00:00:00 IGIHE NETWORK KN KINYARWANDA EN ENGLISH FR FRANCAIS

Byageze n’aho Perezida Kagame abyibonera: Ibibazo mu midugudu y’icyitegererezo byabaye agatereranzamba

Yanditswe na Prudence Kwizera
Kuya 29 August 2022 saa 04:47
Yasuwe :

Imidugudu y’icyitegererezo yubatswe hirya no hino ituzwamo abaturage bari basanzwe batuye mu manegeka, irimo ibibazo bitandukanye bibangamiye imibereho y’abaturage ku buryo bikeneye ingufu kugira ngo bikemurwe.

Ibyo bibazo birimo inzara kuko bamwe nta masambu yo guhinga bagira cyangwa ikindi kibatunga; umwanda uturuka ku miyoboro yo mu bwiherero yakozwe nabi; kutagira ibicanwa; imiyoboro yo mu gikoni yakozwe nabi igatuma imyotsi iguma mu nzu; kutagira amazi mu mudugudu; inzu zidafatwa neza n’ibindi.

Byigeze guhagurutsa itsinda ry’Abasenateri bagize Komisiyo idasanzwe basura imidugudu itandukanye hirya no hino mu gihugu bareba ibyo bibazo ndetse basuzuma n’icyaba igisubizo kirambye kuri byo.

Mu gihe cy’ukwezi kumwe bamaze, mu midugudu 36 y’icyitegererezo yasuwe igera kuri 23 ni yo ifite amazi mu gihe mu isanzwe 31 igera kuri 19 ari yo iyafite.

Amashyanyarazi na yo basanze ataragezwa mu midugudu yose kuko mu yasuwe, muri 31 isanzwe igera kuri irindwi ntigira amashyanyarazi mu gihe mu y’icyitegererezo 36 umwe ari wo utayagira.

Hari n’ikibazo cy’abana bavuye mu ishuri kuko hari umudugudu umwe basanzemo abana 40 bataye ishuri; ubworozi bw’inkoko butagenda neza; inka zabuze ubwatsi n’ibindi.

Ibyo bibazo by’imibereho bituma abaturage batujwe muri iyo midugudu babaho nabi kuko usanga barya ari uko bavuye guca inshuro kandi mbere barasaruraga mu mirima yabo.

Umwe mu baturage batuye mu mudugudu w’icyitegererezo wa mu Rugabano mu Karere ka Karongi, yabwiye IGIHE ko bamwe bagowe n’ubuzima kuko kubona ibyo kurya bitaborohera.

Yavuze ko mu kubimura bahawe inzu zo kubamo n’amafaranga y’ingurane, bamwe bajya kugura ahandi ho guhinga.

Gusa ngo bahawe amafaranga make kuko metero kare imwe bari bayibariye 300 Frw nyuma barayamanura bashyira kuri 92 Frw bibagiraho ingaruka mbi.

Ati “Byatumye abari bafite amasambu mato bajya kugura ahandi barabubura bituma abapfira ubusa”.

Yagaragaje ko hari abakecuru badafite urubyiruko rujya gukora mu cyayi ku buryo kubona ibyo kurya bibagora bakabaho batunzwe n’ibyo bafunguza ku baturanyi.

Yavuze ko hari abagiye babarurirwa ubutaka nabi cyangwa hakabamo amanyanga ku buryo hari nk’umuntu wari ufite hegitari ebyiri z’ubutaka akishyurwa imwe gusa.

Ati “Icyo ni ikibazo kidukomereye ku buryo tubonye abayobozi batwumva twakibagezaho bakadufasha kugikurikirana.”

Yavuze ko muri uwo mudugudu wa Rugabano hari igice gifite ubwiherero bwo mu nzu butagira amazi ku buryo haba umwanda ukabije.

Muri uwo mudugudu hari abahawe inkoko n’ingurube zororewe hamwe ariko nta musaruro mwiza zitanga kuko zititabwaho uko bikwiye.

Asanga bakwiye kwegerwa bagategwa amatwi, ibibazo bafite bagafashwa kubikemura noneho hakitabwa no ku mibereho ya buri wese hagendewe ku bushobozi bwe akabasha kwifasha.

Ati “Mbona hano hakenewe nk’itsinda ryita ku bibazo dufite noneho hakarebwa imibereho ya buri wese agafashwa kwifasha ariko bakwiye guhera ku gukemura bya bibazo by’amanyanga yabayeho mu butaka.”

Byageze aho Perezida Kagame abyibonera

Ibibazo biri mu midugudu y’icyitegererezo bimaze igihe bivugwa ariko bamwe mu bayobozi b’inzego z’ibanze bakabyirengagiza ndetse bamwe bakavuga ko ntacyo babikoraho kuko bibarenze.

Mu ntangiriro za Nyakanga 2022 Minisitiri w’Ubutegetsi bw’Igihugu, Gatabazi Jean Marie Vianney, yemeye ko hagaragaye amakosa mu gukurikirana imidugudu y’icyitegererezo n’indi yatujwemo abaturage hirya no hino mu gihugu.

Mu ijambo yavugiye mu Karere ka Nyaruguru ku wa 4 Nyakanga 2022 ubwo hizihizwaga ku nshuro ya 28 Isabukuru yo Kwibohora kw’Abanyarwanda, yijeje Minisitiri w’Intebe Dr Ngirente Edouard, ko ayo makosa atazasubira.

Yagize ati “Turabizeza tudashidikanya ko ibyagaragaye nk’amakosa twatangiye kubifatira ingamba, ibibazo byatangiye kugaragara muri iyi midugudu, ku buryo tubizeza y’uko bizakemuka cyane cyane ko uturere twatangiye gushyiraho ingengo y’imari ifasha mu gukemura ibibazo bigaragara mu midugudu ndetse n’uburyo bwo gukurikirana abaturage batuye mu midugudu kugira ngo bakomeze kuba aheza kandi n’imishinga bahawe ikomeze gutera imbere.”

Umudugudu wa Rugabano muri Karongi ni umwe mu yagaragayemo ibibazo by'imibereho mu bawutujwemo

Yavuze kandi ko bazajya bafatanya n’abafatanyabikorwa barimo abikorera, ba rwiyemezamirimo, amadini n’amatorero, imiryango itari iya leta n’abandi kugira ngo bikorwe neza.

Ati “Turabizeza Nyakubahwa Minisitiri w’Intebe ko ibyatashywe n’ibindi bizatahwa mu gihe kiri imbere tuzakomeza kubisigasira.”

Perezida Kagame yanyuze ku Mudugudu w’Icyitegererezo wa Rugabano mu Karere ka Karongi ubwo yari agiye gusura Uruganda rw’Icyayi Rugabano ku Cyumweru tariki ya 28 Kanama 2022.

Mu ijambo rye yavuze ko yabonye ibibazo bitandukanye birimo ubukene n’imibereho mibi y’abatuye muri uwo mudugudu wubatswe mu 2017 utuzwamo imiryango 364.

Yagize ati “Hari aho nanyuze mu nzira nza, hari umudugudu wubatswe kandi umeze neza, harimo abantu. Ibi bikorwa, ari ibihera kuri iki cyayi cya Rugabano, ari uburyo bwakoreshejwe mu kubaka uriya mudugudu, byose bikorerwa abantu, bikorerwa Abanyarwanda batuye iki gihugu.”

“Mpanyuze, nabonye abantu bari muri uwo mudugudu, ijisho ryambwiye ko hari ikintu kibuze. Abantu bari muri uriya mudugudu, ukuntu nabonye bameze ntabwo ariko bakwiriye kuba bameze. Haragaragaramo ubukene, nabonye hatari isuku.”

Yasabye abayobozi mu Karere ka Karongi, Intara y’Uburengerazuba na Minisiteri y’ubutegetsi bw’Igihugu ndetse n’izindi nzego gufatanya bagakemura ibyo bibazo.

Ati “Ntabwo nifuza kubona Abanyarwanda bameze kuriya, abayobozi bo muri aka karere, muri iyi ntara n’abandi b’izindi nzego, ntabwo nshaka kubibona. Ndashaka kubona Abanyarwanda bafashwa, bagatera imbere, bakwiriye kuba bakeye, bafite isuku, bafite ibibatunga, bitunga umubiri wabo. Ibi byose ni cyo tubikorera kugira ngo umunyarwanda amererwe neza, agire ikimutunga, atera imbere ukabona aho avuye n’aho ageze.”

Umukuru w’Igihugu yavuze ko azasubira kureba niba imibereho y’abaturage bo mu Mudugudu wa Rugabano yarahindutse, asaba abayobozi kubyitaho. Ati “Kuva aha, aba bayobozi babishinzwe, muhere ko mubikurikirana vuba na bwangu.”

Abaturage bagomba gusigasira ibyo bahawe

Birumvikana ko mbere na mbere abaturage bahawe inzu mu midugudu bafite inshingazo yo kuzifata neza ariko n’ubuyobozi bugakomeza kubaba hafi.

Hari imwe mu midugudu ugeramo ugasanga abaturage batarahindura imyumvire kuko bumva ko inzu batuyemo atari izabo, ntibaziteho.

Minisitiri Gatabazi yijeje ko nabyo biri mu bizitabwaho kugira ngo ibyo bikorwa birambe.

Ati “Haba hari icyangiritse kuri ayo mazu nabo bakagisana, niba ari urugi rugize ikibazo serire ivuyeho niba ari ibati ripfumutse ntabwo ari ko buri gihe Leta izagaruka ngo ize kubisana.”

Yavuze ko mu gihe cy’imyaka ya mbere Leta izajya ibafasha gusana ibikorwa bimwe na bimwe birimo nk’amazi yagize ikibazo, amashanyarazi yapfuye n’ibindi mu buryo bwa rusange ariko yibutsa ko buri wese mu bimureba mu nzu ye afite inshingano zo kubifata neza.

Mu bibazo basanze mu midugudu hirya no hino, yavuze ko harimo n’ikijyanye n’imyumvire y’abaturage itarazamuka ngo igere ku rwego rwiza, atanga urugero ku bafunze imiyoboro isohora imyotsi.

Ati “Abaturage nabo hari ibintu bafunga kubera imyumvire bagafunga hahandi imyotsi yacaga kugira ngo bitabamarira inkwi ariko wabaganiriza ugasanga koko ari ubujiji. Ibyo rero byagiye bikosorwa.”

Hari n’ikindi kibazo cyagaragaye kijyanye na biogaz aho basanze inka zitanga amase yo kuyicanisha zidahagije cyangwa abaturage bakayakuramo bakayakoresha nk’ifumbire.

Bigiye gushyirwa mu mihigo

Minisitiri Gatabazi yavuze ko bamaze kubona ibyo bibazo byose bafashe umwanzuro wo gushyiraho umukozi uhoraho muri buri mudugudu w’icyitegererezo kandi akagira n’abandi bafatanya mu kwita ku mibereho y’abaturage umunsi ku wundi.

Ati “Buri mudugudu w’icyitegererezo ukagira ubuyobozi, ni ukuvuga Umukuru w’Umudugudu, ushinzwe imibereho myiza y’abaturage, umujyanama w’ubuzima, ushinzwe kubigisha iby’iterambere ry’ubukungu, bari muri abo baturage bakigishwa bagahugurwa.”

Uwo ushinzwe imibereho myiza ni we uzajya abigisha uko bakoresha ibikoresho bishya baba babonye, ubwihereo bushya, gas na biogas, kugira isuku n’ibindi.

Muri buri mudugudu w’icyitegererezo hari irerero rifite abakozi bahoraho bigisha abaturage uko barera abana neza, uko bategura indyo yuzuye n’ibindi kandi n’abatuye hafi y’iyo midugudu bakaza kuhigira.

Mu rwego rwo gukumira mu buryo burambye ibibazo bigaragara mu midugudu yatujwemo abaturage, bagiye kubishyira mu mihigo basinyana na Perezida wa Repubulika.

Ati “Turashaka no kubishyira mu mihigo ubu ngubu tugiye kuzasinyana na Nyakubahwa Perezida wa Repubulika ko iyo midugudu igomba gufatwa neza, tugashyiraho n’ibipimo by’uko imidugudu ifashwe neza.”

Yavuze ko hagomba gushakwa ingengo y’imari yo gukemura ibibazo byagaragaye muri iyo midugudu yatujwemo abaturage ndetse no gukumira ko byagaruka cyangwa bikaba byaboneka ahandi.

Ati “Muri uyu mwaka turimo uturere twateganyije amafaranga asaga miliyari yo gukemura ibibazo byagaragaye muri iyo midugudu. Nitugira amahirwe tukabona ingengo y’imari yindi bitewe n’uko ubukungu bugenda buzamuka, ibibazo birimo tuzabirangiza.”

Hazakurikiraho kugirana amasezerano n’abaturage y’imicungire y’inzu baba bahawe kugira ngo bumve ko ari izabo, bahabwe n’ibyangombwa byazo bazandikweho.

Ati “Bamenye imyaka bagomba kumara kugira ngo bahabwe icyangombwa cya burundu bagaragaje ko babifashe neza babirinze. Ayo masezerano rero yarateguwe arasinywa n’abaturage, aho atarasinywa nabyo bigomba gukorwa mu gihe cya vuba.”

Agaruka ku bafatanyabikorwa, Minisitiri Gatabazi yavuze ko bafite uruhare runini mu gufasha abo baturage gukumira ibibazo bahura nabyo.

Ati “Umudugudu ushobora kuba uri ahangaha utuwe n’abantu 300 haturiye Kiliziya cyangwa umuryango utari uwa Leta, abo nabo dufatanya nabo. Nka Imbuto Foundation hari imidugudu y’icyitegererezo yafashe igera kuri ine kugira ngo idufashe kwigisha abaturage no kubatoza kuyibamo neza.”

Mu bindi bazitaho ni ugufasha abo baturage kubyaza umusaruro ibyo baba bahawe kugira ngo babihereho mu kwiteza imbere.

Hari ibyamaze gukemurwa

Minisitiri Gatabazi yavuze ko ikibazo cy’ubworozi bw’inkoko cyari cyagaragaye mu mudugudu wa Karama mu Mujyi wa Kigali cyamaze gukemuka kuko bashyizeho ugomba kubikurikirana bityo inkoko zikaba ziri gutera amagi ku kigero gishimishije.

Yavuze ko no mu midugudu irimo uwa Kinigi muri Musanze, ubworozi bigenda neza, n’ahandi bari bafite ibibazo by’ubwatsi bw’amatungo nko mu Bugesera byamaze gukemuka.

Ati “Akarere ka Bugesera kabafasha kubona ubwatsi buri munsi ariko bari gushakirwa ukuntu haboneka ahantu hahagije ho gutera ubwatsi ku buryo bashobora kugaburira amatungo yabo.”

Yibukije ko muri rusange ikiba kigamijwe ari ugutuza abo baturage ahantu heza no kubaha ibibabera umusingi wo kwiteza imbere.

Perezida Kagame yanyuze ku Mudugudu w’Icyitegererezo wa Rugabano mu Karere ka Karongi ubwo yari agiye gusura Uruganda rw’Icyayi Rugabano ku Cyumweru tariki ya 28 Kanama 2022

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .