Gakenke: Abavumvu barataka ibihombo batewe n’imiti yakoreshejwe mu kurwanya nkongwa

Yanditswe na N.Kubwimana Janvière
Kuya 1 Nyakanga 2019 saa 06:04
Yasuwe :
0 0

Abakora umurimo w’ubuvumvu mu karere ka Gakenke bavuga ko bahuye n’ibihombo bikomeye byatewe n’imiti yakoreshejwe mu kurwanya nkongwa yari yibasiye ibigori, iyo miti ikaza kwica inzuki zabo.

Iyo ndwara ya nkongwa yibasiye cyane igihingwa cy’ibigori muri aka Karere mu myaka itatu ishize. Mu kuyirwanya hifashishijwe imiti itandukanye yica udukoko nyuma inzuki zo mu mizinga yose yari yegereye aho ibyo bigori byari bihinze zaje gupfa bituma abakoraga uyu mwuga bawureka.

Bamwe muri aba bavumvu bo mu Mirenge itandukanye igize Akarere ka Gakenke, bavuga ko kuba batagikora umwuga wabo byabasubije inyuma mu iterambere.

Ngayaberura Protais yagize ati “ Nari mfite imizinga irenga 15, mu gihe cy’impeshyi iyo najyaga guhakura rimwe nuzuzaga indobo y’ibiro 30 by’ubuki, nabujyana ku isoko bakampa nibura ibihumbi 45 Frw none ubu ugeze muri iyo mizinga ntiwakumva n’uruyuki na rumwe ruduhira zose zarapfuye kubera iriya miti bakoresheje yica nkongwa.”

Mutungirehe Syliver yavuze ko imizinga ye ariyo yatumaga abona ubwisungane mu kwivuza bw’umuryango we ndetse n’ibikoresho by’ishuri by’abana be, nyamara ngo ubu ntakibibona.

Ati “Kuva mu myaka itatu ishize nadukiwe n’ubukene kuko inzuki zari zintunze zose zarapfuye bitewe n’uriya muti watewe mu bigori wica nkongwa. Turasaba ababishinzwe badutabare barebe undi muti itica inzuki, abavumvu duhahe n’abahinzi b’ibigori nabo bahahe twese dutere imbere”.

Umuyobozi wungirije w’Akarere ka Gakenke ushinzwe ubukungu, Niyonsenga Aimé Francçois, avuga ko iki kibazo bakimenyesheje Ikigo cy’Igihugu Gishinzwe Ubuhinzi n’Ubworozi (RAB).

Yagize ati “ Twasabye ko harebwa undi muti wakwifashishwa mu kurwanya nkongwa yo mu bigori ariko ntubangamire ibindi binyabuzima, hagati aho turasaba n’abavumvu kujya bajyana iyo mizinga kure y’ibi bingwa bakanatera ibiti by’imbuto hafi aho, inzuki zikajya zihahova zitagombye gukora urugendo rurerure kuko nabyo bizinaniza”.

Mu Karere ka Gakenke habarurwa abavumvu babukora ku buryo bw’umwuga barenga 150, bibumbiye mu makoperative 19.

Abakora umurimo w’ubuvumvu mu karere ka Gakenke bavuga ko bahuye n’ibihombo bikomeye byatewe n’imiti yakoreshejwe mu kurwanya nkongwa yari yibasiye ibigori

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza