Burera: Yimanitse mu kagozi nyuma yo gukimbirana n’umugore we

Yanditswe na N.Kubwimana Janvière
Kuya 16 Nyakanga 2019 saa 03:27
Yasuwe :
0 0

Nkundizanye Cyprien wo mu Karere ka Burera yasanzwe mu mugozi yimanitse nyuma yo kugirana amakimbirane n’umugore we.

Urupfu rw’uyu mugabo w’imyaka 33 y’amavuko yari atuye mu Mudugudu wa Kabashotsi, Akagari ka Nyamabuye, Umurenge wa Kagogo rwamenyekanye mu ijoro ryo kuwa 15 Nyakanga 2019.

Nkundizanye yasanzwe yimanitse mu kagozi nyuma yuko agiranye amakimbirane n’umugore we Ingabire Consolée bikabaviramo no gufatana mu mashati.

Amakuru IGIHE ifite ni uko mu gihe aba bombi barwanaga, abayobozi baje kubakiza ariko basaba umugore kureba aho yacumbika, ikibazo kigakemurwa bukeye. Ubwo bahageraga mu gitondo basanze umugabo yimanitse mu kagozi yashizemo umwuka.

Umunyamabanga Nshingwabikorwa w’Umurenge wa Kagogo, Butoyi Louis, yatangaje ko batunguwe n’aya makuru kuko uwo muryango utarangwagamo amakimbirane.

Yagize ati “Ni byo koko aya makuru twayamenyeshejwe, inzego dukorana zatubwiye ko uwo Nkundizanye yiyahuye. Ngo byabanjirijwe n’amakimbirane yavutse hagati y’umugabo n’umugore ariko umukuru w’umudugudu arayahosha, yasabye uwo mugore kureba aho arara ikibazo kigakemurwa nyuma. Mu gitondo ubwo bageraga iwe ngo bakemure ikibazo basanze yiyahuye.’’

Yakomeje avuga ko batunguwe no kumva iyi nkuru muri urwo rugo kuko nta makimbirane yari arusanzwemo.

Ati “Icyadutangaje ni uko uru rugo nta makimbirane yarurangwagamo, kuko mu ngo 18 dufite muri uyu murenge wacu zibana mu makimbirane urwo ntirwarimo. Icyo twasabye abaturage ni ukujya batanga amakuru ku gihe aho babonye ingo zitumvikana kabone n’ubwo ayo makimbirane yaba abaho mu ibanga kuko haba hari abasanzwe babizi. Ikindi ni ukugerageza kubana mu bworoherane niba havutse ikibazo ntihafatwe icyemezo cyo kwiyambura ubuzima.’’

Nkundizanye yasigiye umugore we abana babiri.

Umurambo we wajyanywe mu Bitaro Bikuru bya Ruhengeri kugira ngo ukorerwe isuzuma.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza