00:00:00 IGIHE NETWORK KN KINYARWANDA EN ENGLISH FR FRANCAIS

Gisagara: Abagabo batangiye kugana inzu z’ubujyanama kubera guhohoterwa n’abagore babo

Yanditswe na Prudence Kwizera
Kuya 8 August 2022 saa 07:30
Yasuwe :

Hagamijwe guhangana n’ihohoterwa rikorerwa mu ngo n’irishingiye ku gitsina, mu Karere ka Gisagara hashyizweho inzu z’ubujyanama zizwi nka ‘Safe House’ kugira ngo abahuye n’ibyo bibazo bajye bazifashirizwamo.

Kugeza ubu izo nzu zimaze kuba ebyiri, imwe iri mu Murenge wa Muganza indi iri mu wa Gishubi. Zombi zubatswe zigenewe kwakira abakobwa n’abagore bahohotewe ariko n’abagabo batangiye kuzigana.

Zakirirwamo abakobwa basambanyijwe ndetse n’abagore bahohotewe.

Ni inzu zibamo ibyumba n’ibikoresho bitandukanye birimo ibitanda, ibikoresho by’isuku ku buryo uwazigannye afashwa akaba yanaharara ndetse bakamushakira n’ibyo kurya no kunywa.

Safe House yo mu Murenge wa Gishumbi imaze kuganwa n’abantu 124 barimo abagore 38, abakobwa 81 n’abagabo batanu.

Mukandutiye Concillia ushinzwe iyo nzu yabwiye IGIHE ko abantu bakira baba bafite ibibazo bitandukanye kandi bikomeye.

Ati “Abagore twakira baba bahuye n’ihohoterwa ryo gukubitwa. Iyo umugore yakubitswe n’umugabo we ahita atugana tukamwereka igitanda akaba aryamye akaruhuka tukamuganiriza agutuza. Hari n’abo ducumbikira kugeza igihe ikibazo gikemukiye.”

Safe House yo mu Murenge wa Muganza imaze kuganwa n’abantu 80 barimo abagore 63, abangavu 13 n’abagabo bane.

Mukandutiye yavuze ko mu bagabo batanu bakiriye barimo babiri bakubitswe n’abagore babo, babiri baciwe inyuma n’abagore babo n’undi umwe wakubiswe n’umuturanyi.

Ati “Muri abo banu harimo babiri batwariye abagore, hari n’umwe wagize ikibazo arwana n’umuturanyi we aramukomeretsa naho undi yarwanye n’umugore aramukomeretsa, dufite n’undi watugannye umugore yamukubise.”

Mukamusoni Regine ushinzwe Safe House yo mu Murenge wa Muganza, yavuze ko mu bantu 80 yakiriye bahohotewe harimo abagabo bane.

Ati “Mu bagabo bane twakiriye harimo babiri bari bafite abagore b’abasinzi birirwa mu tubari n’abandi babiri bari bafashe abagore babaca inyuma.”

Bitewe n’uko muri izo nzu nta mujyanama wihariye wagenewe gufasha abagabo bahohotewe, iyo bahageze barabaganiriza bakumva ibibazo byabo ubundi bakabajyana mu Midugudu aho baturutse ibibazo byabo bigakemurwa n’inshuti z’umuryango ku bufatanye na komite y’Umudugudu.

Byakunze kuvugwa ko hari abagabo bahohoterwa n’abagore babo bagahitamo kubiceceka kubera ipfunwe ku buryo bigera aho bamwe bafata icyemezo cyo kwiyahura, guta ingo bakajya kwibana cyangwa bagahunga bakajya gupagasa ubutazagaruka.

Hari n’abumvikana bishe abagore babo wakurikirana ugasanga bari bamaze igihe bafitanye amakibirane azwi.

Inzu y'Ubujyanama yo mu Murenge wa Gishubi mu Karere ka Gisagara

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .