Gisagara: Habarurwa imiryango irenga 480 ihora mu makimbirane atera ingaruka zirimo no kwiyahura

Yanditswe na Prudence Kwizera
Kuya 26 Gashyantare 2020 saa 01:58
Yasuwe :
0 0

Mu Karere ka Gisagara habarurwa imiryango 489 ihora mu makimbirane atera ingaruka zitandukanye zirimo kwiyahura, kwahukana k’umwe mu bashakanye no gutuma abana bahunga imiryango yabo bakajya mu buzererezi.

Ni ikibazo inzego zitandukanye zo muri ako karere zivuga ko zahagurukiye kuko kirimo guteza ibibazo bitandukanye bibangamiye imiryango.

Umukozi ushinzwe uburinganire n’iterambere ry’umuryango mu Karere ka Gisagara, Sewabo Vincent, avuga ko mu bana bahunga imiryango yabo harimo n’abangavu bajya gucumbika no gushakisha akazi bikabaviramo guterwa inda.

Ati “Ikibazo cy’amakimbirane mu miryango kiri mu bya mbere bituma abana bashobora gusambanywa cyangwa se bagatwara inda z’imburagihe kuko baba bari guhunga ibibazo biri mu miryango. Mu mwaka wa 2019-2020 twabaruye imiryango 487 ihora mu makimbirane.”

Imibare yerekana ko mu Karere ka Gisagara abangavu bari munsi y’imyaka 20 y’amavuko batewe inda imburagihe mu 2019 barenga 400. Abamaze kubarurwa bazitewe muri Mutarama 2020 bagera kuri barindwi bari munsi y’imyaka 18 y’amavuko.

Sewabo avuga ko iyo miryango bayiganiriza bifashishije Inama y’Igihugu y’Abagore n’urubyiruko rw’abakorerabushake kandi bamaze kuganiriza imiryango myinshi kuko hasigaye igera ku 177 bazaganiriza mu mezi agera kuri ane ari imbere.

Avuga ko iyo umwaka urangiye bongera gukora ibarura bakareba imiryango ikiri mu makimbirane bakongeraho n’indi mishya yavutse akaba ari yo bashyiraho imbaraga.

Imizi y’amakimbirane

Umukozi ushinzwe uburinganire n’iterambere ry’umuryango mu Karere ka Gisagara, Sewabo Vincent, avuga ko iyo bagiye kuganiriza imiryango iri mu makimbirane ahanini basanga ashingiye ku businzi n’imitungo.

Ati “Usanga ahanini ashingiye ku businzi no ku mitungo kuko usanga hari imiryango myinshi itarasezeranye igapfa imitungo kuko usanga babana nta cyizere bafitanye.”

Yatanze urugero mu Murenge wa Ndora aho baherutse gusezeranya mu kivunge imiryango igera kuri 60 yabanaga itarasezeranye.

Mu bundi buryo bakoresha harimo kuganiriza abana kugira ngo niba mu miryango yabo harimo amakimbirane babivuge; guhugura inama y’igihugu y’abana n’iy’abagore ndetse bagakorana n’inzego za Polisi na RIB kugira ngo bahuze imbaraga mu gukemura ibyo bibazo.

Sewabo avuga ko ibyo bakora biri gutanga umusaruro kuko inzoga z’inkorano zitemewe zimaze gucika ku buryo bugaragara kandi hari n’imiryango yamaze kugaragara ko yaretse amakimbirane.

Bamwe mu baturage bagaragaza ko amakimbirane mu miryango atuma hari bamwe biyahura cyangwa umwe akica undi.

Batanga urugero rw’umugabo wo mu Murenge wa Mugombwa watawe muri yombi mu Mpera z’umwaka ushize akurikiranyweho icyaha cyo kwica umugore amukubise umutwe ku nzu kubera amakimbirane ashingiye ku gucana inyuma bari bafitanye.

Kuri uyu wa Gatatu nabwo mu Murenge wa Kibiri basanze umusore w’imyaka 21 amanitse mu giti yapfuye bakeka ko yiyahuye ariko haracyakorwa iperereza ngo hamenyekane niba bitatewe n’amakimbirane yo mu ngo.

Abavuye mu makimbirane bicuza igihe bataye

Dusengimana Jean Baptiste wo mu Murenge wa Save avuga ko yamaze igihe kirekire atoteza umugore we Hategekimana Liberatha bigatuma badakora ngo biteze imbere babashe no kurera abana babiri bafitanye.

Avuga ko amakimbirane ahanini yashingira ku kutizerana kuko babanaga batarasezeranye.

Ati “Twahoranaga induru n’amakimbirane ku buryo byari bigeze aho ntaha abana bagahunga ngo ntabahitana. Ntabwo najyaga inama n’umugore kandi imirimo yose narayimuhariraga ngo ayikore yabyanga nkamukubita.”

Nyuma yo kugirwa inama uyu muryango warasezeranye wiyemeza kubana mu buryo bwemewe n’amategeko ureka n’amakimbrane.

Dusengimana ati “Kugira ngo mpinduke byatewe n’inyigisho abayobozi baduheraga mu nama, nageze aho njya no mu matsinda hamwe no mu mugoroba w’ababyeyi baranyigisha mfata umwanzuro wo guhinduka kuko nabonaga urugo rwanjye rugiye kuzasenyuka burundu. Ubu rwose nicuza igihe nataye ndi mu makimbirane.”

Umugore we Hategekimana Liberatha na we avuga ko kuri ubu basigaye babana neza bagafatanya byose bakajya inama ku cyo bagomba gukora.

Hategekimana Liberatha yagize ati “Ubu dusigaye dufatanya mu bintu byose. Mbere ntabwo twumvikanaga kuko nta nubwo twari twarasezeranye; nakoraga akazi kose njyenyine kuko yabaga yagiye.”

Imiryango igaragaramo amakimbirane usanga ahanini ari yo iba mu bukene bukabije, abana bayo batiga ndetse ititabira ngo gutanga umusanzu w’ubwisungane mu kwivuza.

Bamwe mu baturage bo mu Karere ka Gisagara

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza