Burera: Ababyeyi banenzwe kwigisha urubyiruko ubuzima bw’imyororokere mu marenga

Yanditswe na N.Kubwimana Janvière
Kuya 25 Mutarama 2020 saa 04:22
Yasuwe :
0 0

Abakurikiranira hafi iby’ubuzima mu Karere ka Burera, bemeza ko kwigisha urubyiruko ibijyanye n’ubuzima bw’imyororokere, bigakorwa bisa nk’aho ari uguca amarenga, biracyari imbogamizi ituma imibare y’abangavu baterwa inda yiyongera.

Ababikora bibwira ko baramutse bigishije abana ubuzima bw’imyororokere mu buryo butomoye baba banyuranyije n’umuco nyarwanda.

Ni ikibazo cyagarutsweho kuri uyu wa 24 Mutarama 2020, mu nama yateguwe n’umuryango Imbuto Foundation mu gikorwa cyabo cyo gutangiza umushinga, uzajya utanga inyigisho ku rubyiruko rufite imyaka y’ubukure kuva ku 10 -24, mu rwego rwo guhangana n’ikibazo cy’inda zitifuzwa ziterwa abangavu.

Ni umushinga uzamara imyaka itatu ukorera mu Karere ka Burera , aho uzafasha ku ikubitiro abangavu basaga 700 batewe inda mu 2019, ukazanagera ku rubyiruko rwose ruri mu kigero cy’imyaka 10 na 24, aho ruri hose muri aka karere.

Ugamije kwigisha no gutanga amakuru ahagije ku buzima bw’imyororokere mu rubyiruko bikorwa n’abakangurambaga b’urungano, bakanimakaza ibiganiro hagati y’ababyeyi n’abana.

Bamwe mu bafite aho bahurira n’ubuzima cyane bakunze kuba bari kumwe n’uru rubyiruko, bavuga ko kuba hakiri abatinya gusobanurira aba bana ibijyanye n’ubuzima bw’imyororokere, batinya kubangamira umuco wabo, cyangwa bakagira isoni, ngo bigituma imibare y’abangavu babyarira iwabo yiyongera.

Umuyobozi w’ishuri ryisumbuye rya Kinoni, Buregeya Paul, yagize ati "Kwigisha umwana w’imyaka icumi kuzamura, ukavuga byose mu mazina ibijyanye n’ubuzima bw’imyororokere biracyari ikibazo, iyo tubivuze usanga abana bagize isoni kuko ababyeyi batabibigishije, natwe ugasanga turabica ku ruhande, ariko tugiye gusaba ababyeyi babidufashemo, kuko biracyatuma abana benshi babyara imburagihe".

Umuyobozi w’ikigo nderabuzima cya Ndongozi mu Murenge wa Kinoni nawe ati "Twe ntibijya bidutera isoni kuko twabihuguriwe kenshi, ikibazo kiracyari ku babyeyi na bamwe mu barezi bakigira isoni zo kwigisha abana babo ku buzima bw’imyororokere, nyamara bo hari amakuru atanafite aho ahuriye n’ukuri bakura ahandi ari nayo abashora mu busambanyi".

Umuyobozi ukuriye ishami ry’ubuzima mu muryango Imbuto Foundation Kalisa Isabelle, nawe ashimangira ko kudaha abana amakuru ahagije ku buzima bwabo bw’ imyororokere, batinya kubivuga bagaca amarenga, ari ukubahemukira cyane, kuko ngo icyagateye isoni umubyeyi cyangwa umurezi w’umwana ari ukubona yabyaye imburagihe.

Ati "N’ubundi iyo umwana utamwigishije ibijyanye n’imihindagurikire y’umubiri we, abikura ahandi mu rungano bagendana, ku mbuga nkoranyambaga zitandukanye bimwe ntanabisobanukirwe”.

Akomeza avuga ko uyu mushinga utazita kuri uru rubyiruko gusa, ahubwo uzanibanda ku gusobanurira ababyeyi uruhare rwabo mu kwigisha abana babo ku buzima bw’imyororokere.

Guverineri w’Intara y’Amajyaruguru Gatabazi Jean Marie Vianney, avuga ko kwigisha abana bakiri bato ubuzima bw’imyororokere ntacyo babakinze, ari ukurokora ubuzima bwabo.

Yemeza ko ntaho bihuriye no kwica umuco cyangwa ngo bibe amahano, ahubwo ngo amahano ari ukubona umwana yarabyaye undi.

Ati"Kwigisha umwana akiri muto ntacyo umukinze ku mihindagurikire y’umubiri we, ntaho bihurira no kwica umuco kuko na kera byarakorwaga, ba nyirasenge wabo barabahanuraga bakanabahana, kandi si n’amahano, amahano ni ukubona umwana ari kurera uwo yabyaye nawe atireze".

Umuryango Imbuto Foundation, ufite gahunda z’ubukangurambaga bwo kwigisha urubyiruko ruri hagati y’imyaka 10-24, kwirinda inda z’imburagihe n’agakoko gatera Sida mu turere dutandukanye.

Guverineri w’Intara y’Amajyaruguru Gatabazi Jean Marie Vianney, avuga ko kwigisha abana bakiri bato ubuzima bw’imyororokere ari ukurokora ubuzima bwabo
Umuyobozi ukuriye ishami ry’ubuzima mu muryango Imbuto Foundation Kalisa Isabelle ashishikariza ababyeyi kutigisha abana ubuzima bw'imyororokere mu marenga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza