00:00:00 IGIHE NETWORK KN KINYARWANDA EN ENGLISH FR FRANCAIS

Ethiopia yashimye u Rwanda intambwe rwateye mu kwimakaza ubumwe n’ubwiyunge

Yanditswe na Manzi Angelo
Kuya 29 Nzeri 2022 saa 09:26
Yasuwe :

Itsinda ry’abayobozi bo muri Ethiopia basuye ibice bitandukanye byo mu Karere ka Bugesera mu rugendoshuri rwo kwigira ku Rwanda ibijyanye no kwimakaza amahoro n’ubwiyunge no kongera guhuza umuryango Nyarwanda binyuze muri gahunda ya ’Mvura Nkuvure.’

Izi ntumwa ziri mu ruzinduko ziyobowe n’ umuyobozi mukuru ushinzwe kubaka Ubumwe n’Ubwenegihugu muri Minisiteri ya Ethiopia ishinzwe kubaka Amahoro, Asma Redi, aho kuri uyu wa kabiri zasuye imiryango yo mu mirenge ya Rweru na Ntarama mu Karere Ka Bugesera ku bufatanye n’Umuryango Mpuzamahanga urwanya ihohoterwa ukanaharanira amahoro arambye( Interpeace) n’Umuryango Nyarwanda w’isanamitima uhuza abagize uruhare muri Jenoside n’abayirokotse (Prison Fellowship Rwanda.)

Iyi gahunda ya Mvura Nkuvure ifasha Abanyarwanda b’ingeri zose barimo abiciwe, abakoze Jenoside bafunze n’abafunguwe, abaturanyi babo n’inshuti zabo ndetse n’abana bavutse ku babyeyi bakozweho na Jenoside, bakongera kwiyumvamo urukundo, ubumuntu n’ubuvandimwe.

Muri ibi biganiro bamwe mu bagize uruhare muri Jenoside n’abayirokotse batanze ubuhamya bw’ukuntu biyunze binyuze muri gahunda ya ’Mvura Nkuvure’, bahamya ko amahoro ashoboka mu gihe hariho ubuyobozi bwiza.

Giraneza John, umwe mu barokotse Jenoside ahamya ko kubaka ubumwe n’amahoro yumvaga bitashoboka ariko binyuze muri gahunda yitwa "Twuzuzanye" na "Mvura Nkuvure" yashakanye n’ umwe mu muryango w’abamwiciye.

Yagize ati “Nyuma y’amarorerwa yabaye mu Rwanda mbyansigiye ibikomere niyo mpamvu ubona meze gutya, ubwo Prison Fellowship Rwanda yazaga kwigisha Abanyarwanya y’uko batagomba kwihorera, byatumye nza guhinduka nubwo byabasabye kunyinginga bibanza kugorana, nyuma birangira nshakanye n’umwe mu banyiciye, ubu ntimwakumva ukuntu nkunda umugore wanjye cyane."

Akomeza avuga ko kwigisha ubumwe n’ubwiyunge atari amagambo ahubwo bijyana n’ibikorwa.

Umuyobozi mukuru ushinzwe kubaka Ubumwe n’Ubwenegihugu muri Minisiteri ya Ethiopia ishinzwe kubaka Amahoro, Asma Redi yavuze ko mu gihugu cya Ethiopia hari kuba intambara ndetse zishobora no kuzana Jenoside bityo bakaba baraje kwigira ku Rwanda uburyo rwiyubatse mu bijyanye n’amahoro n’ubwiyunge.

Ati "Kuba dufite ibintu byinshi duhuje kandi dusangiye igihugu cyacu cyagira amahoro arambye kigiye ku Rwanda nk’ igihugu cy’icyitegererezo ku Isi."

Mahoro Margaret ushinzwe ibikorwa muri Interpeace Rwanda, yavuze ko bakorana n’abafatanyabikorwa mu guha amahugurwa ndetse n’ibiganiro kugira ngo bafashe bene iyi miryango kongera kugira amahoro arambye.

Visi meya w’Akarere ka Bugesera ushinzwe imibereho myiza y’abaturage, Yvette Imanishimwe yavuze ko abaturage batujwe muri iyi midugudu bamaze kumva neza akamaro k’amahoro, asaba n’ abandi bagifitanye amakimbirane kwimakaza ubumwe n’ ubwiyunge.

Abarenga 2000 bamaze gufashwa binyuze muri porogaramu ya Interpeace ya Mvura Nkuvure ifatanyamo n’abandi bafatanyabikorwa nka Prison Fellowship mu karere ka Bugesera mu gihe cy’imyaka ibiri gusa.

Kubera umusaruro mwiza imaze gutanga, iyi porogaramu imaze kwagurirwa mu tundi turere dutanu turimo Nyamagabe, Nyabihu, Musanze, Ngoma na Nyagatare.

Abaturage bari muri gahunda zitandukanye z'ubumwe n'ubwiyunge bari babukereye
Ethiopia imaze iminsi mu ntambara isanga ibyo u Rwanda rwakoze mu kwimakaza amahoro nabo babyifashisha
Ibiganiro banyuzagamo bagacinya akadiho
Imyaka 28 irashize u Rwanda rutangiye urugendo rw'ubumwe n'ubwiyunge
Biyemeje ko inzira y'ubumwe n'ubwiyunge y'u Rwanda bazayifashisha iwabo
Abanya-Ethiopia banyuze n'inzira y'ubumwe n'ubwiyunge abanyarwanda bafashe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .