Gasabo: Rotaract Club y’Umujyi wa Kigali yahaye ishuri rya Nyacyonga n’abaryigaho ibikoresho by’Isuku

Yanditswe na Evariste Nsengimana
Kuya 2 Ugushyingo 2019 saa 06:49
Yasuwe :
0 0

Abanyamuryango ba Rotaract Club y’Umujyi wa Kigali kuri uyu wa Gatandatu bashyikirije ubuyobozi bw’Ishuri ribanza rya Nyacyonga riherereye mu Murenge wa Jabana mu Karere ka Gasabo, ibikoresho by’isuku birimo ikigega cy’amazi, kandagira ukarabe, ahajugunywa imyanda, ibyo abakobwa bifashisha bari mu gihe cy’uburumbuke n’ibindi.

Rotaract Club Kigali City yateguye iki gikorwa ifatanyije na Rotary Club Kigali Virunga na Rotaract Kampala Kibuli yo muri Uganda, bagikoreye kuri iri shuri ku nshuro ya kabiri.

Rotary ni umuryango w’abagiraneza utanga ubufasha muri sosiyete, ugabanyije mu byiciro bitandukanye birimo icy’abakuru, abiga muri Kaminuza bazwi nka ‘Rotaract’ n’abo mu yisumbuye bitwa Interact.

Uretse kubaha ibyo bikoresho bifite agaciro k’asaga miliyoni 5 Frw, banigisha abanyeshuri uburyo bwo kwimakaza isuku, by’umwihariko abakobwa bagasobanurirwa uko biyitaho mu gihe cy’uburumbuke.

Uyu mushinga ukorerwa kuri iri shuri uri mu byiciro bitatu, ku nshuro ya mbere barihaye ibikoresho nk’ibyo, banatera ibiti by’imbuto n’ibisanzwe mu rwego rwo kubungabunga ibidukikije.

Ishimwe Nadine wiga kuri iki kigo yavuze ko uretse ibikoresho by’isuku birimo ibyo kwifashisha mu gihe cy’uburumbuke yahawe, “Baduhaye n’inyigisho zitandukanye. Numvise uko nakwitwara nkora isuku y’umubiri wanjye n’aho ndi muri rusange n’uko umukobwa yakwitwara mu gihe ari mu burumbuke.”

Perezida wa Rotaract Club Kigali City, Otangocinge Denis, yavuze ko ari umwanya wo kuzuza zimwe mu nshingano biyemeje zitari zujujwe zo kubaha ikigega cy’amazi, kandagira ukarabe, aho kumena imyanda.

Ati “Ni igikorwa cyo kugira ngo dufashe abiga hano Nyacyonga kubera hari icyuho tubona mu kubona ibikoresho by’isuku n’isukura. Turashaka ko babona amazi asukuye mu gihe bayakeneye, niyo mpamvu twabazaniye ikigega, Puberi na kandagira ukarabe, kugira ngo babashe kubungabunga isuku.”

Umuyobozi w’Umurenge wa Jabana, Rwamucyo Louis de Gonzague, wabakiriye mu izina rya Meya w’Akarere ka Gasabo, yashimiye abanyamuryango ba Rotaract ku bikorwa by’urukundo kandi bigamije kubaka ubumuntu.

Ati “Icyo nabonye gikomeye kuri Rotaract na Rotary ni ukubaka ubumuntu guhera ku bana bato bagatozwa indangagaciro, isuku, bakamenya uko bagomba kwitwara, bakirinda kwiyandarika. Ibyo nibyo biranga u Rwanda twifuza.”

Umuyobozi w’Urubyiruko rwa Rotary mu Rwanda akaba na Ambasaderi wa Nigeria mu Rwanda, Adamu, yavuze ko icyo umuryango wabo ushyize imbere ari ugufasha urubyiruko mu mishinga irufasha mu bintu bitandukanye.

Ati “Rotaract irimo gutera inkunga ibyo igihugu gishyize imbere, twifuza ko bicye tubaha mubiha agaciro mukabibungabunga.”

Paul Masterjerb Birungi wavuze mu izina rya Rotary Club Kigali Virunga, yabwiye abo banyeshuri ko “Twumvikanye ko tuzajya dukora ibyiza. Icyo gikorwa rero nicyo cyatuzanye. Nta kindi twaje kubigisha, twaje kubigisha gukunda igihugu, gukunda gufashanya. Niba ufite icyiza gisangize abandi.”

Rotary ni umuryango w’abagiraneza wita ku gushaka umuti w’ibibazo birimo kurwanya ubujiji n’ubukene, kwegereza ubuvuzi kuri bose, kunoza imitangire y’amazi meza, kurwanya ibyorezo no guhashya indwara y’imbasa no gufasha abababaye, kubungabunga ibidukikije n’ibindi.

Abakobwa bari munsi y'imyaka 11 bari kwigishwa uko bagira uruhare mu isuku n'isukura
Abayobozi muri Rotaract bari gusobanurira abangavu uko bakoresha cotex
Ambasaderi wa Amerika mu Rwanda(ibumoso) n'uwa Nigeria mu Rwanda (Iburyo) bari bitabiriye uyu muhango
Bamwe mu bana biga ku ishuri ribanza rya Nyacyonga
Bamwe mu banyamuryango ba Rotaract Club Kampala Kibuli
Iki kigo cyahawe aho gushyira imyanda na Kandagira ukarabe
Ikigega cya Litiro ibihumbi 10 bahawe kizajya gifata amazi
Masterjerb(ibumoso) Amb wa Amerika mu Rwanda (Hagati) Peter Vrooman n'uwa Nigeria mu Rwanda Adamu (iburyo) bari bitabiriye iki gikorwa
Paul Masterjerb Birungi yabwiye aba banyeshuri ko batojwe kugirira neza abandi bakiri abana
Perezida wa Rotaract Club Kigali City, Otangocinge Denis, yavuze ko ari umwanya wo kuzuza zimwe mu nshingano biyemeje
Rotaract Club y’Umujyi wa Kigali yahaye ishuri rya Nyacyonga n'abaryigaho ibikoresho by'Isuku
Umuyobozi w’Umurenge wa Jabana, Rwamucyo Louis de Gonzague yashimiye ibikorwa Rotaract ikomeje gukorera ishuri riri mu murenge ayobora
Umuyobozi w'ishuri ribanza rya Nyacyonga ari kwakira abashyitsi
Umuyobozi w'urubyiruko rwa Rotary mu Rwanda, akaba na Ambasaderi wa Nigeria mu Rwanda, Adamu, yavuze ko icyo umuryango wabo ushyize imbere ari ugufasha urubyiruko mu mishinga itandukanye
Umwe mu banyeshuri ari kubereka uko yasobanukiwe gukaraba intoki, amazi meza n'isabune

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza