00:00:00 IGIHE NETWORK KN KINYARWANDA EN ENGLISH FR FRANCAIS

Gicumbi: Bari mu bwigunge nyuma y’uko ikiraro gihuza Kageyo na Byumba gitwawe n’amazi

Yanditswe na Evence Ngirabatware
Kuya 6 September 2022 saa 04:42
Yasuwe :

Ikiraro gihuza umurenge wa Kageyo n’uwa Byumba mu karere ka Gicumbi, kimaze amezi arenga giciwe n’amazi y’imvura aturuka ahahoze inkambi ya Gihembe, bikaba bibangamiye ubuhahirane n’imigenderanire y’abaturage.

Iki kiraro giherereye mu kagari ka Gihembe, Umudugudu wa Nyirabadugu, abahaturiye basaba ko hakorwa kuko ubu kuhanyura bisaba kumanuka mu kabande, ukanyura mu mirima y’abaturanye mu gihe ku bantu bakuze bitoroha kumanuka ku musozi.

Abafite imizigo bifuza gutwara bemeza ko gucika kw’iki kiraro bimaze kubateza igihombo. Abaturage bibasaba kuzenguruka ahari inkambi banyuze muri kaburimbo bigatwara amafaranga nka 1000Frw ku igare cyangwa moto zibatwaza imizigo, mu gihe mbere byatwaraga nka 400Frw.

Kuba iki kiraro gihuza umurenge wa Kageyo na Byumba cyaratwawe n’amazi, biteye impungenge abaturage kuko mu gihe cy’imvura ntawatekereza kunyura mu nzira banyura birwanaho, bityo bagasaba ubuyobozi ko bwabafasha kuva mu bwigunge.

Abaturage basaba ko iki kiraro cyakorwa vuba kuko n’abanyeshuri bacyifashisha bava banajya kwiga kandi kujya gushaka inzira mu mirima nabyo byashyira ubuzima bwabo mu kaga cyane cyane mu gihe cy’imvura.

Nyirantezimana uri mu kigero cy’imyaka 45, avuga ko ikiraro cyatwawe n’amazi yaturukaga mu kambi ya Gihembe.

Ati “Hano amazi yamanukaga aturuka hejuru mu nkambi ya Gihembe, kubera ko yari menshi, ni yo yatembanye ibiti byari bihubatse ariko hakenewe gukorwa kuko niho bugufi cyane ujya muri Byumba. Kuzenguuka mu isantere ya Kageyo bigusaba gutega, abadafite amafaranga rero birabagora”.

Umuturage wo mu Murenge wa Kageyo, Ngabonziza Epimaque, yabwiye IGIHE ko bibaye ngombwa ko umurwayi ajya kwa muganga ajyanywe n’imbangukiragutabara bitakunda.

Yagize ati ”Nta muntu utabona ko ikibazo cyabaye hano kandi kimaze igihe, uwakenera kujya kwiga, kujya kwa muganga bibaye ngombwa ko batwara umurwayi n’imbangukiragutabara byaduteza ikibazo, kuzengurutsa hepfo mu kabande ntibyakoroha”.

Ubuyobozi bw’ akarere ka Gicumbi buvuga ko hari ibiraro biri gushyirwa ku rutonde rwo gusanwa, kandi ko bifuza ko abaturage bakomeza kugira ubuhahirane mu bice bitandukanye, gusa byose bigakorwa bigendanye n’ubushobozi buba bwabonetse.

Umuyobozi w’ Akarere ka Gicumbi Nzabonimpa Emmanuel avuga ko hakenewe ubufatanye n’ abaturage mu kubaka ibiraro ariko ubuhahirane bugakomeza. Yongeyeho ko akarere kabo ari ak’imisozi miremire bityo hari ahantu henshi hakeneye gukorwa ibiraro ariko bizakorwa ku bufatanye n’abaturage.

Abaturage barasaba ko uyu muhanda washyirwaho ikindi kiraro ukongera gukoreshwa
Amazi y'imvura yagushije ikiraro umuhanda uracika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .