Dr Ngirente yagaragaje urubyiruko nk’umusingi w’iterambere ry’ubuhinzi muri Afurika

Yanditswe na IGIHE
Kuya 8 Nzeri 2020 saa 11:14
Yasuwe :
0 0

Minisitiri w’Intebe, Dr Edouard Ngirente, yatangaje ko urubyiruko rwa Afurika rukwiye kwifashishwa nk’umusingi hatezwa imbere urwego rw’ubuhinzi, by’umwihariko bugakorwa bijyanye n’igihe hifashishijwe ikoranabuhanga.

Yabigarutseho kuri uyu wa Kabiri ubwo abantu barenga ibihumbi 10 bari bitabiriye mu buryo bw’ikoranabuhanga inama yiga ku iterambere ry’ubuhinzi muri Afurika, yakiriwe n’u Rwanda, aho usibye uwo mubare, muri Kigali Convention Centre hari hateraniye abagera ku ijana bungurana ibitekerezo kuri uru rwego rubumbatiye ahazaza h’uyu mugabane.

Minisitiri w’Intebe, Dr Edouard Ngirente, watangije iyi nama yabaye ku nshuro ya 10, yasabye ko urubyiruko ruhabwa umwanya wihariye mu iterambere rya Afurika binyuze mu buhinzi.

Imibare igaragaza ko ahazaza ha Afurika hashingiye ku rubyiruko, urugero ni uko mu 2050 nibura biteganyijwe ko abakozi bane mu 10 ku Isi bazajya baba baturuka muri Afurika. Uyu munsi abarenga 50% by’Abanyafurika ni urubyiruko rufite imyaka 20.

Dr Edouard Ngirente yagize ati “Umugabane wa Afurika utuwe n’abantu miliyari 1.2 kandi hejuru ya 60 ku ijana by’aba baturage, bari munsi y’imyaka 25. Uyu mubare munini w’urubyiruko rwa Afurika ni izingiro ryo guhindura urwego rw’ubuhinzi kuri uyu mugabane, gusa uru rubyiruko rwa Afurika ntirurabona uru rwego rw’ubuhinzi nk’amahirwe yo kubyaza inyungu no kwiteza imbere, bityo rero ni ngombwa ko dukomeza kugaragaza imbogamizi zikiri muri uru rwego tureshya urubyiruko, cyane mu gukoresha ikoranabuhanga mu iterambere ry’ubuhinzi.”

Muri Afurika, ubuhinzi bugira uruhare rwa 32 % ku musaruro mbumbe w’igihugu mu gihe bukorwa n’abagera kuri 70 %. Umugabane wa Afurika wihariye 60% by’ubutaka buhingwa ku Isi.

Perezida w’Ihuriro Nyafurika ku iterambere ry’ubuhinzi (AGRA), Hailemariam Desalegn wigeze kuba Minisitiri w’Intebe wa Ethiopia, yatangaje ko Afurika ikwiye gufatira urugero ku gihugu cye kuko cyigeze guhura n’ibibazo by’amapfa yahitanye benshi.

Ati “Amapfa yigeze gutera muri Ethiopia mu myaka ya za 80 asiga yishe abagera kuri miliyoni 1,2 n’impfubyi zirenga ibihumbi 200, ariko kuva ubwo twarahagutse turakora cyane tugaruka ku murongo.”

Umuyobozi w’inama y’ubuyobozi y’Ihuriro Nyafurika ku iterambere ry’ubuhinzi (AGRA), Dr Agnes Kalibata, yatangaje ko isoko rya Afurika rifite agaciro ka miliyoni 250 z’amadolari ya Amerika, riruta kure ibyo uyu mugabane wohereza mu mahanga.

Ati “Ni isoko dukwiye kubyaza umusaruro cyane ko na COVID-19 yatweretse ko guhahirana n’abari kure kenshi birimo imbogamizi. Rero dukwiye gukuramo isomo, ryo guhahirana hagati yacu n’uburyo twabibyaza umusaruro.”

Nubwo Afurika ibereye ubuhinzi, buri mwaka isohora miliyari 35 z’amadolari igura ibiribwa hanze yayo, ndetse nta gikozwe zizikuba gatatu bitarenze umwaka wa 2025.

Urubyiruko rukora ubuhinzi mu Rwanda rwanditse muri RYAF rusaga ibihumbi 12 rufite ibigo by’ubucuruzi birenga 1300. Rwibumbiye mu nzego zirimo gutunganya ibikomoka ku buhinzi, ubworozi, gutunganya umusaruro, serivisi zifasha abahinzi n’ikoranabuhanga mu rwego rw’ubuhinzi.

Ikigo cy’Igihugu cy’Ibarurishamibare (NISR) kigaragaza ko abanyarwanda basaga 70% batunzwe n’ubuhinzi, bubumbatiye nibura 30% by’ubukungu bw’igihugu, bukurikira urwego rwa serivisi rwihariye 46%.

Minisitiri w'Intebe, Dr Edouard Ngirente na Hailemariam Desalegn ubwo bageraga muri KCC aho iyi nama yabereye
Umuyobozi w'Urugaga rw'Abikorera, Robert Bapfakurera, ni umwe mu bari bitabiriye iyi nama
Minisitiri w'Ubuhinzi, Dr Mukeshimana Geraldine, ageza ijambo ku bari bitabiriye iyi nama
Umuyobozi w’inama y’ubuyobozi y’Ihuriro Nyafurika ku iterambere ry’ubuhinzi (AGRA), Dr Agnes Kalibata, yasabye abari bitabiriye iyi nama kubyaza amahirwe ari muri Afurika
Hailemariam Desalegn wigeze kuba Minisitiri w'Intebe wa Ethiopia yasabye ibihugu kwigira ku gihugu cye cyigeze gushegeshwa n'amapfa
Mu cyumba cya KCC harimo abantu bagera ku ijana, abandi barenga ibihumbi 10 bari bakurikiye mu buryo bw'ikoranabuhanga

Kanda hano ubone andi mafoto
Amafoto: Moise Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .