00:00:00 IGIHE NETWORK KN KINYARWANDA EN ENGLISH FR FRANCAIS

Burera: Uko abari abarwayi bo mu mutwe bakize bagahindura imibereho y’imiryango yabo

Yanditswe na Ndikumwenayo Thierry
Kuya 27 Ukwakira 2022 saa 03:09
Yasuwe :

Abarwaye indwara zo mu mutwe bakunda guhura n’akato ku buryo n’iyo bivuje hari abakomeza gutekereza ko nta bushobozi bwo gukora akazi runaka bafite, ugasanga barashidikanya ku bushobozi bwabo rimwe na rimwe bakabima amahirwe.

Ni imyumvire ikomeza gusubiza inyuma abivuje indwara zo mu mutwe bagakira. Icyakora hari abarenze izi mbogamizi uyu munsi bakora imirimo ibyara inyungu ibafasha kwibeshaho.

Urugero ni abivuriza indwara zo mu mutwe ku bitaro bya Butaro no mu bigo nderabuzima biri mu karere ka Burera, bishimira ubuvuzi bahabwa, bakanafashwa kwibeshaho bakora imirimo ibyara inyungu nyuma yo gukira izo indwara.

Abagera kuri 1619 ni bo babarizwa mu matsinda akora imirimo itandukanye ibabyarira inyungu irimo iy’ubuhinzi, ubworozi n’ubukorikori, ibi bavuga ko byabafashije mu iterambere ndetse no kwisanga mu bandi.

Irafasha Jeannette w’imyaka 23 avuga ko yagize uburwayi bwo mu mutwe aho yarangwaga no guhora agwa hasi, agahwera kandi agahora aribwa umutwe. Uburwayi bwe bwabaye intandaro yo kureka ishuri ubwo yigaga mu yisumbuye. Nyuma y’uko akize, ari mu itsinda rikora inkweto.

Yagize ati “Nafashwe ndibwa umutwe cyane kandi ngahora ngwa hasi bakanansukira amazi kugira ngo nkanguke ariko naje kugana ikigo nderabuzima abaganga baramfasha, bampa gahunda ngomba kubahiriza yo kujya guhura na muganga none ubu narakize nkora akazi nk’abandi bose, ndetse nasubiye kwiga, ubu ndangije ayisumbuye.”

Niyibizi Jean Baptiste na we avuga ko yagize uburwayi bwo mu mutwe, amara igihe kinini yiruka ku gasozi ndetse akarara hanze ku buryo ntacyo yabashaga kumarira abana be n’umuryango muri rusange.

Uyu mugabo avuga ko kwivuza byatumye asubira mu buzima busanzwe kuko abasha gukora imirimo inyuranye nk’abandi bose.

Ati “Umuryango wamaze igihe unjyana mu bapfumu ntacyo bitanga. Abaganga baramfashije, baramvura ndakira. Nta kato n’ihezwa nkorerwa n’abari banzi nirukanka ku gasozi, ubu mbanye neza n’abandi kandi mbasha gutanga umusanzu mu kubaka imibereho ya buri munsi.”

Ntibabaza Yvonne yashakanye na Sinaribonye waje kugira uburwayi bwo mu mutwe akajya akubita abantu ndetse akinisenyeraho inzu.

Uyu mugore avuga ko umugabo we yajyanywe ku kigo nderabuzima akavurwa agakira none ubu akaba ari umugabo mwiza mu rugo ku buryo anabasha gufatanya n’abandi mu mirimo iteza urugo imbere.

Ati “Twamuvuje ku kigo nderabuzima cya Ntaruka arakira none ubu akora imirimo y’ubudozi bw’inkweto muri iri tsinda bigatuma agira icyo amarira urugo kandi akaganira n’abandi bagize ibibazo nk’ibye.”

Aba bose baganiriye na IGIHE bavuga ko kwibumbira mu matsinda akora imirimo ibyara inyungu babifashijwe n’umuryango Inshuti mu buzima (Partners In Health). Byabahaye umwanya mwiza wo guhura no kuganira ku burwayi bagize bityo bikabafasha kutigunga no gutizanya imbaraga mu kongera gusubirana ubuzima busanzwe.

Umuganga uvura indwara zo mu mutwe mu bitaro bya Butaro, Eugenie Uwimana, avuga ko mu ndwara zo mu mutwe ziza ku isonga ziganjemo igicuri n’uburwayi bwo mu mutwe bweruye bukunda kugaragazwa no kwiruka ku gasozi no guta ubwenge mu buryo bugaragarira buri wese.

Amakimbirane mu miryango, ihungabana ry’abana bato, amateka umuntu yanyuzemo n’imyemerere ishingiye kuri za Nyabingi, ikoreshwa ry’ibiyobyabwenge nka kanyanga n’ibindi, nabyo biri mu mpamvu z’ubu burwayi.

Umuyobozi w’Akarere wungirije ushinzwe imibereho y’abaturage mu karere ka Burera, Mwanangu Theophile yatangaje ko iki kigo cyafashije akarere mu kubungabunga ubuzima bwo mu mutwe.

Yongeraho ko mu kwinjiza aba bari bafite uburwayi bwo mu mutwe mu muryango babanza kuganiriza imiryango yabo.

Ati “Mbere yo kubinjiza muri sosiyete tubanza kuganiriza imiryango yabo, nanone kandi mu biganiro tugirira mu nteko z’abaturage tubumvisha ko aba bari bafite ubu burwayi bakize bityo ari bagenzi babo.”

Kugeza ubu Umuryango Inshuti Mu Buzima (Partners In Health) ufasha amatsinda atandukanye y’abari abarwayi bo mu mutwe arimo ay’abahinga ibihumyo, ibirayi, ibigori; abakora bakadoda inkweto, abadoda imyenda n’ibikapu ndetse hari n’aborozwa amatungo magufi nk’ihene n’intama.

Muri aka karere hari abagera ku 2400 bitabwaho mu bigo nderabuzima bitandukanye, biyongera ku bandi 110 bagana ibitaro bya Butaro.

Imibare igaragaza ko kuva mu Ukwakira 2021 kugera mu Ukwakira 2022 mu karere ka Burera hamaze kwakira abarwayi bivuza indwara zo mu mutwe babarirwa mu 3267.

Niyibizi yirukaga ku gasozi none uyu munsi atunze umuryango we abikesha gukora inkweto
Aba bahinga ibihumyo bagamije kwiteza imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .