00:00:00 IGIHE NETWORK KN KINYARWANDA EN ENGLISH FR FRANCAIS

Bugesera: Urubyiruko rwubakiye uwarokotse Jenoside wasenyewe n’imvura

Yanditswe na Thamimu Hakizimana
Kuya 18 May 2024 saa 07:42
Yasuwe :

Urubyiruko rwo mu Murenge wa Nyamata mu Karere ka Bugesera rwubakiye inzu umuturage warokotse Jenoside yakorewe Abatutsi mu 1994 witwa Nzamwitakuze Mariya wari wasenyewe n’amazi y’imvura.

Iki gikorwa cy’ubugiraneza uru rubyiruko rwagikoze ku wa Gatanu tariki ya 17 Gicurasi 2024 kibera mu Mudugudu wa Nyirabumuntu mu Kagari ka Kayumba.

Iki gikorwa cy’ubugiraneza uru rubyiruko rwo mu Murenge wa Nyamata rukaba rwaragikoranye n’urundi rubyiruko rwo muri Amerika ruri mu itsinda rya Teen Challenge of Oklahoma.

Uyu mubyeyi nzamwitakuze Mariya, yabwiye IGIHE ko yabyishimiye cyane ndetse byamurenze.

Ati “Sinabona ibyo kuvuga bihagije, gusa aba bantu ndabashimira n’umutima wanjye wose.”

Yakomeje avuga ko nyuma y’uko inzu ye yari yarasenyutse yari abayeho nabi kuko amazi yamusangaga mu nzu akanangiza ubwiherero bwe.

Ati “Mu buzima bwanjye ubwo mbonye aho ndambika umusaya hari byinshi bigiye guhinduka.”

Uukobwa umwe witwa Uwiduhaye Claire, we avuga ko bashimishijwe n’uko uyu mubyeyi yubakiwe inzu.

Ati “ Urebye byadushimishije cyane kuko yari abayeho nabi bitewe n’uko inzu ye yari yarangiritse.”

Undi witwa Deborah Sheckles yavuze ko banejejwe cyane no gufasha uyu mubyeyi.

Ati “Turigufasha uyu mubyeyi kuba heza kandi hatekanye atabangamirwa n’amazi y’imvura.”

Umuyobozi wa Ibuka mu Kagari ka Kayumba, Ndekezi Joseph, na we yavuze ko bishimiye cyane kugira abafatanyabikorwa nk’aba babashije kubakira uwarokotse Jenoside yakorewe Abatutsi mu 1994.

Yagize ati “Ni kenshi byifujwe ko iyi nzu yubakwa ariko rimwe na rimwe ubushobozi bukabura ariko twagize amahirwe tubona abafatanyabikorwa baduteye inkunga ikomeye cyane.”

Yakomeje ashimangira ko inzu y’uyu mukecuru yari ishaje cyane asoza asaba indi miryango gushishikarira gukora ibikorwa nk’ibi by’urukundo birimo no gusindagiza abatishoboye.

Urubyiruko rwo mu Murenge wa Nyamata rwifatanyije n'urundi rwari ruturitse muri Amerika mu kubakira uwarokotse jenoside yakorewe Abatutsi
Ubwo urubyiruko rutandukanye rwubakiraga uwarokotse Jenoside Yakorewe Abatutsi mu 1994 mu Karere ka Bugesera
Ni igikorwa cyitabiriwe n'urubyiruko rutandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .