Bugesera: Minisitiri Shyaka yasabye abayobozi b’inzego z’ibanze kutaba ‘abakerezamurimo’

Yanditswe na IGIHE
Kuya 20 Nzeri 2020 saa 03:57
Yasuwe :
0 0

Minisitiri w’Ubutegetsi bw’Igihugu, Prof. Shyaka Anastase, yakebuye abayobozi bo mu Karere ka Bugesera ababwira ko hari ibibazo bikihagaragara kandi bitajyanye n’izina ry’ubutore bafite ari ryo “Abakeramurimo ba Bugesera”.

Yabigarutseho ku wa Gatandatu tariki ya 19 Nzeri 2020 ubwo yasuraga Akarere ka Bugesera, aho yaganiriye n’abahagarariye abayobozi b’inzego z’ibanze, abikorera n’abavuga rikumvikana muri ako karere.

Minisitiri Shyaka yabwiye abayobozi ko izina ryabo ritabemerera kuba hari abaturage basigara inyuma kuko bose bakwiye kuba muri gahunda zose bakagendana.

Yagize ati “Niba mudashaka kwitwa ‘abakerezamurimo’, mukwiye kwita kuri ibi bibazo bikigaragara mu baturage, mukaba mwarangije kubikemura kandi mu gihe gito. Akarere kanyu gafite ubukire ntagereranywa n’utundi turere. Mukwiye gukora no kwitwara nk’abafite amahirwe abandi badafite.’’

Kugeza ubu abaturage 77.7% b’Akarere ka Bugesera ni bo bamaze kwishyura umusanzu w’ubwisungane mu kwivuza, abaturage 18.6% bamaze gutanga miliyoni 44.7 Frw yo kwizigamira muri Ejo Heza mu gihe ako karere kose gafite intego ya miliyoni 240 Frw muri uyu mwaka.

Ku rundi ruhande hari ibibazo bikigararara birimo imiryango itarubakirwa, idafite ubwiherero, ikibazo cy’imirire mibi mu bana n’isuku nke.

Bamwe muri abo bayobozi bahise bahigira imbere ya Minisitiri Shyaka ko nyuma y’ibyumweru bibiri bazaba barangije gukemura ikibazo cy’abaturage basigaye batarishyura mituweli n’icy’abana bakigaragaza ibimenyetso by’imirire mibi.

Urwego rwa’Abikorera muri Bugesera rwiyemeje ko rugiye gutanga umusanzu ugaragara nk’uruhare mu gukemura ibibazo bibangamiye imibereho y’abaturage n’iterambere.

Bugesera ifite abaturage 479 624 batuye ku buso bwa 1,337 Km²; abenshi barahinga abandi bagakora indi mirimo irimo n’uburobyi bukorerwa mu biyaga bya Cyohoha, Gashanga, Kidogo, Rumira, Mirayi, Kirimbi na Gaharwa.

Minisitiri w’Ubutegetsi bw’Igihugu, Prof. Shyaka Anastase, yabwiye abayobozi bo mu Karere ka Bugesera ko hari ibibazo by'abaturage bakwiye gukemura
Abayobozi bo mu Karere ka Bugesera babwiwe ko izina ryabo ritabemerera kuba hari abaturage basigara inyuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .