Gasabo: GS Rugando yatangije gahunda yiswe ‘Garuka ushime’

Yanditswe na David Eugène Marshall
Kuya 21 Nzeri 2018 saa 07:58
Yasuwe :
0 0

Urwunge rw’amashuri rwa Rugando ruherereye mu Murenge wa Kimihurura, Akarere ka Gasabo, rwatangije gahunda yiswe ‘Garuka Ushime’, igamije kumurikira abahize, abaharerera n’abaturanyi, ibikorwa ishuri rigezeho no kubereka imishinga riteganya kugira ngo bafatanye kuyishyira mu bikorwa.

Iyi gahunda ngarukamwaka yatangijwe kuri uyu wa Gatanu, aho abanyeshuri bamuritse ubumenyi mu bijyanye na mudasobwa, ubugeni n’ubuvanganzo bigishwa.

Ubuyobozi bw’Ikigo bwerekanye imbuga ishashemo amabuye n’ubusitani bugezweho byakozwe ku ruhande rw’aho abanyeshuri b’amashuri yisumbuye bigira, banerekana umushinga wo gutunganya imbuga y’aho abanyeshuri b’amashuri abanza bazajya bakinira imikino itandukanye.

Uyu mushinga biyeganyijwe ko uzuzura utwaye Miliyoni 38.458.533 Frw, azatangwa ku nkunga y’ababyeyi, abaturanyi n’inshuti z’iki kigo.

Umuyobozi w’Urwunge rw’Amashuri rwa Rugando, Bihozagara Dominique, yabwiye IGIHE ko gahunda ya ‘Garuka Ushime’, ari urubuga rwo gufatanya mu burezi, ababyeyi, inshuti, abaturanyi n’abahize bakibona mu iterambere ry’ikigo kandi bakarigiramo uruhare.

Ati “Uburere duha abana si ubwiru, tugomba kumurika ibyo twagezeho tukanerekana ibyo duteganya, ndetse aho bikenewe tukagirwa inama z’ibyo twakora neza kurushaho, kugirango iri shuri rikomeze imihigo tujya imbere.”

Bihozagara yakomeje avuga ko imishinga bafite bizeye ko izagerwaho kuko iri shuri ribanye neza n’ababyeyi, abaryizemo ndetse n’abaturanyi nka Kigali Convention Centre &Radisson Blu n’andi mahoteli akomeye.

GS Rugando ifite amashuri abanza, icyiciro rusange cy’ayisumbuye n’amashami y’indimi n’ubuvanganzo, imibare n’ikoranabuhanga mu gukoresha za mudasobwa. Ryigamo n’abanyeshuri 1817, rigakoramo abakozi bose hamwe 53.

Ni ishuri kandi ryagize umusaruro mwiza mu mwaka ushize, aho abashoje amashuri yisumbuye batsinze ku ijanisha rya 97%, mu cyiciro rusange hatsinda 77%, naho mu mashuri abanza hatsinda 94%.

Urwunge rw’amashuri rwa Rugando ni ikigo kimaze kuba ubukombe mu bijyanye n’uburezi mu Karere ka Gasabo, kuko cyatangiye ari amashuri abanza mu 1976, mu 2002 hajya ishuri ryisumbuye rya Kacyiru.

Mu 2009 ubwo Leta yatangiraga gahunda yo kwigisha abana imyaka 12 ku buntu, iri shuri ntiryahatanzwe.

Abanyeshuri berekanaga uko bateranya mudasobwa
Abanyeshuri bo mu mashuri abanza berekanaga ubuhanda bafite kuri mudasobwa
Gutunganya iyi mbuga ni umwe mu mushinga GS Rugando ifite
Igishushanyo mbonera cy'umushinga wo gutunganya imbuga y'aho abana bazajya bakinira
Ikoranabuhanga rirakataje muri GS Rugando
Ababyeyi, abize muri GS Rugando n'inshuti zaryo bitabiriye gahunda ya Garuka Ushime
Bihozagara Dominique avuga ko gahunda ya garuka ushime ari uguha umwanya ababyeyi, abize muri GS Rugando ngo batange umusanzu wabo mu iterambere ry'iri shuri

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza