Gatsibo: Ibuka yasabye ko abakomeje guhohotera abarokotse Jenoside babihanirwa

Yanditswe na Hakizimana Jean Paul
Kuya 20 Kamena 2020 saa 08:59
Yasuwe :
0 0

Ubuyobozi bwa Ibuka mu Karere ka Gatsibo, bwasabye ko abagaragara mu bikorwa by’urugomo rukomeje gukorerwa abacitse ku icumu rya jenoside yakorewe Abatutsi muri ako karere, bakurikiranwa bagahanwa.

Ni nyuma y’uko hari abacitse ku icumu rya Jenoside yakorewe abatutsi mu 1994, bo mu Karere ka Gatsibo, batezwe n’abantu bakabahohotera. Abo ni abasaza babiri bari hejuru y’imyaka 60 bo mu mirenge wa Gitoki na Kiramuruzi, umwe yatewe icyuma ku mutwe undi ategwa n’abantu baramukubita bamugira intere.

Tariki 13 Werurwe 2020 mu Mudugudu wa Nyagacyamu mu Kagari ka Karubungo mu Murenge wa Gitoki, umusaza uri hejuru y’imyaka 60 witwa Kajuga Joseph wiciwe umugore n’abana bose muri Jenoside yakorewe abatutsi yatewe n’uwitwa Ntihabose Djuma mu nzu yabagamo wenyine, amutera icyuma mu mutwe ndetse anakubita imigeri mu nda amubwira ko amuziza ko ari umututsi wacishije nyina amafaranga muri Gacaca.

Umunyamabanaga Nshingwabikorwa w’Akagari ka Karubungo Mbonyumugenzi Joseph, yasobanuriye IGIHE ko ibi byabaye tariki ya 13 Gicurasi ari n’ijoro ahagana saa sita cyangwa saa saba zijoro.

Ati “Umugabo witwa Ntihabose Djuma yasanze uriya musaza ahantu yari acumbitse amutera icyuma mu mutwe n’imigeri mu ruhago ndetse n’ingumi nyinshi, umusaza twaramubajije tuti wabwiwe n’iki ko ariwe atubwira ko yamumuritse n’agatoroshi akamubona.”

Yakomeje avuga ko umusaza bahise bamugeza kwa muganga arakurikiranwa ageraho arataha ariko akajya anyara amaraso.

Avuga ko babajije uwo musaza icyo bapfa dore ko atari bwo bwa mbere yari agerageje kumwica ariko ntibikunde, abasubiza ko amuziza ko mu gihe cya Gacaca uwo musaza yareze nyina w’uwo musore ko amutoteza bakamuca amafaranga ibihumbi 30Frw ariko ngo bari bariyunze byarararangiye.

Ntihabose Djuma uregwa mu guhohotera uyu musaza ngo yatawe muri yombi na RIB ariko nyuma y’iminsi mike ararekurwa gusa akaba atari ku nshuro ya mbere avuzweho urugomo aho mu mwaka ushize yakubise Gitifu w’Akagari ariko nabwo akaza kurekurwa n’inzego z’umutekano.

Ati “Umwaka ushize yarankubise ubwo narindi kumwe n’irondo nsanze ari kurirwanya ngo ntabwo arishaka, icyo gihe nabwo yarafunzwe aza kurekurwa ariko ahanini ugasanga n’ibikorwa akunze gukora birimo magendu n’ibiyobyabwenge ntibyemewe, tubona yarananiranye.”

Kuri uyu wa Gatatu tariki ya 17 nabwo mu Mudugudu wa Kumana, Akagari ka Gakoni, mu Murenge wa Kiramuruzi hagaragaye undi musaza witwa Gasangwa Dismas w’imyaka 63 wacitse ku icumu rya Jenoside nawe wongeye guhohoterwa.

Uyu musaza yari ari kumwe na mugenzi we witwa Gapfizi bataha bageze mu nzira basanga batezwe n’abantu bitwaje inkoni batangira kubakubita uyu witwa Gapfizi ariruka arabasiga basigarana Gasangwa ngo bamukubita inkoni zo mu mutwe kugira ngo bamunogonore.

Amakuru IGIHE ikesha ubuyobozi bwa Ibuka ngo ni uko uyu musaza abamuteze bamuzizaga ko yatanze amakuru ko uwitwa Gatete wari warakatiwe burundu nyuma yo guhamywa n’ibyaha bya jenoside yarekuwe atarangije igifungo cye, bagakeka ko aricyo azira kuko ngo nyuma yaho arekuriwe aribwo uyu musaza yatangiye kujya agira umutekano muke.

Umunyamabanga Nshingwabikorwa w’Umurenge wa Kiramuruzi , Yankurije Vestine yabwiye IGIHE ko abakubise uyu musaza bahise batoroka ariko ko bakiri gushakishwa.

Ati “Kugeza ubu abamukubise baratorotse ntabwo turababona ariko ubu turi gukurikirana ngo tumenye icyo bamuzizaga n’ubu niho ndi njye n’abashinzwe umutekano.”

Yankurije yavuze ko Gasangwa wakubiswe kuri ubu arwariye mu bitaro bya Gisirikare bya Kanombe nyuma yaho mu bitaro bya Kiziguro basanze yaraviriyemo imbere, yemeje ko abamukubise bakomeje gushakishwa ngo babiryozwe.

Umuyobozi wa Ibuka mu Karere ka Gatsibo, Sibomana Jean Nepomuscene, avuga ko akenshi mu minsi 100 yo kwibuka abatutsi bishwe muri Jenoside yakorewe abatutsi mu 1994, ibikorwa by’urugomo n’ingengabitekerezo bikunze kongera kugaragara cyane muri aka Karere agasaba inzego z’umutekano kujya zihana ababigaragaramo.

Ati “Mu gihe cy’iminsi 100 yo kwibuka akenshi usanga ingengabitekerezo isa naho yazamutse ni kimwe mu byo dukeka, icya kabiri birashoboka ko haba hari ibintu bibyihishe inyuma tutazi twebwe, icya gatatu bamwe mu baba bakoze ibyo byaha ntibahanwa, babajyana kuri polisi hashira iminsi ingahe bakabarekura bikarangira abantu babona ko bongeye kubikora babarekura.”

Yakomeje asaba inzego z’umutekano kujya zihana abantu nk’aba bagaragara mu bikorwa by’urugomo nk’ibi byanaba na ngombwa bagashyikirizwa urukiko bagahanwa kuko akenshi usanga haba hari ibimenyetso bibahama.

Sibomana avuga ko atari ubwa mbere ibikorwa nk’ibi bigaragara mu gihe cyo kwibuka Jenoside yakorewe abatutsi mu 1994, kukoo mu myaka yabanje nabwo hakunze kugaragara abavuga amagambo akomeretsa.

Umwe mu barokotse Jenoside wahohotewe akajyanwa kwa muganga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .