BRD yakajije ibihano ku batishyura inguzanyo bigiyeho n’abakoresha babo (Video)

Yanditswe na Iradukunda Serge
Kuya 17 Nyakanga 2020 saa 09:21
Yasuwe :
0 0

Banki Nyarwanda Itsura Amajyambere, BRD, yatangaje ko yakajije ibihano ku babonye akazi bakaba bataratangira kwishyura inguzanyo yo kwiga bahawe no kubakoresha batabakata.

Kuva mu 2016 BRD yahabwa inshingano zo gukurikirana no kwishyuza abanyeshyuri barihiwe na leta mu mashuri makuru na kaminuza, ishimirwa uruhare igira mu gukemura ibibazo byakunze kuranga izi nguzanyo.

Ibyo birimo kuboneka zitinze, kubonwa na bamwe abandi ntibazibone ndetse n’umuhate ishyira mu kugaruza aya mafaranga dore ko imaze kugaruza asaga miliyari 11 Frw.

Uburyo BRD yitwara muri izi nshingano bitanga icyizere kuko aya mafaranga yabashije kuyagaruza mu myaka ine mu gihe abari basanzwe bafite izi nshingano bari barabashije kugaruza agera kuri miliyari 12 Frw mu gihe cy’imyaka umunani.

N’ubwo intera imaze guterwa ishimishije, BRD ivuga ko kugeza uyu munsi igorwa n’abantu babona akazi ntibayimenyeshe ngo batangire bishyure ndetse n’abakoresha badakata abakozi babo barebwa n’iki cyemezo cyo kwishyura.

Umuyobozi w’ishami rya BRD rishinzwe inguzanyo z’abanyeshuri no kuzigaruza, Claudine Matata, ashima abakoresha bubahiriza iyi gahunda yo gukata abakozi babo akanibutsa abatabikora ko ari inshingano.

Ati “Abakoresha baradufasha, batadufashije twakabaye tutarazigeraho. Gusa ntabwo ari bose. Iyaba bose badufashaga nk’uko tubyifuza twari kuba aya mafaranga twarayarengeje cyane.”

“Abo bakoresha ndabasaba bamenye ko kwishyuza aya mafaranga ari itegeko, ni itegeko tugenderaho nk’uko bumva ko bagomba kwishyura umusoro ku mushahara, uko bumva ko bagomba gutanga amafaranga ajyanye n’ikiruhuko cy’izabukuru ni nako n’aya yandi mu gihe bahembye bagomba nayo kuyakuraho, aho bahuye n’imbogamizi bakatubaza.”

Matata akomeza avuga ko hari ibihano byagenewe abakozi batishyura izi nguzanyo n’abakoresha batabakata ndetse n’ababakata ariko amafaranga ntibayashyikirize BRD.

Ati “Ingamba zirahari cyane haba izo twatangiranye n’izo tugiye gushyiraho ubu, iyo tugiye gutangira gushyira mu bikorwa ni iyo guha ibihano abantu bataragira icyo bakora.”

Mu gihe umukozi atamenyesheje BRD ko yabonye akazi ngo atangire kwishyura inguzanyo ye, azajya acibwa inyongera ya 10% y’ayo yakagombye kuba yishyura buri kwezi.

Umukoresha udakata umukozi we nawe azajya acibwa 10% by’amafaranga yakabaye amukata buri kwezi ubundi akubwe umubare w’amezi amaze atayatanga.

Ku mukoresha wakase umukozi we ariko amafaranga ntayashyire kuri konti za BRD, we azajya acibwa inyongera ya 20% y’amafaranga yose yakabaye yaramutangiye.

Uretse ibi bihano, Matata asaba ko n’amabanki mbere yo guha abantu inguzanyo yazajya abanza kugenzura akamenya niba barishyuriwe na Leta ndetse ko batangiye kwishyura amafaranga bishyuriwe kuko nayo ari inguzanyo.

Itegeko rivuga ko mu minsi irindwi wabonye akazi, ugomba kuba watanze amakuru y’aho uherereye n’uko wabonye inguzanyo yo kwiga, iyo utabikoze nibwo ibyo bihano byifashishwa.

Abatarabona akazi, abikorera n’abari hanze y’igihugu bo barasabwa iki?

Claudine Matata aributsa abarebwa n’iki cyemezo ko ibyo kwishyura iyi nguzanyo bitareba abafite abakoresha gusa ko ahubwo bireba n’abikorera.

Ati “Wa wundi wikorera buriya nawe aba afite icyo arimo arinjiza, nawe ashobora kuba afite umushahara yigeneye tukamubarira tugendeye ku ijanisha rya 8% cyangwa akaza tukumvikana uburyo azajya yishyura.”

Matata avuga ko umuntu wahawe iyi nguzanyo aba ashobora kujya hanze y’igihugu nk’ibisanzwe, ariko akazirikana ko hari amafaranga abereyemo leta agomba kwishyura.

Ati “Wemerewe kujya hanze, kuko ushobora kuba ugiye hanze kugira ngo ushake wa murimo, kugira ngo ukore ariko ntabwo bivuze ngo nugerayo ya nguzanyo ikuvuyeho, dufite abantu bari hanze bamaze kwishyura baba batugezeho tukababwira amafaranga barimo kandi bakanayishyura neza.”

“Muri gahunda dufite ni uko tugomba no kuzagera ku bantu bari hanze batari mu gihugu, tugomba gukorana na Minisiteri y’Ububanyi n’Amahanga na Diaspora kugira ngo abantu aho bari hose bumve ko bagomba kwishyura.”

Abatarabona akazi bo basabwa kubimenyesha BRD cyane ko usabwa kwishyura ari uba afite icyo binjiza.

Mu gihe hari kwitegurwa itangira ry’amashuri, BRD yibukije abanyeshuri 4380 bisanze ku rutonde yashyize hanze rw’abataruzuza amasezerano ajyanye n’inguzanyo yo kwiga, ko bagomba kubikora bitarenze ku wa 31 Nyakanga 2020. Abanyeshuri bari ku rutonde ni abari basanzwe bari muri kaminuza muri uyu mwaka w’amashuri wa 2019/2020.

Abanyeshuri bigiye ku nguzanyo ya leta bakaba barabonye akazi barasabwa gutangira kwishyura
Umuyobozi w’ishami rya BRD rishinzwe inguzanyo z’abanyeshuri, Claudine Matata, yatangaje ko abatishyura izi nguzanyo bagiye gutangira guhanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .