Dr. Asiimwe yabwiye ababyeyi uburyo bwo kwirinda igwingira ry’abana

Yanditswe na Hakizimana Jean Paul
Kuya 10 Ukwakira 2018 saa 11:45
Yasuwe :
0 0

Ababyeyi basabwe gukurikirana ubuzima bw’umwana kuva agisamwa no kwita kuri gahunda y’ingo mbonezamikurire, kuko ari bimwe mu byabafasha kwirinda igwingira ry’abana.

Umuhuzabikorwa wa Porogaramu y’Igihugu Mbonezamikurire y’abana bato, Dr. Anita Asiimwe, yabwiye ababyeyi bo mu Karere ka Rwamagana ko uturima tw’igikoni ari indi politiki nziza yabafasha kwirinda no kurwanya imirire mibi cyane cyane mu bana bakiri bato.

Kuri uyu wa Kabiri, Dr Asiimwe yasuye Akarere ka Rwamagana, atemberezwa mu turima tw’igikoni two mu mirenge ya Kigabiro na Munyiginya, twifashishwa mu kurwanya imirire mibi n’igwingira ry’abana muri aka karere.

Yasabye ababyeyi gushyira hamwe mu kurwanya imirire mibi no kwitabira gahunda y’ingo mbonezamikurire kuko byafasha abana babo.

Ati “Mukoze ingo mbonezamikurire byabafasha kurushaho kurwanya igwingira ry’abana banyu bikanabafasha kurwanya imirire mibi kuri bagenzi banyu”.

Yakomeje agira ati “Mushyize hamwe mukajya muhugurana mukegera n’ubuyobozi bukabafasha, ntabwo ikibazo cy’imirire mibi cyakongera kugaragara muri aka karere”.

Dr. Asiimwe kandi asaba ababyeyi gukurikirana ubuzima bw’umwana kuva bakimusama kuko bimurinda kugwingira. Ibi bazabikora bajya kwa muganga hakiri kare ngo bamenye ko basamye ndetse bagakomeza kwisuzumisha kugira ngo ubuzima bw’umwana n’umubyeyi bukurikiranwe.

Hari kandi kwita ku mfashabere baha abana babo kuko nazo zigira uruhare mu mikurire y’umwana, zitatangwa neza zikamutera kugwingira.

Igenzura riheruka gukorwa muri Rwamagana rigaragaza ko abana bafite ikibazo cy’imirire mibi ari 237 mu gihe umwaka ushize bari 668.

Musabyemariya Odette, umujyanama w’ubuzima mu Murenge wa Munyiginya, yabwiye IGIHE ko bagifite imbogamizi y’imyumvire y’ababyeyi bamwe na bamwe batari bumva akamaro k’indyo yuzuye.

Ati “Hari ababyeyi bamwe na bamwe batarumva akamaro k’indyo yuzuye baza hano tugateka bareba ariko bikarangirira hano bagera mu rugo ntibakomeze za nama twabahaye abo nibo usanga bagifite abana bafite ikibazo cy’imirire mibi”.

Uwiringiyimana Hoziana utuye mu Murenge wa Kigabiro yabwiye IGIHE ko igikoni cy’umudugudu ari indi gahunda nziza kuko yatumye amenya guha abana be indyo yuzuye irimo; ibitera imbaraga, ibyubaka umubiri n’ibirinda indwara.

Dr Anita Asiimwe agaburira abana indyo yuzuye
Dr. Anita Asiimwe, yabwiye ababyeyi bo mu Karere ka Rwamagana ko uturima tw’igikoni ari indi politiki nziza yabafasha kwirinda no kurwanya imirire mibi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza