Dr Léon Mugesera yasabye guhanagurwaho ibyaha no koherezwa muri Canada

Yanditswe na Twarabanye Venuste
Kuya 22 Kamena 2020 saa 08:57
Yasuwe :
0 0

Dr Léon Mugesera yasabye Urukiko rw’Ubujurire ko rwamuhanaguraho ibyaha yahamijwe n’Urukiko Rukuru kuko ibyo rwashingiyeho ari ibinyoma abatangabuhamya bigishijwe.

Urubanza rwa Dr Léon Mugesera wahamijwe ibyaha bya Jenoside agakatirwa gufungwa burundu, rwakomeje kuri uyu wa Mbere tariki 22 Kamena 2020 asobanura ingingo yatumye ajurira ivuga ku kuba Urukiko Rukuru rwarumvise uruhande rw’abamushinja gusa rukabishingiraho rumuha icyo gihano.

Iburanisha ryari riteganyijwe gutangira saa Tatu za mugitondo ariko riza gutangira saa Tanu.

Perezida w’urukiko yavuze ko iburanisha ryatinze kubera ‘izindi manza’. Adatinze yahaye Dr Mugesera ijambo na we asaba ko hari ibyo yasobanura akeka ko bitumvikanye neza mu iburanisha riheruka, akabitangaho umucyo mbere yuko avuga ku ngingo yari iteganyijwe.

Dr Mugesera yavuze ko ashaka gusobanura ku bibaza niba yaragiye ku Kabaya ndetse akahavugira imbwirwaruhame.

Ati “Icya mbere ni ku kibazo kuvuga ngo ese Mugesera yagiye muri mitingi? Igisubizo ni yego.”

Yavuze ko ku wa 22 Ugushyingo 1992 yavuye iwe ajya muri mitingi ahawe lifuti mu ivatiri nubwo atibuka nyiri iyo modoka. Akaza no kuvuga ijambo atari yateguye ridafite aho ryanditse cyangwa ngo habe hari umunyamakuru warifashe.

Ubushinjacyaha bwahise buvuga ko Urukiko Rukuru rwamaze kwemeza iby’ijambo yavugiye ku Kabaya kandi ko bifite agaciro ndetse ko bikubiyemo ibyashingiweho ahamwa n’ibyaha bityo ko yakomereza ku ngingo y’umunsi kuko ibyo avuga nta shingiro ku buryo byabivuguruza.

Mugesera yahise asoza ijambo yari yasabye ngo avuge ku iburanisha riheruka asaba ko mu mwirondoro we hakosorwa ahanditse ko avuka mu Murenge wa Rongi kuko icyo kintu kitabagaho hariho Segiteri Rongi. Asaba ko n’izina ry’umugore we ryakosorwa kuko banditse Uwamaliya kandi ari Uwamariya. Perezida w’urukiko ati "ibyo bizakosorwa".

-  Mugesera yavuze ko Urukiko Rukuru rwakoze ikosa rikomeye

Dr. Mugesera yavuze ko Urukiko Rukuru rwakoze ikosa rikomeye cyane mu mategeko ryo kumukatira rushingiye ku byavuzwe n’uruhande rumwe rw’abatangabuhamya bamushinja. Aho rwishe ihame rwo kureshyeshya intwaro (égalité des armes).

Yavuze ko abatangabuhamya 45 batanzwe n’Ubushinjacyaha urukiko rugatoranyamo 28 bigishijwe ibinyoma mu cyo yise ‘uruganda rucura ibinyoma’. Yavuze ko yasabye ko abo 28 yahura nabo akagira ibyo ababaza kandi ko amategeko abimwemerera ariko ntiyabyemererwa.

Ati “Icyo urukiko rwarakinyangiye icyo nicyo nagira ngo mpereho mbwira urukiko.”

Mugesera yatangiye kurondora abatangabuhamya umwe ku wundi n’icyo amunenga, Ubushinjacyaha bugasaba kenshi ko yavuga ku bo urukiko rwashingiyeho rumuhamya ibyaha kuko hari n’ubuhamya Urukiko Rukuru rwatesheje agaciro ariko we akazamura impapuro yateguriyeho urubanza ati “dore nabiteguye.”

Ngo yagiraga ngo agende yerekana uko ikinyoma cyamucuzweho agendeye ku buhamya bwa buri wese. Abatangabuhamya yabagabanyije mu byiciro bitatu birimo abatangabuhamya b’inzobere (témoins experts), abatangabuhamya bari hagati (témoin cité) n’abatangabuhamya basanzwe (témoins ordinaires).

Yavuze ko abatangabuhamya bose bavuze ibyahimbwe bakabyigishwa ko nta kuri kurimo. Mugesera yakomeje gushimangira ko nta muntu wishwe kubera ibyo yavuze ndetse ko isura ye yahindanyijwe cyakora yizeye ko azava imbere y’Urukiko rw’Ubujurire ruyigaruye.

Ati "Iki kintu kigomba kumvaho nizeye ko nzava imbere yanyu gihanaguritse."

Mu cyiciro cy’abatangabuhamya basanzwe yavuze ko benshi babikoreshejwe n’amafaranga basezeranyijwe, kugabanyirizwa ibihano cyangwa gufungurwa.

Mugesera yumvikanishaga ko bitabaho bitanashoboka ko yasaba umuntu kwica undi. Yagiye avuga ko ibyo abantu bagiye bakora bikitirirwa ijambo yavuze bitamwitirirwa kuko icyaha ari gatozi ko atashyirwaho ibibi byakozwe n’ibirura n’amabandi.

Ati “Ubwo ni ukugira ngo Abatutsi banyange ahubwo abantu bahimba ibi bitonde Abatutsi bazabavumbura si abantu batazi icyatsi n’ururo.”

Uko Mugesera yavugaga ku mutangabuhamya niko yavugaga ko ashaka kugaragaza uko ababutanze banyujijwe mu cyo yitaga ’uruganda rucura ibinyoma’. Ubushinjacyaha bwamusabye kwirinda iryo jambo kuko ari imvugo idakwiye gukoreshwa mu rubanza.

Mugesera yavuze ko agiye guhindura agakoresha imvugo zigaragara mu mategeko zirimo ‘agatsiko k’abagizi ba nabi’ ariko urukiko rumusaba ko habaho ikinyabupfura.

-  Mugesera ntiyigeze yangirwa gutanga abamushinjura

Urukiko rwafashe iminota 25 yo kwiherera. Nyuma yo kwiherera urubanza rwakomeje. Urukiko rw’ubujurire rwibukije Dr Mugesera ibikubiye mu byo yavuze birimo gusubizwa muri Canada, [Yabisabye ashingiye ku bikubiye mu rubanza rwa Bernard Munyagishari] abatangabuhamya bamubeshyeye ibyo bavuze nta kuri kurimo, no kuba yavuze ko ntawapfuye kubera ijambo yavuze.

Mugesera yongeye guhabwa umwanya, akomeza agaragaza ishingiro ry’ibinyoma biri mu buhamya bwamutanzeho, anavangamo ingingo zibivuguruza yerekana ko Mugesera wa nyawe yahindanyijwe akabeshyerwa.

Mugesera yavuze ko nta na rimwe ijambo yavugiye ku Kabaya ryigeze rihita kuri Radiyo Rwanda hagati ya 1991-1994 ngo ibyo byagaragajwe na Jean Marie Higiro.

Yasabye ko yakohererwa muri Canada kuko hari ibitarubahirijwe nyuma yuko yoherejwe kuburanishirizwa mu Rwanda. Yifashishije urubanza rwa Bernard Munyagishari mu gika cya 92 icya 102, 111, 134 n’icya 138 yerekanye ko hari bitarubahirijwe byo kumva abatangabuhamya b’impande zombi bityo ko nkuko yagombaga gusubizwa iya Arusha iyo bitubahirizwa, bakaba bari mu cyiciro kimwe [abanyabyaha boherezwa mu bindi bihugu] yasubizwa muri Canada kuko bitubahirijwe.

Ku wa 27 Mutarama 2012 nibwo Mugesera yuriye indege idasanzwe imugeza ku Kibuga cy’Indege Mpuzamahanga cya Kigali i Kanombe nyuma y’amasaha 30 y’urugendo avuye muri Canada.

Urukiko rw’Ubujurire rwabajije Umwunganizi wa Mugesera, Me Rudakemwa niba hari icyo yakongeraho avuga ko ntacyo yakongera ku byo umukiliya we yavuze. Mugesera yasabye ko yahanagurwaho ibyaha.

Ubushinjacyaha bwavuze ko ibyo Mugesera avuga nta shingiro bifite kuko urubanza rutigeze rupfundikirwa huti huti.

Ubushinjacyaha bwavuze ko ikibazo cyo kumva abatangabuhamya ba Mugesera atari bwo kivuzwe kuko cyavuzwe urubanza rugitangira mu mizi mu Rukiko Rukuru ku wa 30 Kamena 2014 urubanza rumaze igihe kirenga umwaka.

Urukiko rwashimangiye ko afite uburenganzira bwo kuzana abamushinjura igihe cyose rutarapfundikirwa ariko ko bitahagarika urubanza. Gusa ngo ntiyigeze abyubahiriza.

Rimwe ngo yigeze gutanga urutonde ariko ntiyubahiriza ibyasabwe [imyirondoro, ibyo bazaza kubwira urukiko n’aho babarizwa]. Ku wa 14 Mutarama 2015 urukiko rwemeje ko atigeze yubahiriza ibisabwa.

Mugesera yasubije ko urubanza rwapfundikiwe atunganiwe kandi ni ikosa rikomeye mu mategeko kandi binyuranyije n’Itegeko Nshinga. Aha akaba yaravukijwe uburenganzira bwo kugira icyo avuga ku byo yasabiwe n’Ubushinjacyaha.

Urukiko rw’Ubujurire rwanzuye iburanisha ruvuga ko iyo ngingo azayiheraho ku wa Gatatu tariki 24 Kamena 2020 saa tatu za mu gitondo.

Mu iburanisha ryabanje ku wa 19 Kamena Mugesera yasobanuye ingingo ashingiraho ajurira, avuga ko mu nyandiko y’icarubanza ryo ku wa 15 Mata 2016, hari amagambo yakoreshejwemo, ugasanga interuro yanditse igice kandi ngo kuyandika uko yakabaye byari gutanga ikindi gisobanuro, cyashoboraga kuganisha ku wundi mwanzuro. Ni ibyo yise charcuterie.

Dr Léon Mugesera yasabye guhanagurwaho ibyaha no koherezwa muri Canada kuko ngo hari ibitarubahirijwe mu bikubiye mu iyoherezwa rye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .