Colonel Aloys Ntiwiragabo uri mu bashinze FDLR yagaragaye mu Bufaransa

Yanditswe na Rabbi Malo Umucunguzi
Kuya 24 Nyakanga 2020 saa 12:27
Yasuwe :
0 0

Ikinyamakuru Mediapart cyo mu Bufaransa, cyemeje ko cyabashije kugera kuri Colonel Aloys Ntiwiragabo uri mu basirikare bakuru bashinjwa uruhare muri Jenoside yakorewe Abatutsi mu 1994, akaba no mu batangije Umutwe w’Iterabwoba wa FDLR.

Uyu mugabo amaze igihe ashakishwa n’inkiko mpuzamahanga, amakuru amwe yavugaga ko yaba yihishe mu gihugu kimwe cya Afurika cyangwa akaba yarapfuye.

Gusa byaje kumenyekana ko aba mu Bufaransa mu Gace ka Orléans. Ni umugabo w’imyaka 72 umaze igihe yihishahisha, mu buryo bumwe na Kabuga Félicien wafatiwe mu Bufaransa ku wa 16 Gicurasi 2020, mu Gace ka Asnières-sur-Seine.

Bitandukanye na Kabuga, Ntiwiragabo ntabwo yabonetse agiye gutabwa muri yombi, ahubwo Ikinyamakuru Mediapart cyageze aho aherereye nyuma y’icukumbura ryari rimaze amezi arindwi, gikusanya amakuru kugira ngo cyemeze ko ari we nta gushidikanya.

Ngo habanje kugenzurwa ibyagiye bivugwa kuri uwo mugabo, amakuru y’ibanze aza kugusha ku mugore we witwa Catherine Nikuze wageze mu Bufaransa ku wa 3 Werurwe 1998, aza guhabwa ubuhungiro ku wa 22 Nzeri 1999.

Mu mwaka wakurikiyeho ngo yaje kubana n’abana be babiri mu Gace ka Orléans, aho yanatangiye kugira uruhare mu bikorwa bitandukanye by’abahezanguni. Nikuze yaje kubona ubwenegihugu mu 2005, ndetse yiyongeraho izina Tibot.

Ugeze ku nyubako babamo, izina Tibot niryo ryonyine ryanditswe mu kugaragaza ababamo aho, ariko ku gasanduku gashyirwamo ubutumwa bwabo, akagenewe uyu muryango kariho amazina atatu, Nikuze, Tibot na Ntiwiragabo. Babana mu igorofa ya kane ari nayo ya nyuma muri iyo nzu.

Kuba yarabaye umuntu ukomeye mu butasi, byatumye ahantu aba yitwararika cyane ku buryo nta muntu ushobora gupfa kumutahura. Abakozi ba Mediapart ngo bamugenzuye inshuro esheshatu hagati y’Ukuboza 2019 na Werurwe 2020, buri gihe bakihinduranya ku buryo nta muntu ushobora kubakeka.

Uyu mugabo ngo baje kumubona muri Gashyantare 2020 ari mu gitondo agiye mu misa, ikintu ngo aba bahunze ubutabera biyita ’’Abacunguzi’’ badashobora gusiba.

Ngo yasohotse yambaye umupira ufunga mu ijosi n’ikoti ry’umukara akoze mu mifuka, yambaye n’amadarubindi. Umugore we Catherine Nikuze ngo yari amuri inyuma, bamufata amashusho rwihishwa kugira ngo bagenzure neza uwo babonye.

Richard Mugenzi wayobowe na Ntiwiragabo mu gisirikare, amaze kwerekwa ayo mashusho yagize ati “Isura ye yarahindutse kubera imyaka. Ariko ndamwibuka.”

Undi muntu wakoze mu nzego z’iperereza yemeje ko uwo ari Ntiwiragabo, amakuru ngo yaje gushimangirwa n’inzego z’iperereza mu Rwanda.

Ni gute yabashije kwihisha icyo gihe cyose?

Uyu mugabo wabaga muri XIVe arrondissement de Paris, ntabwo yakundaga kugira ikimenyetso asiga inyuma cyatuma hagira urabukwa ahantu aherereye.

Ku wa 10 Nyakanga 2020, Aloys Ntiwiragabo yinjiye mu biro by’iposita muri Orléans agiye kwakira ibaruwa yari yohererejwe mu mazina ye bwite. Mediapart yabashije kubigenzura, isanga koko uwo igenewe yarakiriye ndetse arabisinyira.

Ubwo ngo bageragezaga kumuvugisha ngo bamenye neza niba ari we, muri Werurwe, umuntu witabye telefoni ngo ntabwo yemeje niba Aloys Ntiwiragabo ahari. Nyuma ngo ntabwo yongeye kubitaba. Baje kubaza umwavoka we nawe ntiyabasubiza.

Uyu mugabo ngo ntabwo akigaragara ku rutonde rw’abantu bashakishwa, kuko nyuma y’amaperereza y’urudaca yakozwe, abagenzacyaha babaye nk’ababihagaritse ahagana mu myaka ya 2000.

Ni umugabo ngo ushobora kuba yari abayeho yumva ko atekanye, kuko u Bufaransa ntacyo bwakoze gifatika ngo bushyire iherezo ku kwihisha kwe, kandi harabayeho amahirwe menshi yo kubigeraho.

Ntiwiragabo ntiyarakunze kugarukwaho cyane mu binyamakuru byo mu Bufaransa, nyamara yari mu itsinda ryamenyekanye nk’Akazu, kari kagizwe n’abantu bagize uruhare rukomeye mu gucura umugambi wa Jenoside no kuwushyira mu bikorwa.

Muri Kamena 1993 Ntiwiragabo yagizwe Umuyobozi ushizwe Iperereza rya Gisirikare (G2) aza no kuba Umugaba Mukuru wungirije w’Ingabo z’u Rwanda.

Mugenzi wabaga muri G2 avuga ko urwo rwego rwagize uruhare mu gukora intonde z’abantu bafatwaga nk’abanzi b’igihugu, barimo Abatutsi babaga mu gihugu no hanze, kimwe n’abandi batari bashyigikiye ibitekerezo by’ubutegetsi bwariho.

Muri Jenoside ngo G2 yagiraga uruhare mu guhimba no gukwirakwiza amakuru atari yo yashinjaga ibyaha uwo bari bahanganye, bagakangurira abantu kwica abo bitaga ibyitso bya FPR. Mu bagize uruhare mu gusakaza ayo makuru harimo radio RTLM, yari ikuriwe na Kabuga nka Perezida wayo.

Umuryango African Rights wo unavuga ko Aloys Ntiwiragabo yatanze itegeko ryo kwica abofisiye batemeraga gufatanya n’abajenosideri. Ngo yaje no guhagarikira ibikorwa by’iyicarubozo, gufata ku ngufu no kwica Abatutsi.

Mu nyandiko itanga ikirego mu rubanza rwafashwe nk’urw’abasirikare mu Rukiko Mpuzamahanga rwarashyiriweho u Rwanda, TPIR, umushinjacyaha yavuze ko Ntiwiragabo yari mu bantu 11 ”guhera mu 1990 kugeza muri Nyakanga 1994 bafatanyaga mu mugambi wo gutsemba Abatutsi no gukuraho abanyapolitiki batari babashyigikiye no kugumana ubutegetsi. Bateguye, bategeka gukora ndetse bagira uruhare mu bwicanyi.”

Muri abo bantu uko ari 11, TPIR yaje guhamya ibyaha abantu batanu, batatu bagirwa abere, hasigara batatu bari batarafatwa barimo Ntiwiragabo.

Mbere yo kujya mu Bufaransa, ngo yahunganye n’abandi bari bamaze kumeneshwa n’ingabo zari iza FPR Inkotanyi, bahungira muri Zaïre. Yaje gukomereza muri Kenya.

Ku wa 18 Nyakanga 1997 muri Kenya hateguwe operation ikomeye yo gufata abagize uruhare muri Jenoside bari bihishe muri icyo gihugu yiswe ’Operation NAKI’. Ntiwiragabo ni umwe mu bayinyuze mu myanya y’intoki, akomereza mu Majyepfo ya Sudan.

Ubwo Intambara ya Kabiri ya Congo yatangiraga mu 1998, abajenosideri baje kwifatanya n’ubutegetsi bushya ndetse batangira kugaba ibitero. Ntiwiragabo yaje kuba umuyobozi wabo, baza kuba FDLR ari nabwo yaje kwigira Général-major.

FDLR yaje gushaka kwiyoberanya, ivanaho abayobozi bashinjwaga Jenoside mu buryo bweruye, hashyirwaho abari bafite ibyaha bisaba gucukumbura ngo ubone uruhare rwabo.

Ntiwiragabo yaje kuva muri Kinshasa asubira muri Sudan, aza gukomereza mu Bufaransa aho yari afite abantu benshi baziranye. Mu gihe yashakwaga na TPIR mu 2001, inshuro ebyiri yagerageje gushaka viza yo kujya mu Bufaransa.

Yahereye ku biro by’uhagarariye u Bufaransa i Khartoum, aza no kujya i Niamey muri Niger. Muri icyo gihe yagombaga kwimwa viza ahubwo agahita atabwa muri yombi n’inzego zibishinzwe muri ibyo bihugu byombi. Nyamara ngo ntibyakozwe.

Icyo gihe Minisitiri w’Ububanyi n’Amahanga w’u Bufaransa yari Hubert Védrine. Mu gihe cya jenoside yari Umunyamabanga Mukuru wa Élysée.

Ubwo yabazwaga na Mediapart impamvu bitagenze bityo, yagize ati "Ndabaretse. Nzi aho Mediapart ihagaze ku bireba u Rwanda, bityo nta kibazo na kimwe ndi busubize kandi ntabwo mbyinjiramo cyane.”

Bruguière yaba yaramuhesheje Visa

Visa Ntiwiragabo ngo yamaze imyaka icumi atarayibona. Nyuma y’amezi abiri ubwo mu 2001 yari amaze kuyisaba, Umucamanza w’Umufaransa Jean-Louis Bruguière yaje guhura na we i Kinshasa ngo atange ubuhamya mu iperereza ku ihanurwa ry’indege ya Perezida Habyarimana ryo ku wa 6 Mata 1994.

Nyuma y’imyaka itatu Bruguière yaje gukomereza iperereza ku bayobozi b’u Rwanda aza no gusaba ko bafatwa, ariko nyuma biza kujya ahabona ko ibyemezo uyu mucamanza yafashe byagizwemo uruhare n’ubuhamya bwatanzwe n’abajenosideri n’abari abarwanyi ba FDLR.

Mu bushakashatsi iki kinyamakuru cyakoze, ngo ntabwo cyabashije kumenya igihe Ntiwiragabo yagereye ku butaka bw’u Bufaransa n’uko byagenze.

Nyamara Général-major Ntiwiragabo ngo ntabwo yigeze yihisha cyane, kuko mu mwaka wa 2018 yasohoye igitabo aho agaragaza amwe mu mateka uko abyumva, aho nta jambo Jenoside akoreshamo.

Muri Gashyantare 2019 yanagaragaje uguhakana ubwo hajyaga ahabona inyandiko y’Ubuyobozi Bukuru bw’Urwego Rushinzwe Iperereza ryo mu Mahanga, DGSE, ivuga ko indege ya Habyarimana yahanuwe n’intagondwa z’Abahutu, icyo gihe akoresha urubuga rwa internet rw’abahezanguni bigaragara ko rukorera mu Bufaransa.

Mu kumenya niba dosiye ya Aloys Ntiwiragabo yaba ikurikiranwa n’Ishami ry’Ubushinjacyaha rishinzwe kurwanya Iterabwoba, rinareba ku byaha byibasiye inyokomuntu, nta gisubizo bwatanze.

Umwe mu bayobozi b’Impuzamiryango iharanira ko abagize uruhare muri Jenoside yakorewe Abatutsi mu 1994 bagezwa imbere y’ubutabera, Dafroza Gauthier, yavuze bisa n’aho hari abantu mu Bufaransa bari inyuma yo kuba hari abakekwaho ibyaha bibera mu Bufaransa ntawe urabutswe.

Yakomeje ati “Ni iki inzego zibishinzwe zigiye gukora nyuma yo kumenya ibi? Twizere ko ziza gukora akazi kazo maze zikamuta muri yombi kugira ngo agezwe imbere y’ubutabera.”

Colonel Aloys Ntiwiragabo uri mu bashinze FDLR yagaragaye mu Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .