00:00:00 IGIHE NETWORK KN KINYARWANDA EN ENGLISH FR FRANCAIS

Burera: Abakobwa 20 babyaye bakiri bato bagiye gufashwa gushinga uruganda rukora isabune

Yanditswe na Claude Bazatsinda
Kuya 19 May 2022 saa 11:20
Yasuwe :

Abakobwa 20 bo mu Karere ka Burera babyaye bakiri bato, bagiye gufashwa mu mushinga bafite wo gukora isabune y’amazi kugeza ubwo bazagera ku ruganda bakabasha kwiteza imbere bo n’imiryango yabo.

Ni ubufasha bemerewe n’Akarere ka Burera, Umuryango uharanira Iterambere ry’Umwari n’Umutegarugori mu Cyaro (Réseau des Femmes) n’Urwego rw’Igihugu rw’Imiyoborere (RGB).

Umushinga w’aba bakobwa wo gukora isabune y’amazi usanzwe ukora ariko ugakora mu buryo budateye imbere kuko hifashishwaga ubwo kuvanga ibyo bazikoramo bakoresheje intoki bityo umusaruro ukaboneka ari muke ntuhaze isoko.

Muri ubu bufasha bahawe, bagiye kugurirwa imashini izabafasha ivuye mu nkunga ya miliyoni 13 Frw zatanzwe na RGB.

Iyi mashini izatwara hagati ya miliyoni 6 Frw na miliyoni 7 Frw, asigaye agurwemo ibikoresho nkenerwa byifashishwa mu gukora isabune kuko bari basanzwe bazikora bifashishije avoka, igikakarubamba n’indi miti nkenerwa bavangamo.

Uwimana Claudine watewe inda afite imyaka 17 avuga ko akimara kumenya ko yasamye yihebye ntiyongera gutekereza iterambere rye yumva ko ubuzima bwe bwarangiye. Yatinyaga no kuva mu rugo agahora yigunze kuko yavuye no mu ishuri ageze mu Mwaka wa Gatanu w’amashuri abanza.

Yagize ati "Numvaga ko ubuzima bwahagaze, nta rindi terambere nzongera kubona. Aho menyeye Réseau des Femmes baramfashije ndiga ndarangiza badushakira abantu batwigisha gukora isabune, turazikora twigirira icyizere."

Uwimana akomeza avuga ko kuba bahawe imashini bagiye kunoza ibyo bakora ku buryo uruganda rwabo ruzabateza imbere n’imiryango yabo.

Ati "Icyo nabwira abakobwa bagenzi banjye batarabyara ni uko bakwiye kumva inama z’ababyeyi bakirinda ababashuka kuko hanze aha turashukwa bikarangira dutereranywe n’abadushutse."

Uwayisenga Diane na we watewe inda afite imyaka 17 yavuze ko bakoraga isabune n’amavuta mu buryo bwo kuvangisha intoki bikabagora, ubu imashini babonye igiye kubafasha kongera ibyo bakoraga kandi nabyo byabahesheje agaciro.

Umuyobozi wa Porogaramu muri Réseau des Femmes, Mukarurangwa Egidie, avuga ko bafite intumbero y’uko uyu mushinga wazavamo uruganda rukora isabune ukazafasha aba bakobwa kwiteza imbere n’imiryango yabo.

Yagize ati "Bazashakirwa umuntu ubafasha kumenya gukoresha imashini mu mezi 10 na bo basigare bigisha abandi. Uyu mushinga uzabafasha gukora isabune bakoresha, babone amafaranga yo kubatunga no gukemuza ibibazo bafite mu miryango nko kwishyura mituweli, kwiyishyurira amashuri abana babo no kwibonera ibibatunga no kwambara ndetse banizigamire biteze imbere."

Umuyobozi w’Akarere ka Burera ushinzwe Imibereho myiza y’Abaturage, Mwanangu Théophile, avuga ko biteguye gukorana neza n’abo bana no kubafasha kugera ku nzozi zabo.

Yagize ati "Ubufatanye nk’ubu bivuze ikintu kinini cyo gufasha umuturage tumuvana mu bukene tumujyana mu iterambere rirambye kandi binadufasha kwesa imihigo. Icyo dusaba ababyeyi n’Umuryango Nyarwanda ni ukwakira aba bana baba barahuye n’ibibazo bagaterwa inda bakiri bato.’’

"Kuba barabyaye ntibivuze iherezo ry’ubuzima bwabo, nibafashwe, abanyeshuri bongere bige, abo babyaye bitabweho kugira ngo batagwingira, batange n’amakuru ababa babahohoteye bahanwe n’abana bagire uburenganzira bwabo ku babyeyi kandi natwe nka Leta tuzakomeza kubashyigikira batere imbere."

Biteganyijwe ko uyu mushinga w’abo bakobwa numara kuba uruganda uzatanga akazi n’ubumenyi ku bana 150 batewe inda batarageza ku myaka 18 bo mu Karere ka Burera n’abakozi 400 harimo abahoraho na ba nyakabyizi.

Inzego zitandukanye zageneye inkunga aba bakobwa izabafasha gushinga uruganda rukora amasabune

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .