Coronavirus: Abanyarwanda babiri bamaze iminsi ine batemerewe kuva ku kibuga cy’indege muri Kenya

Yanditswe na IGIHE
Kuya 26 Werurwe 2020 saa 12:37
Yasuwe :
0 0

Abanyarwanda babiri bagiye kumara iminsi itandatu ku Kibuga cy’Indege muri Kenya nyuma y’uko babuze uko basohoka, bagafatwa n’ingamba zikomeye zashyizweho z’uko umuntu wese ugeze muri iki gihugu ahita ajya mu kato.

Kalisa Amin Shalif ni umwe mu banyarwanda babiri bamaze iminsi ku kibuga cy’indege muri Kenya, aho bari kumwe n’abandi baturage bo mu bihugu bitandukanye, bose hamwe bagera kuri 61.

Birirwa ku kibuga cy’indege, niho barara hasi kuko batemerewe gusohoka. Ubu Urwego rushinzwe abinjira n’abasohoka muri Kenya, rwafatiriye passport z’abo bose kugira ngo batagenda.

Ati “Twagumye ku kibuga cy’indege, dusaba Urwego rushinzwe abinjira n’abasohoka ko nibura batwemerera ko twasohoka tukajya muri hotel tugategereza igihe Ikibuga cy’indege mu Rwanda kizafungurwa ariko baratwangira, tuba tugumye mu kibuga gutyo.”

Kalisa yabwiye IGIHE ko we na mugenzi we bari baturutse i Harare muri Zimbabwe, ubu basabwa kwishyura amadolari arenga 1200 y’iminsi bazamara mu kato.

Ati “Barimo baravuga ngo baradufata batujyane muri hotel, umunsi umwe ngo tuzajya twishyura amadolari 90 turi mu kato. Ni ikibazo gikomeye, binabaye ngombwa bakatureka twe twajya muri ako kato ariko kwishyura ayo madolari 90 ku munsi ni menshi.”

Ambasaderi w’u Rwanda muri Kenya, Robert Masozera, yabwiye IGIHE ikibazo cy’aba banyarwanda bakizi, ndetse bagerageje no kubashakira uko bafashwa ariko birananirana.

Ati “Amabwiriza ni uko umuntu wese uvuye ahantu hose hagaragaye Coronavirus ahita ashyirwa mu kato. Abo babona ko batizeye ko bari buze kubahiriza amabwiriza, babamburaga passport. Twabwiye Urwego rushinzwe abinjira n’abasohoka muri Kenya ko turi kubashakira inzira yindi bacamo, baravuga ngo amabwiriza ni uko abiteganya, ko abantu bose n’abanyakenya niko biri kugenda, kujya mu kato.”

Ambasaderi Masozera yavuze ko kubera uburemere bw’iki cyorezo, ingamba zakajijwe mu buryo bukomeye ku buryo hari n’abaturage b’abanya-Kenya bajyanwa mu kato binuba ko badafite ubushobozi bwo kwishyura hotel.

Ati “Muri make kujya mu kato ni itegeko kuri bose. Ni ibihe bigoye turabyemera, twagerageje kuvugana n’inzego za hano, ariko nta kindi twakora.”

Abantu 28 nibo bamaze kwandura Coronavirus muri Kenya mu gihe umwe ariwe umaze gukira.

Ku Kibuga cy'Indege muri Kenya hari abantu barenga 60 batemerewe kuhava mu gihe cyose hatagiye mu kato kubera Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .