00:00:00 IGIHE NETWORK KN KINYARWANDA EN ENGLISH FR FRANCAIS

FDLR yavuguruje Perezida Tshisekedi wayise amabandi

Yanditswe na IGIHE
Kuya 1 Ukuboza 2022 saa 07:24
Yasuwe :

Umutwe w’Iterabwoba wa FDLR ukorera mu Burasirazuba bwa Repubulika Iharanira Demokarasi ya Congo (RDC) wanyuranyije na Perezida w’icyo gihugu, Felix Tshisekedi wavuze ko utakibaho ahubwo usigaye ugizwe n’amabandi yishakira ibyo kurya.

FDLR yatangaje ko abavuga ko itakibaho itazi aho babikura kuko ingabo zayo ‘zihagaze bwuma’.

Uyu mutwe ugizwe na bamwe mu basize bagize uruhare muri Jenoside yakorewe Abatutsi ndetse bamwe mu bahoze bayiyobora bagiye bakatirwa n’inkiko mpuzamahanga ku byaha bitandukanye bya Jenoside.

Ni umutwe wakunze guteza umutekano muke haba muri Congo no mu Rwanda. Raporo y’Itsinda ry’impuguke za Loni iherutse kugaragaza ko inyeshyamba za FDLR zimaze iminsi zifatanya n’ingabo za RDC (FARDC) mu mirwano n’umutwe wa M23 umaze igihe wigarurira uduce dutandukanye muri Kivu y’Amajyaruguru, bagatera n’ibisasu mu Rwanda.

Muri Nzeri uyu mwaka ubwo Perezida Tshisekedi yaganiraga na France 24 nyuma y’Inteko rusange ya Loni i New York, yavuze ko FDLR ari umutwe utagize icyo utwaye.

Ati “Kuva najya ku butegetsi bw’igihugu cyanjye, twacyuye inshuro zirenga ebyiri abarwanyi bagera mu magana ba FDLR. Mu by’ukuri, ni ikimenyetso cy’uko hari ubushake kandi uyu munsi FDLR ni umutwe udateje ikibazo na kimwe ku mutekano.”

Yakomeje avuga ko magingo aya, uyu mutwe wahindutse amabandi kuko ngo usigaye ugaragara mu bikorwa by’ubusahuzi bibangamira abaturage.

Ati “Ntabwo ari abantu bafite intumbero za politiki zo gushaka kwigarurira ubutegetsi i Kigali. Muri make rero, ibyo u Rwanda ruvuga ni ikinyoma.”

Umuvugizi wa FDLR, Cure Ngoma mu kiganiro aherutse kugirana na BBC Gahuzamiryango, yanyomoje Tshisekedi, avuga ko atari umutwe w’amabandi.

Ati “Turahari, ababivuga ubwo bafite aho babikura, tubaye tudahari ntabwo twaba turi kuvugana. Ingabo zacu zirahari zihagaze bwuma”.

Inama y’abakuru b’ibihugu by’akarere yateraniye i Luanda mu cyumweru gishize, yafashe ingamba zigamije kugarura amahoro mu Burasirazuba bwa Congo.

Hejuru yo guha amasaha 48 umutwe wa M23 ngo ube wavuye mu duce umaze gufata, abakuru b’ibihugu bategetse ko imitwe ya "FDLR-FOCA, RED Tabara, ADF n’indi mitwe yitwaje intwaro ikorera ku butaka bwa Congo igomba guhita ishyira intwaro hasi, igakurikiza gahunda yo gusubizwa mu bihugu ikomokamo."

Cure Ngoma yaciye amarenga ko batazubahiriza iyo myanzuro nubwo atanagaragaza niba bazahangana n’ingabo z’akarere nibadashyira intwaro hasi.

Ati “Ntabwo ari Leta ya Congo tuzaganira nayo ahubwo twe ni ukudufasha tukaganira na Leta ya Kigali, ikibazo aho kiri ntabwo abo bakuru b’ibihugu bavuga bati ’mushyire hasi izo ntwaro noneho mugirane ibiganiro na Leta ya Kigali’. Ahubwo bo ngo imitwe bita iy’abanyamahanga nishyire hasi intwaro itahe nta yandi mananiza.”

Leta ya RDC imaze iminsi yinyuramo ku kibazo cya FDLR, rimwe ikavuga ko ari umutwe utabaho, ubundi ikavuga ko nta kibazo uteye u Rwanda n’ibindi.

Raporo y’Itsinda ry’impuguke za Loni yagaragaje ko FARDC ifatanya mu buryo bweruye na FDLR ndetse bigakorana mu bikorwa byo guhungabanya umutekano w’u Rwanda.

Guhera muri Werurwe 2022 kugeza mu Ugushyingo, FARDC ku bufatanye na FDLR bamaze kurasa mu Rwanda inshuro eshatu ibisasu bitandukanye.

Ku wa 19 Werurwe 2022 mu Murenge wa Kinigi haguye ibisasu bibiri byatewe n’ingabo za Congo biturutse mu duce twa Tchanzu na Runyoni, ubwo FARDC yagabaga igitero ku mutwe wa M23.

Ibisasu byongeye kuraswa ku butaka bw’u Rwanda tariki 23 Gicurasi ndetse na tariki 10 Kamena, mu mirenge ya Kinigi na Nyange muri Musanze n’uwa Gahunga muri Burera, bikomeretsa abantu byangiza n’imitungo yabo.

Mu kwezi gushize, Umuvugizi Wungirije wa Guverinoma y’u Rwanda, Alain Mukuralinda, yavuze ko RDC yigiza nkana iyo ivuga ko FDLR nta kibazo iteje u Rwanda.

Ati “FDLR uko yarwana kose, ntabwo ishaka kurwana ijya i Kinshasa, FDLR icyo igamije ni ukurwana iza mu Rwanda haba Rubavu, Musanze [..] ni icyo igamije. Niba hari ibyo bafatanya bakarwanya iyo mitwe yindi na M23, nibaramuka batsinze iyo mitwe [FDLR] izaryama cyangwa hari ibyo bayemereye? Ubwo se ibyo u Rwanda rwabimenya rukiryamira?”

FDLR yagaragaje ko igihari kandi ishaka kugera i Kigali ku ngufu, nubwo Perezida wa RDC yavuze ko itakibaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .