00:00:00 IGIHE NETWORK KN KINYARWANDA EN ENGLISH FR FRANCAIS

Bridge2Rwanda yatanze amahirwe ku bana bafite imishinga yahindura ubuzima bw’abaturage

Yanditswe na Igizeneza Jean Désiré
Kuya 13 Mutarama 2023 saa 07:31
Yasuwe :

Ubuyobozi bw’Ikigo gitegura abanyeshuri kikanabashakira ibigo by’icyitegererezo bakwigamo hirya no hino ku Isi, Bridge2Rwanda, burashaka gutegura abana b’abanyarwanda bubongerera ubumenyi ku rwego mpuzamahanga, ibizanabafasha guhatanira ibihembo bitandukanye binyuze mu masomo bahabwa.

Kuva mu 2011 Bridge2Rwanda imaze gufasha abana barenze 300 mu kubona ibigo mu mahanga aho 85% ari Abanyarwanda, bikajyana n’amasomo babategurira abafasha kuba intyoza mu mashami atandukanye.

Uyu mwaka na bwo biteganyijwe ko abandi 120 bazajya kwiga mu mahanga aho nanone Abanyarwanda bazaba barenga 90%.

Biga muri za kaminuza 84 ziherereye muri Leta zunze Ubumwe za Amerika, Canada, u Bwongereza, u Budage, Ghana, Lebanon na Leta zunze Ubumwe z’Abarabu ndetse barihirwa 100%.

Uretse u Rwanda, Bridge2Rwanda ifasha abanyeshuri bo mu bihugu bitandukanye birimo u Burundi, Sudan y’Epfo ndetse na Repubulika Iharanira Demokarasi ya Congo.

Iki kigo cyashinzwe mu 2007 gifite intego zo gufasha abanyeshuri b’abanyarwanda kugira ubumenyi buhangana ku rwego rw’Isi ndetse no gukorana n’abashoramari bo mu bihugu bitandukanye bakaza gushora imari yabo mu Rwanda.

Iyi ni na yo mpamvu basinyanye amasezerano na RISE, Ikigo cyo muri Amerika gifite gahunda yo gufasha abana bafite imyaka iri hagati ya 15-17 binyuze mu marushanwa aho umwana atanga igitekerezo cy’umushinga ugamije gukemura ibibazo by’abaturage yatsinda agafashwa kuwushyira mu bikorwa.

Kwiyandikisha mu marushanwa y’uyu mwaka bizarangira tariki ya 25 Mutarama 2022, uwiyandikiasha anyura aha www.risefortheworld.com

Umushinga wahize indi uhabwa ubufasha buzahoraho (lifetime fund), nyirawo agahabwa amasomo y’uko wanononsorwa, bikiyongeraho ko anafashwa mu kwishyurirwa amafaranga y’ishuri kuva aho ageze kugeza asoje.

Umwana watsinze agenerwa amafaranga agera ku bihumbi 500$ ni ukuvuga arenga miliyoni 500 Frw aba ateganyijwe kuzamutangwaho mu bikorwa bitandukanye. Kwitabira amarushanwa bisaba kwiyandikisha kuko ari igikorwa gihoraho buri mwaka.

Umwaka washize nta munyarwanda watsinze gusa abagera kuri barindwi baje mu cyiciro cya nyuma (final stages), nubwo batabonye ayo mahirwe ngo baze mu myanya 100 yashashakwaga bakomeje gufashwa na RISE mu buryo butandukanye burimo no gukurikiranirwa hafi bijyanye n’uko bitwara aho biga.

Umuyobozi ushinzwe gahunda ya RISE muri Bridge2Rwanda, Guy Merci Iradukunda avuga ko nubwo Abanyadwanda bataje mu myanya ihembwa mu buryo butaziguye, bashaka gutegura aba bana ku buryo yizera ko muri iyi myaka bazaba bari mu myanya y’imbere.

Ati “Nibiyandikishe kuko itariki ntarengwa ni kuwa 25 Mutarama 2023. Bagomba kubikora vuba batazacikwa n’aya mahirwe kuko turashaka gufasha abana b’u Rwanda mu buryo bwose bushoboka haba mu kubongerera ubumenyi ndetse no kubyaza umusaruro amahirwe ahari”.

Ibi ni umusanzu ukomeye ku Rwanda kuko kugeza ubu igihugu gishaka kwimakaza ubukungu bushingiye ku bumenyi aho ingamba nyinshi zafashwe ndetse n’uburyo uburezi butangwamo buravugururwa byose bigamije kugira bana b’intiti ibizatuma n’iterambere ryihuta kuko imishinga myinshi izaba ikorwaho n’inzobere.

Kuva mu myaka 28 ishize urwego rw’uburezi bw’u Rwanda rwakozwemo impinduka nyinshi zirimo izishingiye ku nteganyanyigisho zigenderwaho mu mashuri, indimi zikoreshwa mu myigire n’izindi byavugwaga ko zigamije guteza imbere uru rwego, ndetse no korohereza abashoramari bo muri uru rwego kugira ngo ireme ry’uburezi rikomeze gutumbagira.

Byiyongera ku ngengo y’imari urwego rw’uburezi rugenerwa aho nk’uyu mwaka w’amashuri wa 2022/2023 asaga miliyari 573,3 Frw azakoreshwa mu mirimo itandukanye mu burezi biteganyijwe ko arenga miliyari 249 Frw azagenda ku mishahara y’abakora mu nzego z’uburezi.

Igihugu kandi gishishikariye gufasha abana b’abahanga bakajya kuminuriza muri za kaminuza zateye imbere ku buryo ubumenyi bakurayo bagaruka gutanga umusanzu ku gihugu ari na byo Bridge2Rwanda uyu munsi iharanira.

Iradukanda ati "Natwe ntitujya kure ya gahunda ya leta kuko turashaka gutegura abana ku buryo bagera ku rugero bahanganaho n’abo muri za Kaminuza zikomeye tukabikora tunabashakira amahirwe atandukanye babyaza umusaruro nyuma bakagaruka kwerekana icyo bazi mu gihugu".

Bridge2Rwanda kandi ifite uburyo yise Isomo Academy aho abanyeshuri bajyanwa mu mwiherero w’amezi abiri mu gihe cy’ibiruhuko bikuru, bagahabwa amasomo arimo kwandika gusoma ndetse n’andi ashobora gutuma ubumenyi bafite bwiyongera.

Bafata abana barenga 100 aho muri icyo gihe banahabwa ibikoresho nkenerwa byose, birimo na za mudasobwa bakoresha biga, Ubuyobozi bugakomeza busaba ko ibigo by’amashuri n’ababyeyi kubaha abana kuko mu gihe batsinze na bo bizabagirira akamaro.

Buri mwaka Bridge2Rwanda ijyana abana mu mwiherero ikabaha ibyangombwa byose ubundi ikabaha ubumenyi mu masomo atandukanye
Abana bo muri Bridge2Rwanda bahabwa ubumemyi butandukanye buzabafasha guteza imbere imyigire yabo ya buri munsi
Umuyobozi ushinzwe gahunda ya RISE muri Bridge2Rwanda, Guy Merci Iradukunda yemeza ko bashaka gutegura abana b'Abanyarwanda ku buryo imishinga yabo nayo izajya ihangana ku rwego mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .