Gisagara: Abarimu babiri baguwe gitumo bafite abakobwa mu macumbi barimo utaruzuza imyaka y’ubukure

Yanditswe na Prudence Kwizera
Kuya 23 Nzeri 2019 saa 04:07
Yasuwe :
0 0

Abarimu babiri bo mu Karere ka Gisagara batawe muri yombi bakekwaho icyaha cyo gusambanya abakobwa babiri bataye ishuri, bakaba babafatanywe mu macumbi harimo utaruzuza imyaka y’ubukure.

Byabaye ku mugoroba wo kuri iki cyumweru tariki ya 22 Nzeri 2019 mu Murenge wa Gikonko.

Abafashwe ni umwarimu witwa Bimenyimana Emmanuel w’imyaka 32 y’amavuko wigisha ku Kigo cy’imyuga cya Gikonko ari kumwe mu cyumba n’umukobwa w’imyaka 17.

Undi ni Muhawenimana Joseph w’ imyaka 28 yigisha ku ishuri ribanza rya Gikonko yasaganywe mu cyumba n’umukobwa uvuga ko afite imyaka 19.

Abo bakobwa bombi bataye ishuri kuko nta n’umwe warangije kwiga amashuri yisumbuye. Bose bavuka mu Mudugudu wa Karukamba mu kagari ka Gasagara mu murenge wa Gikonko.

Umuvugizi wa Polisi mu Ntara y’Amajyepfo, CIP Twajamahoro Sylvestre, yabwiye IGIHE ko babaguye gitumo nyuma yo guhabwa amakuru n’ababyeyi babo n’abaturanyi.

Ati “Ababyeyi b’abo bana n’abaturanyi ni bo batanze amakuru kuri Polisi ijyayo isanga bari mu macumbi yabo.”

CIP Twajamahoro avuga ko bahawe amakuru ko abo bana bari basanzwe bajya gusura abo barimu bakabasambanya kandi uriya w’imyaka 17 yari ahamaze iminsi ibiri.

Abo bakobwa bahise bajyanywa ku Bitaro bya Gakoma gusuzumwa naho abarimu bafungiye kuri Sitasiyo ya RIB ya Gikonko.

CIP Twajamahoro yasabye ababyeyi gukomeza kwita ku bana babo no kubaha uburere; abangavu abasaba kwirinda ibishuko by’ababashora mu busambanyi.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza