00:00:00 IGIHE NETWORK KN KINYARWANDA EN ENGLISH FR FRANCAIS

Urwibutso Gen Muhoozi afite kuri Gen Fred Rwigema uri mu batangije urugamba rwo kwibohora

Yanditswe na Iradukunda Serge
Kuya 1 Ukwakira 2022 saa 01:56
Yasuwe :

Umugaba w’Ingabo za Uganda zirwanira ku butaka akaba n’umuhungu wa Perezida w’iki gihugu, Lt Gen Muhoozi Kainerugaba yagaragaje ko rumwe mu nzibutso agifite kuri Fred Gisa Rwigema ari iminsi ya nyuma bahuriye Entebbe mbere y’uko afata umwanzuro wo gutangira intambara yo kubohora u Rwanda.

Ku wa 30 Nzeri 2022, Lt Gen Muhoozi Kainerugaba abinyujije kuri Twitter yavuze ko afata Gen Maj Rwigema uri mu batangije intambara yo kubohora u Rwanda nk’intwari ndetse n’umugabo w’icyitegererezo.

Gen Muhoozi yavuze ko bimwe mu bintu yibukira kuri Rwigema wagize uruhare no mu ntambara yo kubohoza Uganda ari iminsi ya nyuma bahuriye muri Perezidansi y’iki gihugu iherereye Entebbe.

Ati “Ndibuka duhurira by’akanya gato muri Perezidansi i Entebbe, mbere y’iminsi mike ngo ujye kubohoza Igihugu cyawe cy’amavuko. Wari intwari idasanzwe, umugabo nyamugabo ndetse n’icyitegererezo. Ruhukira mu mahoro, Afande Fred!.”

Gen Muhoozi yanditse ubu butumwa mu gihe kuri uyu wa 1 Ukwakira, u Rwanda n’Abanyarwanda bizihiza imyaka 28 ishize igihugu cyabo kibohowe, binyuze mu rugamba rwagizwemo uruhare na Maj Gen Fred Gisa Rwigema kuri ubu uri mu ntwari z’u Rwanda.

Mu bihe bitandukanye Muhoozi yagiye akunda kugaragaza Fred Rwigema nk’umuntu w’intwari kandi abona nk’icyitegererezo, urugero ni aho ku wa 17 Kanama yanditse avuga ko “yibona nka murumuna wa Fred Rwigema”, ndetse agakomeza avuga “ari intwari, yabigishije kuba abagabo.”

Bakuze ari inshuti

Mu rugamba rwo kubohora Uganda na nyuma yo kurutsinda, Maj Gen Fred Rwigema ni umwe mu basirikare bakunze kuba hafi ya Yoweri Kaguta Museveni uyobora iki gihugu cyane ko yanigeze kumubera umurinzi, ibi byatumye akura ari hafi y’abasirikare bakuru muri Uganda ndetse aza kuba inshuti ya Rwigema by’umwihariko.

Muri Mata 2022 ubwo Muhoozi yizihizaga isabukuru y’imyaka 48, Perezida Museveni yavuze ko uyu muhungu we yakuze akunda kuba hafi ya Perezida Paul Kagame na Fred Rwigema ubwo bari bakiri mu Gisirikare cya Uganda.

Yakomeje avuga ko nubwo Muhoozi yari umwana wabonaga bafitanye ubucuti bwihariye.

Ubutwari bwa Rwigema kandi bwagarutsweho na Janet Museveni mu gitabo yise ‘My Life’s Story’, aho yavuze ko ari mu basirikare babatabaye ubwo umuryango we wagoterwaga i Kireka.

Amateka agaragaza ko Museveni, umugore we na Muhoozi bafatiwe kuri bariyeri i Kireka ku wa 11 Ukwakira 1980.

Icyo gihe mu nyeshyamba, Museveni yari umuyobozi wa Komisiyo ya gisirikare anashinzwe ububanyi n’amahanga.

Museveni, umugore we n’umuhungu wabo Muhoozi Kainerugaba bategetswe n’abasirikare kwicara hasi.

Icyo gihe murumuna wa Museveni, Sous Lieutenant Caleb Akandwanaho uzwi nka Salim Saleh, Fred Rwigema hamwe n’abasirikare ba hafi ba Museveni bagabye igitero cyabakuye mu menyo ya rubamba.

Fred Gisa Rwigema yavutse ku itariki 10 Mata 1957, avukira ahahoze ari muri perefegitura ya Gitarama mu Majyepfo y’u Rwanda, ubu ni mu Karere ka Kamonyi mu Murenge wa Nyamiyaga.

Mu 1960, we n’ababyeyi be bahungiye muri Uganda bajya mu nkambi ya Nshungerezi, mu karere ka Ankole, nyuma y’ubugizi bwa nabi no kumenesha Abatutsi nk’igice kimwe cy’Abanyarwanda mu cyo ubutegetsi bw’icyo gihe bwise impinduramatwara yo muri 59, yabanzirijwe n’urupfu rw’Umwami Mutara III Rudahigwa n’ihirikwa ry’ingoma ya murumuna we Kigeli V Ndahindurwa.

Fred Gisa Rwigema amaze kurangiza amashuri yisumbuye muri Uganda mu 1976, yagiye muri Tanzania yinjira mu barwanyi bitwaga Front for National Salvation (FRONASA), inyeshyamba zari ziyobowe na Yoweri Museveni.

Mu mpera za 1976, Rwigema yafashe inzira yerekeza muri Mozambique yinjira mu barwanyi ba FRELIMO, inyeshyamba zaharaniraga kuvana Mozambique mu maboko y’abakoloni b’abanya Portugal.

Mu 1979, Rwigema yinjiye mu barwanyi ba Uganda National Liberation Army (UNLA), bafatanya n’ingabo za Tanzania gufata Kampala bahirika ubutegetsi bwa Idi Amin Dada, wahise ahunga igihugu muri Mata 1979.

Rwigema yaje no kwifatanya n’abarwanyi ba Museveni, National Resistance Army (NRA), barwanaga mu buryo bwa kinyeshyamba bitaga Ugandan Bush War, bwari bugamije guhirika ubutegetsi bwa Milton Obote.

Nyuma y’uko igisirikare cya NRA gifashe ubutegetsi muri Uganda mu 1986, Rwigema yagizwe Minisitiri wungirije w’ingabo, akomeza no kugaragara mu bikorwa byo gutsimbura burundu abarwanyi ba Leta yatsinzwe bari bagihanyanyaza mu majyaruguru ya Uganda.

Fred Rwigema ni umwe mu barwanyi 27 bari bayobowe na Yoweri Kaguta Museveni, wagiye mu ishyamba mu 1981 gutangiza urugamba rwo kurwanya Milton Obote, n’ishyaka rye Uganda People’s Congress, bashinjwaga kwiba amatora yo mu 1980 bagatsinda Democratic Party ryari riyobowe na Paul Kawanga Ssemwogerere, na Uganda Patriotic Movement ryari riyobowe na Yoweri Museveni.

Mu 1985, Fred Rwigema yari amaze kuba umwe mu bayobozi bakomeye mu gisirikare, ndetse igihe ingabo za National Resistance Army (NRA) za Museveni, zari zimaze guhirika ubutegetsi Milton Obote, Fred Rwigyema yari umwe muri batatu bahoze ari abayobozi b’inyeshyamba, bashyizwe ku buyobozi bukuru bwa NRA.

Icyo gihe ni bwo Fred Rwigema yambitswe ipeti rya Major General, aryambikirwa rimwe n’umuvandimwe wa Museveni Salim Saleh na Elly Tumwine, mu gihe Museveni we yahawe ipeti rya Lieutenant General.

Tariki ya 1 Ukwakira 1990, Rwigema ni we wari ku ruhembe rw’urugamba rwo kubohora u Rwanda, ayoboye abasirikare b’Inkotanyi bateye binjiriye mu majyaruguru y’u Rwanda, ariko bukeye bwaho nibwo yatabarutse nyuma yo kurasirwa ku rugamba afite imyaka 33.

Umugaba w’Ingabo za Uganda zirwanira ku butaka akaba n’umuhungu wa Perezida w’iki gihugu, Lt Gen Muhoozi Kainerugaba yagaragaje ko rumwe mu nzibutso agifite kuri Fred Gisa Rwigema ari iminsi ya nyuma bahuriye Entebbe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .