Burera: Ababyeyi batunze agatoki abayobozi bagikingira ikibaba abagabo batera abana inda

Yanditswe na N.Kubwimana Janvière
Kuya 1 Ugushyingo 2020 saa 03:53
Yasuwe :
0 0

Ababyeyi bo mu Karere ka Burera bafite abana b’abakobwa babyaye bataruzuza imyaka 18, bashyize mu majwi bamwe mu bayobozi bo mu nzego z’ibanze, bagikingira ikibaba abagabo babangiriza abana bakabatera inda bikabagiraho ingaruka zirimo no guta amashuri.

Ni ikibazo cyagarutsweho n’ababyeyi ku wa 30 Ukwakira 2020, ubwo basobanurirwaga itegeko ryo gukuramo inda ku buryo bwemewe n’amategeko. Iki gikorwa cyateguwe binyuze mu Muryango Baho Neza uterwa inkunga na Imbuto Foundation ku bufatanye na Minisiteri y’Ubuzima, igashyirwa mu bikorwa na HDI, hagamijwe kurwanya inda zitateguwe no guca ingaruka ziterwa no gukuramo inda binyuranye n’amategeko.

Bamwe mu babyeyi bafite abana batewe inda bataruzuza imyaka y’ubukure, bavuga ko hakiri bamwe mu bayobozi bahishira amakuru y’abagabo babigiramo uruhare bigatuma badahabwa ubutabera bunoze.

Kamanzi Donatile utuye mu Murenge wa Rugarama, ufite umwana watewe inda afite imyaka 16 bikozwe n’umuturanyi we yahingiraga, avuga ko yiyambaje abayobozi bakamuterarana.

Mu kubara iyo nkuru avuga ko uwo mugabo yafunzwe akaza gufungurwa mu buryo atazi, bikaba byaratumye umwana we abura ubutabera akaza no kuva mu ishuri.

Yagize ati “Duturanye n’umugabo witwa Senzoga Edouard, nacanga inshuro iwe muhingira, nakozeyo imyaka itandatu. Yasabye umwana wanjye ko amutwaza imbuto yari agiye gutera agezeyo amufata ku ngufu amutera inda, uwo mugabo mubajije arabyemera. Nabibwiye umuyobozi w’umudugudu antangira raporo kuri Polisi, uko ngiyeyo bambwira ngo nzagaruke ejo, ngahora njyayo kugeza ubwo na dosiye ye yaje kubura.’’

“Nyuma RIB yaraje ndayiregera, umugabo arafatwa arafungwa, umwana abyaye bapima ADN basanga ari uwe, gusa nyuma yararekuwe, nsubira kumurega mu mudugudu, ngera ku kagari bose bakambwira ngo n’iki nshaka ko umwana yamwandikishije. Nabo bakingira ikibaba abaduterera abana inda bikababuza ubutabera, ubu Ubushinjacyaha bwamfashije kujurira ngo ndebe ko narenganurwa.’’

Sembagare Sylvestre wo mu Murenge wa Kinoni, Akagari ka Nkumba, Umudugudu wa Cyanya, na we avuga ko umwana we yatewe inda afite imyaka 16, ayitewe n’umuturanyi we ariko ikibazo yakigejeje ku bayobozi baramuterarana kuko uwo mugabo yabageragaho akabaha akantu bakamuhishira.

Yagize ati “Namaze kumenya ko yamuteye inda njya kubibwira mudugudu, bakambwira ngo barabikurikirana, bakanga kunkorera inyandiko ngo murege. Navagayo uwo mugabo nawe agahita amugeraho, nagera ku Kagari naho bikaba uko. Nagiye muri RIB abimenye ahita ajya kwandikisha umwana, ntiyitaba ubu abayobozi basigaye bambwira ngo ndarwana n’iki ko umwana yanditse? Ibi bituma twe n’abana bacu tubibirenganiramo.’’

Umukozi muri HDI ushinzwe Ubuvugizi n’Amategeko avuga ko bakorana ibiganiro n’abana babyaye bakiri bato, ababyeyi babo n’abayobozi babasobanurira ibijyanye n’itegeko ryo gukuramo inda mu kugabanya ingaruka ziterwa n’ababikora mu buryo bwa magendu.

Yasobanuye ko mu nshingano zabo z’ubuvugizi bazakomeza gukebura abayobozi bashaka indonke bagakingira ikibaba abagabo bahohotera abana ndetse amategeko agashyirwa mu bikorwa.

Umuyobozi wungirije w’Akarere ka Burera ushinzwe imibereho myiza y’Abaturage, Manirafasha Jean de la Paix, avuga ko umuyobozi ukirangwa n’amakosa yo guhishira abatera abana inda aba yirengagije inshingano zo kurengera umuturage.

Yagize ati “Umuyobozi nk’uwo ukigira uruhare mu gukingira ikibaba abahohotera abana bakabatera inda, nawe twamufata nk’umwanzi w’igihugu, tumumenye twamuhana rwose. Abaturage nabo bamenye ko uburenganzira bwabo butagarukira aho, bakwiye kugana inzego zisumbuyeho, natwe bakatugeraho ndetse bakagana na RIB bagafashwa kubona ubutabera, ni uburengsnzira bwabo kandi biri mu nshingano zacu.’’

Mu Karere ka Burera mu 2018/2019 habarurwa abana barenga 800 batewe inda bafite imyaka iri munsi ya 18, aho ababyeyi bagaragaza ko abenshi baziterwa n’abagabo basanzwe bafite ingo, gusa ngo iyo bagerageje kubaregera bamwe mu bayobozi b’inzego z’ibanze babakingira ikibaba, bigatuma batabona ubutabera.

Ababyeyi batunze agatoki abayobozi bagikingira ikibaba abagabo batera abana inda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .