00:00:00 IGIHE NETWORK KN KINYARWANDA EN ENGLISH FR FRANCAIS

Covid-19: Abantu 24 bafatanywe n’umusore wabatumiye mu birori ngo abereke umukunzi

Yanditswe na Claude Bazatsinda
Kuya 14 Kamena 2021 saa 03:02
Yasuwe :
0 0

Polisi y’igihugu ikorera mu Karere ka Musanze, yafashe abantu 24 bari mu birori barenze ku mabwiriza yo kwirinda Covid-19, ubwo banywaga ibinyobwa byiganjemo ibisembuye.

Abo bantu bose bafashwe, bari bitabiriye ubutumire bw’umusore washakaga kubereka umukobwa bendaga kurushingana.Bageze mu resitora barizihirwa bararya, baranywa, barenga ku mabwiriza yo kwirinda Covid-19 ari bwo bafatwaga na Polisi ihawe amakuru n’abaturage ko hari abantu bashobora kuba bari mu birori bitemewe.

Umuhuzabikorwa bya Polisi n’abaturage mu Ntara y’Amajyaruguru, CIP Alex Ndayisenga, yasabye abaturage kutirara na gato kuko Covid-19 igihari kandi uko kwirara biyiha icyuho cyo gukomeza gukwirakwira muri benshi.

Yagize ati"Polisi irasaba abaturage gukomeza kwirinda Covid-19 bubahiriza amabwiriza kuko igihari kandi uko birara ni ko bayiha icyuho no kwanduzanya hagati yabo. Polisi iributsa ko ubusabane n’ibirori bibera mu ngo bibujijwe.”

Abafashwe bose uko ari 24 bahise bajyanwa kuri Sitasiyo ya Polisi ya Muhoza ngo bigishwe banacibwe amande yagenwe n’Inama Njyanama ariko bazarekurwa ari uko bamaze gupimwa Covid-19.

Umuyobozi w’Akarere ka Musanze Nuwumuremyi Jeannine asaba abaturage gukomeza kwirinda kuko Covid-19 ihari kandi yandura igahitana n’ubuzima bwa bamwe kandi ko bazakomeza kugenzura no guhana abarenga nkana kuri ayo mabwiriza.

Yagize ati"Nibyo muri iyi minsi turagenda tubona imibare y’abandura yiyongera ariko ubona ko bituruka ku bantu bari kudohoka ku mabwiriza yo kwirinda Covid-19.Tumaze igihe kirenga umwaka duhanganye n’iki cyorezo kandi kiracyahari, tuzakomeza gukurikirana ishyirwa mu bikorwa ryayo n’abayarengaho bahanwe nk’uko byemejwe n’Inama Njyanama y’Akarere"

Akarere ka Musanze ni kamwe mu tumaze iminsi tugaragaza izamuka rikabije ry’imibare y’abandura Covid-19 kuko kuva uku kwezi kwa gatandatu kwatangira hamaze kwandura abantu 80 mu gihe 78 banduye muri iki cyumweru gishize gusa bigaragara ku muri icyo cyumweru handuaraga abarenga 11 ku munsi.

Bamwe mu bafashwe bari mu birori barenze ku mabwiriza yo kwirinda Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .