00:00:00 IGIHE NETWORK KN KINYARWANDA EN ENGLISH FR FRANCAIS

Gen Marcel Gatsinzi yashyinguwe: Uko umuhango wagenze (AMAFOTO)

Yanditswe na Ferdinand Maniraguha
Kuya 16 Werurwe 2023 saa 11:41
Yasuwe :

Gen (Rtd) Marcel Gatsinzi wabaye Minisitiri w’Ingabo yasezeweho bwa nyuma nyuma y’iminsi icumi yitabye Imana aho yari arwariye mu Bubiligi.

Misa yo kumusabira yabereye muri Paruwasi Regina Pacis i Remera, ahateraniye inshuti, abakoranye na we, ababanye na we n’abandi bo mu muryango we.

Gen (Rtd) Marcel Gatsinzi yashyinguwe mu Irimbi rya Gisirikare rya Kanombe.

KURIKIRA UKO UMUHANGO WAGENZE

Gen Gatsinzi yashimiwe urukundo, umurava no gukunda igihugu byamuranze
RDF yijeje guhora hafi umuryango wa Gen (rtd) Gatsinzi
Gen Nyamvumba akurikiranye umuhango wo gushyingura Gen (rtd) Gatsinzi Marcel
Umuryango wa Gen Gatsinzi washimye uko bahumurijwe muri ibi bihe byo kubura umubyeyi
Gen James Kabarebe yunamiye Gen (rtd) Gatsinzi Marcel
Ingabo z'u Rwanda ziha icyubahiro Gen Gatsinzi witabye Imana
Gen Nyamvumba ni umwe mu bitabiriye umuhango wo gushyingura Gen (rtd) Gatsinzi
Gen (rtd) Gatsinzi yitabye Imana tariki 6 Werurwe 2023
Umuryango wa nyakwigendera wijejwe ubufasha no kuwuhora hafi
Abayobozi bakuru mu ngabo z'u Rwanda bahaye icyubahiro Gen Gatsinzi
Maj Gen Murasira yasomye ubutumwa bwa Perezida Kagame bwihanganisha umuryango wa Gen Gatsinzi
Gen Kabarebe na Maj Gen Murasira bashyira indabyo ku isanduku irimo umubiri wa Gen Gatsinzi
Abasirikare bakuru basezeye kuri mugenzi wabo Gen Gatsinzi witabye Imana
Maj Gen Murasira na Gen Kabarebe baha icyubahiro nyakwigendera Gen Gatsinzi
Umuryango wa Bernard Makuza ubwo washyiraga indabyo ku mva ya Gatsinzi
Umuhungu wa Gen Gatsinzi asezera ku mubyeyi we
Maj Gen Murasira ubwo yashyiraga indabyo ku mva ya Gen Gatsinzi

3:00: Umuhango wo gushyingura Gen (rtd) Gatsinzi urasojwe

Abayobozi mu ngabo bahaye icyubahiro Gen (rtd) Gatsinzi Marcel ubwo umubiri we wururutswaga mu mva
Gen (rtd) Gatsinzi Marcel yaherekejwe mu cyubahiro cyose cya gisirikare
Umuryango wa Gen Gatsinzi wasabwe gukomera muri ibi bihe bitoroshye
Umufasha wa nyakwigendera ashyira indabyo ku isanduku nyuma yo kururutswa mu mva
Umuryango wa Gen Gatsinzi umusezeraho bwa nyuma ku irimbi rya gisirikare rya Kanombe
Ababanye na Gen Gatsinzi n'inshuti z'umuryango we baje kumuherekeza
Gen Kabarebe ubwo yashyiraga indabyo ku isanduku ya Gen Gatsinzi nyuma yo kururutswa mu mva
Ubwo ingabo zarasaga mu kirere mu guha icyubahiro Gen Gatsinzi watabarutse

2:20: Umubiri wa Gen (Rtd) Gatsinzi Marcel umaze kururutswa mu mva

Ubwo umubiri wa Gen Gatsinzi Marcel wagezwaga ku irimbi rya gisirikare rya Kanombe
Uhereye ibumoso: Maj Gen Albert Murasira, Gen James Kabarebe na Gen Nyamvumba Patrick baje guherekeza Gen (Rtd) Gatsinzi Marcel
Muligande Charles ni umwe mu baje guhekereza nyakwigendera
Gen (rtd) Gatsinzi yaherekejwe mu cyubahiro cya gisirikare
Gen (rtd) Gatsinzi yaherekejwe mu cyubahiro cya gisirikare
Ingabo z'u Rwanda zaherekeje Gen Gatsinzi mu cyubahiro
Band ya gisirikare yafashije mu guherekeza Gen Gatsinzi
Gen James Kabarebe ni umwe mu babanya na Gen (rtd) Gatsinzi Marcel waje no kumuherekeza
Gen Nyamvumba Patrick wahoze ari Umugaba Mukuru w'Ingabo z'u Rwanda yaje guhekereza Gen (rtd) Gatsinzi Marcel

Ubutumwa bwa Perezida wa Repubulika Paul Kagame akaba n’umugaba w’Ikirenga w’Ingabo z’u Rwanda

13:40: Ubu butumwa bwatanzwe na Minisitiri w’Ingabo Maj Gen Albert Murasira

Muryango, bavandimwe, nshuti z’umuryango wa Gen Gatsinzi, Muryango mugari,

Twifatanyije namwe kuri uyu munsi w’akababaro duherekeza mu cyubahiro Gen (rtd) Gatsinzi, Iki ni igihe cy’akababaro gakomeye cyane cyane ku muryango, n’igihe cy’akababaro no ku muryango mugari w’ingaboz’u Rwanda no ku gihugu, cyane iyo twibutse ibihe bitandukanye twabanyemo na Gen Gatsinzi, mu mirimo myiza n’ibigwi bye, haba mu rugamba rwo kurinda umutekano n’ubusugire bw’igihugu no kugiteza imbere kugeza agiye mu kiruhuko.

Yakoreye igihugu mu bwitange, atizigama, atanga umusanzu mu bitekerezo n’imbaraga ze kugeza aho agiriye mu kiruhuko cy’izabukuru.

Yakoreye ingabo z’u Rwandana Guverinoma mu nzego zitandukanye. Izi nshingano yazihabwaga kubera ubushobozi n’indangagaciro.

Atabarutse igihugu n’umuryango we twese tukimukeneye. Icyo twazirikana ni ugukomeza umurage mwiza wo gukunda igihugu no kugikorera byaranze Gen Marcel Gatsinzi.

Turizeza umuryango we ko ubuyobozi bw’igihugu binyuze muri RDF, buzakomeza kubaba hafi nkuko amtegeko abiteganya kandi bisanzwe no mu muco wacu.

Nsoje nongera kubashimira kuba mwifatanije n’umuryango ndetse n’ingabo za RDF mu gutabara umuryango no guherekeza mu cyubahiro Gen (rtd) Gatsinzi Marcel.

Mukomere kandi mukomeze kuba hafi umuryango muri ibi bihe bitoroshye.
Imana ihe Gen Gatsinzi kuruhukira mu mahoro

13:35: Abana ba Gen Gatsinzi Larsse na Daniel, bashimiye abaje kubaba hafi, bavuga ko urwibutso basigaranye kuri we, ari ko buri gihe yabigishaga gukunda no gukorera igihugu.

Umuhungu we Daniel yagize ati “Yakomeje kutwigisha kuzakorera igihugu, tugatanga umusanzu. Ndashimira abasirikare bakuru bari hano, turabashimiye tubikuye ku mutima kandi dushimiye Perezida wa Repubulika. Kuba papa atashye turabizi ko dusigaranye umuryango mugari. Tuzagera ikirenge mu cya papa.Turabizeza ko tutazabatenguha kuko na we atigeze abatenguha.”

“Iyo aba ari hano, ijambo yari kuvuga ni ‘Murakoze kandi ndabakunda’. Natwe turabakunda kandi tubikuye ku mutima, Turabashimiye, Turabashimiye, Turabashimiye”.

13:30: Umubiri wa Gen (rtd) Gatsinzi Marcel umaze kugezwa ku irimbi rya gisirikare rya Kanombe, aho wakiriwe mu cyubahiro cya gisirikare.

12:40 Misa yo gusezera kuri Gen Gatsinzi Marcel irahumuje, umuhango wo kumushyingura ugiye gukomereza ku irimbi rya gisirikare rya Kanombe.

Minisitiri w'Ingabo Maj Gen Albert Murasira (ibumoso) aganira na Gen James Kabarebe, umujyanama wa Perezida mu by'umutekano
Byari agahinda mu gusezera kuri Gen Gatsinzi by'umwihariko ku ngabo z'igihugu yakoreye imyaka 45
Umufasha wa Gen Gatsinzi yavuze ko nyakwigendera yagiye yishimye kubera uburyo yitaweho
Umuryango wa Gen Gatsinzi washimye uburyo igihugu cyakomeje kubaba hafi muri ibi bihe by'akababaro
Umufasha wa Gen Gatsinzi yamushimiye kwiyoroshya no gukunda igihugu byamuranze mu buzima bwe

12:10 Umufasha wa Gen Gatsinzi yavuze ko nubwo yitabye Imana, bashima ko mu gihe yari akiriho ‘yabaye umubyeyi, umukristu n’ingabo y’igihugu, yaratabarutse ntiyapfuye […] yakunze igihugu cye, aragikorera.

Yavuze ko mu buzima bwe bwose, nk’abandi bose yahuye n’ibyiza n’ibibi, icyakora byose “yagiye abyakira n’umutima utuje. Harimo no kwiyoroshya, yari azi kwiyoroshya.Yari azi kwiyumananganya akarenzaho, agafata icyemezo.”

Umufasha we yavuze ko ari ‘gake cyane yashyiraga imbere inyungu ze, kenshi yumvaga ashimishijwe n’inyungu rusange aho kwirebaho.’

Yashimiye ubuyobozi bw’igihugu n’inshuti, bababaye hafi mu burwayi bwe haba akiri mu gihugu na nyuma yo kujya mu mahanga.

Ati “Yagiye anezerewe, afite umucyo ku maso”

11:35: Padiri wayoboye igitambo cya Misa yo gusezera kuri Gen Gatsinzi Marcel, yavuze ko mu maso y’Imana buri wese afite agaciro gakomeye, ari nayo mpamvu ibyiza akora mu buzima busanzwe bizazirikanwa ku munsi w’umuzuko.

Yavuze ko nubwo Gen Gatsinzi yitabye Imana, abantu badakwiriye guheranwa n’agahinda kuko bizeye ko umunsi umwe bazongera kumubona, icyo basabwa ari ukurangamira “Yezu wabambwe ku musaraba agatsinda urupfu. Ntimugaheranwe n’ishavu nk’abantu batagira icyo bizeye, abapfuye bizeye ntibazakorwa n’isoni.”

11:20: Hasomwe ivanjili iri mu gitabo cya Matayo 25:31-36.

Hagira hati “Igihe Umwana w’umuntu azaza afite ikuzo ashagawe n’abamarayika bose, azicara ku ntebe ya cyami afite ikuzo rimukwiriye. Abatuye amahanga yose yo ku isi bazakoranyirizwa imbere ye, maze abavangure nk’uko umushumba avangura intama akazitandukanya n’ihene.

Azashyira intama iburyo bwe, naho ihene zijye ibumoso.Noneho Umwami azabwira abari iburyo bwe ati ‘Nimuze abo Data yahaye umugisha, mugabirwe ubwami yabateguriye kuva isi ikiremwa. Igihe nari nshonje mwaramfunguriye, ngize inyota mumpa icyo kunywa, nje ndi umushyitsi murancumbikira. Igihe nari mbuze icyo nambara muranyambika, ndwaye murandwaza, ndi imfungwa muza kunsura.”

11:00: Misa yo kumusabira iratangiye

10:55: Abayobozi bakuru barimo Minisitiri w’Ingabo Maj Gen Albert Murasira, Umujyanama wa Perezida mu by’umutekano, Gen James Kabarebe bitabiriye uyu muhango wo gusezera kuri Gen (Rtd) Marcel Gatsinzi.

Umuhango wo gusezera kuri Gen Gatsinzi wakozwe mu cyubahiro gikwiriye umusirikare mukuru, wafashije igihugu mu buryo butandukanye
Ubwo umubiri wa Gen Gatsinzi wagezwaga kuri Kiliziya ahabereye Misa yo kumusezeraho
Ni umunsi w'agahinda ku muryango wa Gen Gatsinzi
Abavandimwe, inshuti n'umuryango wa Gen Gatsinzi baje kumusezeraho bwa nyuma
Ubwo umubiri wa Gen (Rtd) Gatsinzi wagezwaga muri Kiliziya ya Regina Pacis

Amateka avunaguye ya Gen (Rtd) Marcel Gatsinzi

Gen Marcel Gatsinzi yaboneye izuba ku Muhima mu Karere ka Nyarugenge mu 1948. Amashuri abanza yayize mu Ishuri ribanza rya Saint Famille, akomereza ayisumbuye muri Saint André aho yize Ikilatini na Siyansi. Aha hari mbere yo kwinjira mu gisirikare afite imyaka 20.

Gatsinzi yamaze imyaka ibiri ahugurwa mu Ishuri rikuru rya Gisirikare “Ecole Supérieure d’Officiers Militaires (ESM)”, ahavana ipeti rya Lieutenant mu 1970.

Kubera ubuhanga bwe, yahawe akazi akajya ahugura abandi basirikare ndetse bituma nawe abona amahugurwa menshi yaherewe mu Bubiligi hagati ya 1971-1976 mu Ishuri ryigisha iby’Intambara “Institut Royale Supérieure de Défense” aho yavanye ubumenyi bwo kuyobora ingabo.

Muri Jenoside yakorewe Abatutsi mu 1994, Gatsinzi yari afite ipeti rya Colonel ndetse yari Umuyobozi w’Aba-Ofisiye bato mu Ishuri rya Gisirikare “ESO” (Ecole des Sous-Officiers) ryari muri Komini ya Ngoma, ubu ni mu Karere ka Huye.

Nyuma y’iraswa ry’indege ya Perezida Juvénal Habyarimana ku wa 6 Mata 1994, General Marcel Gatsinzi yahise agirwa Umugaba Mukuru w’Ingabo z’Igihugu kuko Gen Maj Deogratias Nsabimana wari uwuriho yari yapfanye na Habyarimana.

Uyu mwanya yawumazeho iminsi 10 mbere yo kwirukanwa n’ubutegetsi bw’inzibacyuho bwariho, asimburwa na Col Augustin Bizimungu.

Ingabo za FPR Inkotanyi zafashe Kigali, Gatsinzi wari ufite ipeti rya Brigadier General ari mu Nkambi ya Kigeme, hamwe n’abandi basirikare. Aha yahavuye agana muri Repubulika Iharanira Demokarasi ya Congo anyuze i Rusizi.

Gatsinzi yabaye muri RDC mu gihe cy’ukwezi mbere yo gutaha, akinjira mu Ngabo za RPF. Akigeramo yahawe ipeti rya Colonel.

Inshingano za mbere yahawe muri RDF [ingabo za RPF zimaze guhuzwa n’izahoze muri FAR] zari izo kuba Umugaba wungirije w’Ingabo zirwanira ku Butaka, ndetse yayoboye Urwego rw’Igihugu rushinzwe Umutekano n’Iperereza, NISS. Iki gihe yari afite ipeti rya General Major.

Mu 2004 ni bwo Gatsinzi yagizwe General, aba umusirikare wa mbere wabonye iri peti.

Yabaye Minisitiri w’Ingabo guhera 2002 kugeza 2010. Nyuma y’imyaka irindwi n’amezi atandatu muri iyi minisiteri, yagizwe Minisitiri w’Impunzi n’Ibiza hagati ya 2010 na 2013.

Mu Ukwakira 2013 ni bwo Gen Gatsinzi Marcel yagiye mu kiruhuko cy’izabukuru. Icyo gihe yari kumwe n’abajenerali batanu.

Gen Gatsinzi Marcel wari uhagarariye abagiye mu zabukuru, yavuze ko nubwo basezerewe mu gisirikare bazakomeza gutanga imbaraga zabo mu kubaka umuryango Nyarwanda.

Amafoto: Ntare Julius, Ganza Kelly


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .