00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yashimiye abarimo inzego z’umutekano ku migendekere myiza ya CHOGM

Yanditswe na Iradukunda Serge
Kuya 26 June 2022 saa 12:24
Yasuwe :

Perezida Paul Kagame yashimye inzego zitandukanye zirimo n’iz’umutekano zakoze akazi gakomeye kugira ngo Inama y’Abakuru b’Ibihugu na za Guverinoma zo muri Commonwealth (CHOGM) yaberaga i Kigali igende neza.

Kuwa Gatandatu tariki 25 Kamena 2022 nibwo hasojwe Inama ya CHOGM ndetse n’izindi ziyishamikiyeho zari zimaze icyumweru zibera i Kigali.

Ni inama yitabiriwe n’abarenga ibihumbi 4000 baturutse hirya no hino ku Isi, barimo abacuruzi, abashakashatsi n’abarimu muri Kaminuza, urubyiruko ndetse n’Abakuru b’Ibihugu na za Guverinoma.

Iyi nama kandi yasize u Rwanda ruhererekanyije n’u Bwongereza ububashaka bwo kuyobora Commonwealth nk’uko bigenda no ku kindi gihugu cyose cyakiriye CHOGM.

Mu butumwa Perezida Kagame yanyujije kuri Twitter, yashimiye abitabiriye iyi nama, yemeza ko ari ishema kuba u Rwanda rwarakiriye Abakuru b’Ibihugu na za Guverinoma.

Ati “Ndashimira abantu 4000 twabanye muri #CHOGM2022. Ku bayobozi bagenzi banjye, byari iby’agaciro kubakira mwese mu Rwanda ndetse no kongera gushimangira intego dusangiye yo guharanira kugeza abaturage b’umuryango wa Commonwealth ku hazaza harangwa n’uburumbuke ndetse no kwihesha agaciro. Mwese turabifuriza urugendo ruhire no kugera mu rugo amahoro.”

Yakomeje ashima inzego zose zabigizemo uruhare ngo CHOGM igende neza.

Ati “Ndashimira abayiteguye bose, inzego z’umutekano zarinze buri wese, abakozi bari ahabereye ibikorwa bose ndetse n’Abanyarwanda bagize uruhare mu migendekere myiza ya #CHOGM2022! Mwarakoze cyane guhesha ishema igihugu.”

Iyi nama ya CHOGM yasojwe n’Umwiherero w’Abakuru b’Ibihugu byari byitabiriye. Iyi nama ya CHOGM yafatiwemo imyanzuro itandukanye irimo no kongerera manda Umunyamabanga Mukuru wa Commonwealth, Patricia Scotland.

Manda y’Umunyamabanga Mukuru wa Commonwealth ubusanzwe imara imyaka ine. Iya Scotland yagombaga kurangira mu 2020 gusa amatora ntiyabayeho ahubwo abakuru b’ibihugu bafashe umwanzuro wo kumwongerera manda kugeza igihe inama izabera.

Inama y’i Kigali yanzuye ko manda ya Scotland yongerwaho imyaka ibiri kugira ngo yuzuze ine. Yari ahanganye n’umukandida watanzwe na Jamaica, Kamina Johnson Smith.

Nta butaha butagezwe intorezo

Mbere y’uko iyi nama iba u Rwanda rwahuye n’ibibazo bitandukanye mu by’umutekano birimo ibisasu byatewe n’Ingabo za Repubulika Iharanira Demokarasi ya Congo ku butaka bw’u Rwanda ubugira gatatu.

Mbere y’iminsi itatu ngo CHOGM itangire, kuwa 17 Kamena 2022, ku Mupaka wa Goma kandi harasiwe umusirikare wa FARDC, ni nyuma y’uko yari yinjiye ku butaka bw’u Rwanda ndetse agatangira kurasa abapolisi b’u Rwanda barinda umutekano ku mupaka.

Ubu bushotoranyi bw’uyu musirikare bwaje bukurikira imyigaragambyo y’abaturage bo muri Repubulika Iharanira Demokarasi ya Congo yari imaze iminsi bamagana u Rwanda kuko barushinja gushyigikira umutwe wa M23.

Muri iyi myigaragambyo no ku mbuga nkoranyambaga hari n’abaturage bagaragaza ko batumva uburyo u Rwanda ruhabwa kwakira iyi nama hejuru y’ibi birego bitandukanye rushinjwa.

U Rwanda rwakiriye CHOGM rutari mu bibazo bya Congo gusa kuko no ku gicamunsi cyo ku wa Gatandatu, tariki ya 18 Kamena 2022, ahagana saa Munani, abagizi ba nabi bitwaje imbunda bikekwa ko ari abo mu mutwe wa FLN baturutse hakurya y’umupaka, barashe ku modoka itwara abagenzi mu Murenge wa Kitabi mu Karere ka Nyamagabe. Yerekezaga mu Karere ka Rusizi.

Abo bagizi ba nabi bishe umushoferi n’umugenzi, banakomeretsa abandi batandatu.

Abasesenguzi bemeza ko ibi bibibazo mu by’umutekano wari umukoro ukomeye ku nzego z’umutekano z’u Rwanda rwiteguraga kwakira abashyitsi bakomeye.

Perezida Kagame yashimiye abashyitsi bari bamaze iminsi mu Rwanda muri CHOGM

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .