COVID-19: Abaturage 395 binjiriye ku mipaka yo mu Ntara y’Iburasirazuba bari mu kato

Yanditswe na Hakizimana Jean Paul
Kuya 2 Mata 2020 saa 09:06
Yasuwe :
0 0

Abaturage 395 binjiriye ku mipaka yo mu Ntara y’Iburasirazuba bari mu kato k’iminsi 14 kuri site zirindwi zashyizweho mu rwego rwo kwirinda ikwirakwira ry’icyorezo cya COVID-19 giterwa na Coronavirus.

Ni icyemezo cyafashwe nyuma yuko mu Rwanda hagaragaye umuntu wa mbere wagaragaje ibimenyetso byo kwandura COVID-19 tariki ya 14 Werurwe 2020.

Intara y’Iburasirazuba ikora ku bihugu birimo Uganda, Tanzania n’u Burundi.

Guverineri w’Intara y’Iburasirazuba Mufulukye Fred, yabwiye IGIHE ko aba bantu 395 bameze neza kuri site zirindwi bakiriweho.

Yagize ati “Tugejeje abantu 395, iyo baje bafatwa ibipimo by’ibanze ubundi bagashyirwa mu kato k’iminsi 14 bagacumbikirwa, bakagaburirwa ndetse bakanahabwa n’ibindi bintu by’ibanze bikenewe.”

Mufulukye yakomeje avuga hari ikipe y’abaganga ishinzwe kubakurikirana kugira ngo barebe uko ubuzima bwaho buhagaze.

Ati “ Kugeza ubu nta muntu n’umwe uragaragarwaho ibimenyetso byo kwandura iki cyorezo, ubu bose bameze neza.”

Yavuze ko kuva batangiye gushyira mu kato abaturage binjiye mu Rwanda baciye ku mipaka ihana imbibi n’iyi ntara nta muturage urasoza akato k’iminsi 14, ngo uzayisoza hazaganirwa ku kuntu yagezwa mu muryango we.

Akarere ka Kirehe niko kamaze kwakira umubare mwinshi w’abantu baturutse hanze y’igihugu aho bamaze kwakira abanyarwanda 185 bahurijwe kuri site eshatu, Nyagatare ikagira 108 bahurijwe kuri site ebyiri, Kayonza ikagira 59 naho Akarere ka Ngoma kakagira 43 bahurijwe kuri site ebyiri.

Kugeza ubu umubare w’abamaze kugaragarerwaho Coronavirus mu Rwanda ni 82 .

Inama y’Abaminisitiri idasanzwe yqyobowe na Perezida Paul Kagame kuri uyu wa 1 Mata 2020 yanzuye ko igihe cyo gufunga ibikorwa bitandukanye n’imipaka y’igihugu cyongerwaho iminsi 15 mu gukomeza kwirinda ikwirakwira rya Coronavirus.

Abanyarwanda basabwa gukomeza kugira uruhare mu iyubahirizwa ry’amabwiriza agamije gukumira COVID-19 yakomeza gukwirakwira hose. Muri yo harimo kuguma mu rugo, gusiga intambwe ndende hagati yawe n’abandi, gukaraba intoki neza kandi kenshi, kwitabaza ubuyobozi igihe ugaragaje ibimenyetso by’uburwayi cyangwa ugahamagara 114.

Abaturage basaga 390 mu Ntara y'Iburasirazuba bari mu kato kugira ngo hirindwe coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .