, zubakishije amatafari ahiye, zikingishijwe inzugi nziza n’amadirishya y’ibirahure kandi buri rugo rwahawe ikigega gifata amazi

Abagize iyo miryango bavuga ko imibereho yabo yahindutse kuko buri wese yahawe inzu nziza yo kubamo irimo ibikoresho byose nkenerwa birimo intebe, ibitanda, ibiryamirwa, amazi meza n’amashanyarazi.

Umubyeyi witwa Mukantabana Béata asobanura ko mbere yabaga mu nzu ya nyakatsi nta cyizere cy’ubuzima bwiza afite ariko kuri ubu yumva anezerewe.

Ati “Nabaga mu nzu ya nyakatsi mvirwa narihebye ariko Perezida wacu yaduhaye inzu nziza. Ubu njyewe numva nezerewe kandi ubuzima bwaragarutse; bampaye inka ku buryo amata nyabona. Kuba narabonye ahantu heza ho kuba ni ibyishimo kandi mpora nshimira Imana n’ubuyobozi bwacu bwiza.”

Buri muryango watujwe muri uwo mudugudu bawuhaye inzu ifite ibyumba bitatu n’uruganiriro, icyumba cy’ububiko, aho gukarabira n’ubwiherero.

Karamage Frederic avuga ko mbere akiba muri nyakatsi we n’abane be bakundaga kurwaragurika.

Ati “Mbere twari tubayeho nabi cyane, utwana twanjye twahoraga turwaragurika indwara nka malariya n’izindi ariko ubu nta mwana wanjye ukirwara.”

Abatuye mu Mudugudu ntangarugero wa Mamba bahuriza ku gushimira Perezida wa Repubulika, Kagame Paul, wabatekerejeho abakura muri nyakatsi no mu manegeka abubakira inzu nziza zibereye Abanyarwanda.

Umuyobozi w’uwo Mudugudu, Bimenyimana Népomuscène, yabwiye IGIHE ko bakimara kugera mu mudugudu mwiza bafashijwe gukorera hamwe mu matsinda yo kwizigama kandi bashakiwe n’aho bazajya bagemura amata.

Ati “Baranywa amata andi bakayashora ku ikusanyirizo i Mamba andi bakayashora ku bigo by’Abasirikari no kwa muganga, bafite isoko. Bari mu bimina byo kwizigama ku buryo buri wese yizigama buri cyumweru kandi akaba yakwaka inguzanyo agakora igikorwa kimuteza imbere.”

Benshi muri bo bahinga amasambu yabo aherereye aho bari batuye mbere naho abadafite aho guhinga hahagije bahawe umusozi wo guhinga uri ahitwa muri Byugi, bahingira hamwe byakwera bakagabana.

Abatujwe muri uwo mudugudu barimo ababarizwaga mu cyiciro cya mbere n’icya kabiri by’ubudehe; abaganiriye na IGIHE bavuga ko biteguye kubivamo bakajya mu byiciro by’abishoboye kuko imibereho yabo yahindutse.

Umuyobozi w’Akarere ka Gisagara, Rutaburingoga Jérôme, avuga ko impinduka nziza zigaragara mu mibereho y’abo baturage ari kimwe mu bikorwa byo kwishimira muri iyi myaka 26 ishize u Rwanda rwibohoye. Yasabye abaturage gukomeza gukora cyane baharanira kwiteza imbere.

Ati “Gutera imbere ni urugendo, abari imbere nibo dukurikira kandi tukabafatiraho urugero kuko baba batwereka ko bishoboka. Gutera imbere bizashoboka mu gihe dufite imyumvire myiza twitabira gahunda za Leta kandi dufite umutekano, tukirinda n’ibisindisha.”

Inzu 120 zo mu Mudugudu w’icyitegererezo wa Mamba zuzuye zitwaye amafaranga 1,203,000,000 Frw.

Abatujwe mu Mudugudu wa Ruhuha bahawe n'inka za kijyambere zo korora
Abatujwe muri uyu mudugudu bose hamwe ni abantu 659 barimo abahoze baba muri nyakatsi n'abari batuye muri ntuye nabi
Abatuye mu Mudugudu ntangarugero wa Mamba bahuriza ku gushimira Perezida wa Repubulika Kagame Paul wabatekerejeho abakura muri nyakatsi no mu manegeka abubakira inzu nziza zibereye Abanyarwanda
Bahawe inka nziza zitanga umukamo
Buri muryango wahawe inzu ifite n'ikigega gifata amazi
Buri muryango watujwe muri uwo mudugudu bawuhaye inzu ifite ibyumba bitatu n’uruganiriro, icyumba cy’ububiko, aho gukarabira n’ubwiherero
Buri wese yahawe inzu nziza yo kubamo irimo ibikoresho byose nkenerwa birimo intebe, ibitanda, ibiryamirwa, amazi meza n’amashanyarazi
Imiryango 120 yo mu Murenge wa Mamba mu nzu nziza zubatse mu Mudugudu wa Ruhuha mu Kagari ka Gakoma
Inka bahawe zorowe mu buryo bwa kijyambere kandi zitabwaho kugira ngo zitange umusaruro
Ni inzu zibereye ijisho ku muntu uzirebera ahirengeye, zubakishije amatafari ahiye, zikingishijwe inzugi nziza n’amadirishya y’ibirahure
Umuyobozi w’Akarere ka Gisagara, Rutaburingoga Jérôme, yabasabye kugira imyitwarire myiza no kwirinda ibisindisha kugira ngo bagire imibereho myiza n'iterambere birambye
Umuyobozi w’Akarere ka Gisagara, Rutaburingoga Jérôme, avuga ko impinduka nziza zigaragara mu mibereho yabo baturage ari kimwe mu bikorwa byo kwishimira muri iyi myaka 26 ishize u Rwanda rwibohoye
Uyu mudugudu ufite amashanyarazi yo ku muhanda awucanira ndetse na buri rugo rufite amashanyarazi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .