Burera: Bibukijwe ko umwana atabarizwa mu mirimo ivunanye ahubwo ashakirwa mu muryango utekanye

Yanditswe na N.Kubwimana Janvière
Kuya 23 Nyakanga 2019 saa 11:55
Yasuwe :
0 0

Ababyeyi n’abayobozi bakora mu nzego zitandukanye bo mu Karere ka Burera, bibukijwe ko umwana atabarizwa mu mirimo ivunanye ahubwo agomba gushakirwa mu muryamgo utekanye.

Ni muri gahunda ya polisi y’ukwezi kwahariwe ibikorwa by’iterambere ku baturage, aho hatangijwe icyumweru cyahariwe kurwanya ihohoterwa rishingiye ku gitsina n’irikorerwa abana, cyatangijwe kuri uyu wa 22 Nyakanga 2019.

Bamwe mu bari bitabiriye iki gikorwa bavuga ko icya mbere ari ukurwanya amakimbirane yo mu ngo kuko ari yo ya mbere atuma habaho ihohoterwa rikorerwa umugore n’umwana.

Mujawamariya Margarita ushinzwe inama y’Igihugu y’abagore mu Karere ka Burera yagize ati “Ikintu cyambere gihungabanya uburenganzira bw’umwana n’umugore ni amakimbirane yo mu miryango, ni cyo tugomba kubanza tugahagurukira kukirwanya, ubundi umwana akarererwa mu muryango utuje agafashwa gutegura ejo heza”.

Umuhuzabikorwa w’umuryango uharanira kurinda no kurengera umwana Hope and Homes, Nduwimana Emelien avuga ko iyo umwana yatangiye gushakira umunezero mu biyobyabwenge, gushakira ubuzima mu birombe by’amabuye y’agaciro, gusoroma ibyayi n’indi mirimo itamukwiye uburenganzira bwe buba bwahungabanyijwe.

Ati “Nitwe tugomba gufata iya mbere mu kumurengera, ariko by’umwihariko tukita kuri ba bana bafite ubumuga kuko aribo bahohoterwa cyane”.

ACP Teddy Ruyenzi wari uhagarariye Polisi y’Igihugu muri iki gikorwa, yahaye inshingano abayobozi yo kwita by’umwihariko mu guhangana n’iki kibazo.

Ati “Nk’uko byakunze kugarukwaho, amakimbirane yo mu ngo niyo ya mbere atuma umwana ahutazwa, rero nk’uko abayobozi ari bo bakunze kwitabira ibiganiro dutanga, bagomba gufata iya mbere mu guhangana n’iki kibazo cy’amakimbirane kuko ari wo muzi w’ihohoterwa rikorerwa abana, akabona kurererwa mu muryango utekanye, kandi amahoro y’igihugu ahera mu muryango”.

Mu Karere ka Burera habaruwe imiryango 400 ibana mu makimbirane, yagiye isurwa ikaganirizwa gusa 99 muri yo iracyafite ibibazo bikomeye, naho kuva mu 2016 kugeza mu 2018 abangavu basaga 1800 babyaye bakiri bato, ariho polisi y’Igihugu n’indi miryango iharanira uburenganzira bw’umwana ifatanya ngo iki kibazo kibangamiye imibereho myiza y’abaturage kirandurwe.

Inzego zose zahuguwe uko zafatanya mu kurwanya ihohoterwa muri rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza