00:00:00 IGIHE NETWORK KN KINYARWANDA EN ENGLISH FR FRANCAIS

Gen Kabarebe yahishuye uko basuzugurwaga na FAR kuko batize nta na ‘permis’ bagira

Yanditswe na Iradukunda Serge
Kuya 5 Ukuboza 2022 saa 02:29
Yasuwe :

Umujyanama wa Perezida wa Repubulika mu by’Umutekano, Gen James Kabarebe, yahishuye ko mu biganiro bigamije kuvanga ingabo, FPR- Inkotanyi yagiye igirana n’Ingabo za Leta ya Habyarimana Juvenal, zasuzuguraga abasirikare bahoze ari aba RPA zivuga ko batize kandi bakaba nibura nta n’uruhushya rwo gutwara imodoka bagira ngo nibura bazabe abashoferi.

Gen Kabarebe yagarutse kuri aka gasuzuguro ka EX-FAR, tariki 4 Ukuboza 2022, ubwo yaganirizaga ba rwiyemezamirimo b’urubyiruko bari mu mahugurwa muri IPRC Musanze.

Ni ikiganiro cyibanze ku ndangagaciro zaranze FPR-Inkotanyi kuva yavuka kugeza aho iri uyu munsi.

Gen Kabarebe yasabye urubyiruko kugira intego mu byo rukora byose kandi rugaharanira kuzigeraho kandi rutisuzuguye mu bijyanye n’ubushobozi rufite.

Yakomeje avuga ko ubuyobozi u Rwanda rufite uyu munsi ruha amahirwe urubyiruko ndetse bukarwereka ko rushoboye.

Ati “Iki gihugu kirabanza kikaguha kwigirira icyizere, kikakubwira ko ushoboye, icyo cyizere ni cyo kigufasha kugera kuri iyo ntego. Twe (Perezida Kagame) yaturemyemo kugira icyerekezo ku buryo mu gihe cy’imishyikirano mu 1993 twahuraga kenshi n’ingabo za Habyarimana.”

Gen Kabarebe yakomeje avuga ko mu byo banyuzemo harimo no gusuzugurwa n’Ingabo za Habyarimana ariko ntibyabaca intege kuko bo bumvaga bashoboye.

Yavuze ko mu 1993 ubwo imishyikirano yari irimbanyije hagati ya Leta ya Habyarimana na FPR Inkotanyi, nabo ku ruhande nk’ingabo bajyaga bagirana ibiganiro n’Ingabo z’u Rwanda z’icyo gihe.

Ni ibiganiro avuga ko byaberaga i Byumba ndetse bikitabirwa n’abasirikare bakomeye barimo na Col Bagosora.

Ati “Mu gihe imishyikirano yabaga ibera Arusha mu rwego rwa Politike natwe twahuriraga i Gicumbi n’Ingabo za Habyarimana. Habaga hari abasirikare bakomeye cyane, abitwa ba Anathole Nsengiyumva, abitwa ba Bagosora, Col Bagosora yabaga ahari.”

Gen Kabarebe yakomeje avuga ko bo babaga bafite ubushake bwo kuvanga ingabo kuko n’igisirikare cya Habyarimana cyari gikomeye, gusa bagakomwa mu nkokora n’uko abasirikare ba FAR babasuzuguraga bakababwira ko batize ndetse batagira n’uruhushya rwo gutwara imodoka ngo nibura bazababere abashoferi.

Ati “Iyo babishaka twari kubaka ingabo zikomeye kuko ntabwo bari boroshye nabo kuko ni Abanyarwanda ku bandi, twararwanaga tukabatsinda ariko icyo twabatsindishaga ni impamvu ntabwo ari ukuvuga ngo twabatsindishaga izindi mbaraga nabo iyo bahindura gusa bakaza tukumva kimwe, tukubaka igihugu ntacyo bari kuba batakaje ariko babaga bari aho.”

“Twebwe twumvaga dufite ubushobozi n’ububasha ariko ugasanga baratubwira bati ese mwebwe turabavanga ngo muzakore iki ko nta mashuri mugira, ngo ese harimo n’abafite permis ngo nibura tuzabagire abashoferi bacu, ese turabavanga ngo muzakore iki?”

Yakomeje agira ati “Tuti ese ko tubanesha, niba tudafite permis n’ayo mashuri kuki tubanesha, tukareba tukabihorera, wahitaga wumva ko bapfuye mu bitekerezo ariko kubera ko twe twari twararemwo icyizere twumvaga ko bishoboka.”

Gen Kabarebe yavuze ko iyi myumvire y’Ingabo za Habyarimana yari ipfuye kuko ubushobozi bw’umuntu budashingira ku mashuri afite gusa.

Yavuze ko nubwo banengwaga ko batize, bitabaciye intege kuko FPR-Inkotanyi ariyo yabaye umusemburo w’iterambere uyu munsi igihugu gifite.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .