EU yifatanyije n’Abanyarwanda mu #Kwibuka25, ishima intambwe bateye mu bwiyunge no kwiyubaka

Yanditswe na Evariste Nsengimana
Kuya 6 Mata 2019 saa 08:16
Yasuwe :
0 0

Umuryango w’Ubumwe bw’Ibihugu by’u Burayi (EU) watangaje ko wifatanyije n’Abanyarwanda mu gihe bibuka ku nshuro ya 25, Jenoside yakorewe Abatutsi.

Kuri iki cyumweru taliki ya 7 Mata, Abanyarwanda n’inshuti zabo hirya no hino ku Isi baratangira igihe cyo kwibuka Jenoside yakorewe Abatutsi mu 1994.

Itangazo ryashyizweho umukono n’Umuyobozi ushinzwe ububanyi n’amahanga n’umutekano muri EU, Federica Mogherini, rivuga ko uwo muryango ‘wifatanyije n’imiryango n’inshuti zaburiye abazo muri Jenoside yakorewe Abatutsi’.

Federica yavuze ko ashima intambwe u Rwanda rwateye mu myaka 25 ishize rwiyubaka mu nkingi zose z’iterambere, agaruka ku muhate abanyarwanda bashyize mu kwiyubaka, kubaka igihugu no kugera ku rwego rushimishije rw’ubwiyunge.

Ati “Kubera izo mbaraga, abanyarwanda bakwiye gukomeza gufashwa kandi imiryango mpuzamahanga ikifatanya na bo.”

Yavuze ko kwibuka ari umwanya wo kongera gutekereza ku hahise h’Akarere n’Isi muri rusange, ndetse ko gukomeza gushyigikira indangagaciro, kutihunza inshingano no gukorera hamwe ko ari byo bifite akamaro.

Ati “Ntidukwiye kwemera gushyigikira ibitemewe, dusangiye inshingano zo kurinda abaturage ibyaha byibasira inyokomuntu.”

EU ngo izakomeza gufatanya n’abandi bafatanyabikorwa mu kurwanya urwango ruca intege ubumwe n’ubwumvikane no gukora ibyo ishinzwe kugira ngo imiyoborere ishingire ku mahame mpuzamahanga igerweho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza