Gasabo: Ababyeyi babwiwe uko bafasha abana gukurana imbuto y’ubutwari bakiri bato

Yanditswe na Evariste Nsengimana
Kuya 1 Gashyantare 2020 saa 05:35
Yasuwe :
0 0

Ababyeyi n’abandi bafite mu nshingano kurera, bahishuriwe ko gutoza umwana umuco w’ubutwari bikorwa akiri muto kugira ngo azabukurane kandi bumufashe kwiyubaka no kubaka igihugu.

Buri wa 1 Gashyantare u Rwanda rwizihiza Umunsi w’Intwari, hibukwa ibikorwa by’indashyikirwa byaranze abantu batandukanye kugeza n’ubwo bamwe bahara ubuzima bwabo bitangira igihugu n’abagituye.

Uyu mwaka ufite insanganyamatsiko igira iti ‘‘Ubutwari mu Banyarwanda, agaciro kacu”, wizihirijwe ku rwego rw’umudugudu, hatangirwa ubutumwa bugaruka ku guteza imbere umuco w’ubutwari.

Ni umunsi by’umwihariko uretse kureba aho u Rwanda rwavuye, hanarebwa ibimaze kugerwaho, imbogamizi zigihari n’ibyakorwa kugira ngo iterambere rirusheho kwihuta hagendewe ku bikorwa nk’ibyaranze Intwari z’u Rwanda.

Umudugudu wa Akaruvusha, umwe mu yigize Akagari ka Gacuriro, Umurenge wa Kinyinya, abaturage bashimiwe uburyo babashije kwishakamo ibisubizo ubu bakaba bari kwiyubakira imihanda ifite agaciro ka miliyoni 110Frw n’ibiro by’umudugudu bya miliyoni 12Frw.

Mu kiganiro yatanze, umwarimu muri Kaminuza ya World Mission, Prof Mugenzi Deo, yasabye ababyeyi kubiba umuco w’ubutwari mu bana hakiri kare kugira ngo bazawukurane.

Ati “Nimwigishe abana rero niba mushaka kubatoza kuba Intwari. Ikindi nabwira ababyeyi, umwana bamutoza kuba intwari akiri muto. Ababyeyi turarangara, umwana akiri muto niho umutoza gutanga, niho umutoza kwitangira abandi, niho umutoza gusangira n’abandi, gutuma, gutumika, kubaha no kubaha abandi.”

Uyu murezi yavuze ko ababyeyi bakwiye gukurikirana abana bakiri bato bakabaganisha ku cyo bifuza ko bazaba cyo mu gihe kiri imbere.

Ati “Ntabwo ari ugupfa kubyara ugashyira ku Isi gusa, ugomba kumurera, ukamutoza kugira ngo nawe azabe umwe mu ntwari z’igihugu. Ubutwari rero ni ugukunda igihugu, ukacyitangira, byaba na ngombwa ukagiha ubuzima bwawe.”

Ubu butumwa bunajyanye ahanini na Gahunda Urwego rushinzwe Intwari z’Igihugu, Imidari n’Impeta by’Ishimwe (CHENO) rwihaye uyu mwaka mu gihe hizihizwa umunsi w’Intwari, aho rwiyemeje guha urubyiruko umwihariko kugira ngo ruzabashe gukurana umuco w’ubutwari.

Umunyamabanga Nshingwabikorwa w’Umurenge wa Kinyinya, Umuhoza Rwabukumba, yashimye uburyo aba baturage bitanze bakishakamo ibisubizo mu kwiyubakira ibiro by’umudugudu n’umuhanda.

Ati “Ni ibikorwa bifite agaciro bakomeye nk’uko insanganyamatsiko dufite ibivuga. Ntushobora kuba intwari udafite ibikorwa. Intwari zacu tuzirikana uyu munsi ni uko hari ibikorwa zakoze. Ni uko hari aho zavanye iki gihugu n’aho bakigejeje. Ni uko hari intangiriro batangije uyu munsi igikomeje.”

Umuhoza yavuze ko abanyarwanda bose bageze ikirenge mu cy’intwari byafasha kugera ku byo u Rwanda rwiyemeje kugeraho mu cyerekezo 2050 kandi bikagerwaho vuba.

Umwe mu babyeyi bari bitabiriye ibi birori witwa Ngirinshuti Etiènne, yavuze ko iyo umwana abaye ikigwari akenshi umubyeyi we ariwe uba wabigizemo uruhare, bitewe n’uburyo yagiye amukurikirana.

Intwari z’Igihugu zigabanyijwemo ibyiciro bitatu birimo Imanzi, Imena n’Ingenzi.

Mu cyiciro cy’Imanzi harimo Umusirikare utazwi ari yo ingabo ihagarariye izindi ngabo zitangiye Igihugu zikagwa ku rugamba mu bihe byashize, iby’ubu n’ibizaza ndetse na Gen. Maj Fred Gisa Rwigema.

Mu cyiciro cy’Imena harimo Umwami Mutara wa III Rudahigwa, Rwagasana Michel, Uwilingiyimana Agathe, Niyitegeka Felicité ndetse n’abanyeshuri b’i Nyange.

Kugeza ubu mu cyiciro cy’Ingenzi nta ntwari zari zashyirwamo, aho ngo hagikorwa ubushakashatsi.

Bamwe mu batuye muri uyu mudugudu bitabiriye ibirori byo kwizihiza umunsi w'intwari
Bamwe mu bayobozi bari bitabiriye
Ibiro by'umudugudu abaturage biyubakiye
Prof Mugenzi Deo yasabye ababyeyi kubiba umuco w'ubutwari mu bana hakiri kare kugira ngo bazawukurane
Rusheke Jean uyobora umudugudu w'Akaruvusha arimo gutanga ikaze
Umunyamabanga Nshingwabikorwa w'Umurenge wa Kinyinya Umuhoza Rwabukumba, yashimye uburyo aba baturage bitanze bakishakamo ibisubizo
Uyu muhanda uzuzura utwaye miliyoni 30Frw

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .