00:00:00 IGIHE NETWORK KN KINYARWANDA EN ENGLISH FR FRANCAIS

Burera: Abagifite ingeso yo guharika basabwe kubicikaho kuko bitakijyanye n’igihe

Yanditswe na Ndikumwenayo Thierry
Kuya 8 Ukuboza 2022 saa 05:41
Yasuwe :

Uko uyu munsi ari inkuru kumva umuntu warongoye abagore barenze umwe, ni nako byari inkuru kumva umugabo ufite umugore umwe mu bihe by’abasokuruza cyangwa abakurambere.

Kuri ubu siko biri, amategeko yemerera umugabo kugira umugore umwe; aba banashishikarizwa kuboneza urubyaro dore ko umubare w’abaturage wiyongera ariko ubuso bw’igihugu ntibwiyongere.

Hari ibice bimwe na bimwe by’akarere ka Burera bikirangwamo ubuharike, abaturage bamwe banenga uyu muco bavuga ko udakwiriye kuko wongera amakimbirane ndetse n’abana bavutse muri iyo miryango bakabura uburenganzira.

Ubuyobozi buvuga ko uyu muco ushobora gucika ariko binyuze mu kwigisha abakiri bato bakumva ububi bw’ibyo abababanjirije babayemo.

Serutoki Protais yemeza ko ubuharike bugihari muri aka karere ka Burera ndetse ko bufite ingaruka nyinshi.

Ati “Ingaruka zo zirahari kuko iyo uharitse ni nk’aho uba utaye umugore wa mbere. Abana nabo bahura n’ibibazo kuko ubushozi bwakagiye ku muryango umwe bujya kuri ibiri; hari ubwo usanga ari na buke.”

Twagirayezu Jonas we ashimangira ko hari udusozi tumwe na tumwe muri aka karere twagize ubuharike nk’umuco; aho usanga gusezerana batabikozwa.

Ati “Buriya hari nk’udusozi usanga barabyishyizemo ko batagomba gusezerana, kandi ino ibyo birahari! Nk’ubu hari abasezeranye imbere y’Imana mbere yo kujya mu mategeko kubera umukobwa yari muto, igihe cyo gusezerana kigeze umugabo ntiyabikozwa da! None ubu yishakiye undi, umugore ari gusiragira ashaka ubutabera. Nk’agasozi ka Gisirwe ubabwiye gusezerana waba uciye inka amabere!”

Nizeyimana Gerard yunga mu rya bagenzi be akanasaba abakibikora ko babicikaho bakabana byemewe n’amategeko. Ibi ngo byarinda ingaruka kuri bo no kubana babo.

Uwera Kayumba Marie Alice ni umudepite mu nteko ishinga amategeko, wavuze ko kugira ngo umuco w’ubuharike uri muri aka karere ucike bisaba kwigisha abakiri bato bakazibukira ibyo ababyeyi babo bakoze.

Ati “Ibintu byo guharika hano bisa nk’aho ari umuco! Navuga ngo ni umuco waho mubi wa kamere, sinavuga ngo biterwa n’iki kuko niko bahoze. Urabona umuntu w’imyaka 23 ntiyasezeranye, 24 ati maze gushaka kabiri cyangwa gatatu! Niba umugabo afite abagore batatu, agasambu agasambu kuri bo, ibyo byakabaye ari iby’umugore umwe. Bari guteza ibibazo abana, n’ibibazo by’abasaba ubufasha niho bituruka!”

Yavuze ko guharika babigabanyije n’ibibazo byinshi bigaragara mu miryango byagabanyuka.

Ubuyobozi bw’akarere nabwo bwemeza ko ubuharike buhagaragara ahanini buterwa n’amateka aho abaturiye umupaka bagiraga uyu muco wo guharika.

Buvuga ko n’ubwo iki kibazo kigihari kidafite intera nk’iya mbere; gusa ngo haracyakorwa ubukangura mbaga bwumvisha abaturage ingaruka z’ubuharike.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .