00:00:00 IGIHE NETWORK KN KINYARWANDA EN ENGLISH FR FRANCAIS

Bitahiye iwabo, abandi bamenyereye gereza: Iherezo si rimwe ku bahoze mu mitwe yitwaje intwaro

Yanditswe na Ntabareshya Jean de Dieu
Kuya 26 May 2022 saa 07:04
Yasuwe :

Umuheto woshya umwambi bitari bujyane! Ni imvugo y’Ikinyarwanda bakoresha bashaka kuvuga ko umuntu ashobora gushora mugenzi we mu bintu runaka, nyamara ingaruka zaza zigahitana uwabikoze, uwamushoyemo yigaramiye.

Ku wa Kabiri mu karere ka Musanze abantu basaga 760 barimo 474 bahoze ari abasirikare, barimo 32 bari ba ofisiye bakuru mu mitwe ya CNRD na FLN, basubijwe mu buzima busanzwe.

Ni nyuma y’imyaka ibiri n’igice bari bamaze batozwa uburere mboneragihugu ndetse banigishwa imyuga n’ubumenyingiro.

FLN ni umutwe wa gisirikare ushingiye kuri MRCD yashinzwe na Paul Rusesabagina, wakatiwe gufungwa imyaka 25.

Mu basezerewe harimo Brig Gen Mberabahizi David, uvuga ko yari umujyanama wa Gen Irategeka bikekwa ko yiciwe mu mashyamba ya Congo.

Mu gihe Mberabahizi atashye, umuhungu wa Sebuja, Ndagijimana Jean Chrétien, ari muri gereza kuko yarezwe muri dosiye imwe na Rusesabagina, ndetse yakatiwe gufungwa imyaka itatu.

Mu batashye kandi harimo Colonel Gatabazi Joseph. Mu buryo bw’inshingano mu mutwe wa FLN, yari ushinzwe Ibikorwa, abo mu nyito za gisirikare bita Chief J3.

Uyu mugabo w’imyaka 51 avuka mu Karere ka Kamonyi mu Murenge wa Musambira mu Majyepfo y’u Rwanda. Yagiye mu gisirikare muri Gicurasi 1994, mu Ishuri rya gisirikare rya ESM.

Muri icyo gihe Ingabo za RPA zari zikomeje kotsa igitutu ingabo za leta y’icyo gihe, bituma atangira amahugurwa bageze ku Kigeme muri Gikongoro bahunga.

Yageze muri Repubulika Iharanira Demokarasi ya Congo ku wa 6 Kamena 1996, ahabwa ipeti rya adjudant, akomeza ahunga ndetse agera muri Congo Brazaville.

Kimwe n’abandi basirikare b’Abanyarwanda bahunze, yaje guhamagarwa n’ubutegetsi bwa Laurent Desire Kabila ngo abashyire mu basirikare bamufashe kurwana, abizeza kuzabafasha kwisubiza u Rwanda.

Gatabazi ni umwe mu baje gutangirana n’umutwe wa FDLR, maze mu 2001 ahabwa ipeti rya Captain, mu 2006 aba Major, aza kuzamurwa mu ntera aba Lieutenant Colonel, ageze mu mutwe wa CNRD mu 2017 bamugira Colonel, akomereza muri FLN.

Ni umugabo muto muto uvuga ko yakundaga gusenga cyane, ku buryo mu ishyamba bamwitaga Ave Maria (Ndakuramutsa Maria).

Benshi muri aba barwanyi bageze mu Rwanda mu 2019, nyuma y’ibitero simusiga FLN yagabweho n’ingabo za Congo, zirabatatanya, benshi baricwa, abarokotse boherezwa mu Rwanda.

Ni umutwe wari waragabye ndetse wigamba ibitero byagabwe mu Rwanda mu nkengero z’ishyamba rya Nyungwe, mu turere twa Nyaruguru, Nyamagabe na Rusizi mu 2018 na 2019.

Byishe abaturage b’inzirakarengane, ari nayo mpamvu benshi mu bagize FLN batahutse bakurikiranweho ibyaha by’iterabwoba birimo ubwicanyi, gutwika, gufata bugwate abantu n’ibindi.

Ubwo bageraga mu Rwanda, abari abasivili bahise bashyirwa mu nkambi ya Nyarushishi mu Karere ka Rusizi, abari abasirikare bajyanwa i Mukamira, bakomereza i Mutobo mu kigo kinyuzwamo abari abasirikare ngo basubizwe mu buzima busanzwe.

Aho ni ho inzego z’ubutabera zagendaga zifata abakekwaho ibyaha, ari naho Nsengimana Herman wasimbuye Nsabimana Sankara ku buvugizi bwa FLN, Angelina Mukandutiye n’abandi bakuwe.

Gatabazi kimwe na Brigadier General Mberabahizi David bajyanywe i Mutobo.

Mu kiganiro yigeze kugirana na IGIHE akigera mu Rwanda, yaciye amarenga nk’ufite icyizere cy’ubuzima bwo hanze ya gereza.

Icyo gihe yagize ati "Icyizere cya mbere ndagishingira kuri Leta, nimpa akazi nzagakora, nibanshyira mu gisirikare nacyo nagikora, aha niho nabona n’uwo mushahara ukamfasha gushinga ubuzima, nkubaka inzu nkanagira umuryango."

"Ariko na none ntabonye akazi muri Leta nakwiyambaza inshuti n’abavandimwe kuko Abanyarwanda barakundana, hari abo twiganye nabo bagize icyo bamarira nagira agashinga gaciritse nakora nkiteza imbere. Gusa numva ahanini leta imfashije nkabona akazi nakora, byanakunda nkaba nakomeza amashuri nkiga kuko ubumenyi mfite ntabwo numva bumpagije ku buryo nabushingiraho."

Mu iburanisha rya dosiye ya Nsabimana, Rusesabagina na bagezi babo, iri zina Gatabazi ryagarutsweho.

Ntabwo yafunzwe nk’abandi, icyakora yakoreshejwe inyandikomvugo n’ubugenzacyaha.

Col Gatabazi nk’uwari Chief J3 muri FLN, ni we wakabaye yarateguye ibitero byo muri Nyungwe.

Mu rubanza rwabaye muri Mutarama mu Urukiko rw’Ubujurire, Nsabimana yabwiye urukiko ko icyo atemeranyaho n’abashinjacyaha, ari uko uyu munsi nk’uwari umuvugizi wa FLN arimo kubazwa ibikorwa bya gisirikare aho kubazwa abari bayoboye ingabo.

Ati "Bakumva ko ari njye ukwiye kubibazwa mu gihe Colonel Gatabazi Joseph wari ushinzwe ibikorwa bya gisirikare, ni we wari ushinzwe kugaba no gutegura ibitero muri FLN yose, Etat Major yose ya FLN, ni umu-Colonel, bamujyanye i Mutobo, bamujyana mu ngando ngo bamusubize mu buzima busanzwe kandi ari we wari ushinzwe ibyo bikorwa bya gisirikare."

"Noneho bakongera bagahindukira ngo ni njye ugomba kubibazwa, njye wari uri muri Comores, kandi uwari uhari biba ari we mbere na mbere wagakwiye kuba abazwa ibyo bitero bya gisirikare kuko ni yo nshingano yari afite muri FLN, bo bakumva ko yajya mu buzima busanzwe, hanyuma Sankara wari umuvugizi, udafite ijambo na rimwe ku ngabo za FLN, we agafungwa imyaka 25. Aho niho mbonamo nk’akarengane."

Nsabimana yaje guhamwa n’ibyaha by’iterabwoba akatirwa gufungwa imyaka 15 kubera impamvu nyoroshyacyaha.

Mu kiganiro aheruka kugirana na IGIHE, Gatabazi yavuze ko ibitero byo muri Nyungwe byakozwe mu buryo bw’ibanga, akabyumva byabaye.

Ati "Amakuru yatugeragaho bakayatubwira, ariko burya icyaha ni gatozi, sinigeze mbigiramo uruhare. Hari abari bashinzwe kubitegura bakaba ari nabo bohereza abantu muri Nyungwe, sinigeze mbona akanya ko kubitegura ahubwo numvaga ngo hakozwe iki, ahanini hagendaga abantu baziranye."

"Muri uyu mutwe hari abantu barebaga bakabakeka, nkanjye nari mu bantu bakeka ko bakorera Leta ya Kigali, ntabwo bakundaga kumbwira amabanga menshi cyane cyane ayo muri Nyungwe, njye n’urupfu rwanjye nzapfa mvuga ko iyo dosiye ntacyo nyiziho, uretse kuyisoma mu binyamakuru."

Nubwo benshi mu bagize imitwe ya FLN n’indi yashinzwe nyuma ya Jenoside yakorewe Abatutsi mu 1994 imaze guhashywa ku rwego rwo hejuru, hari abakomeje kuyigumamo, bateye inkeke ku mutekano w’igihugu.

Ibyishimo kuri Gatabazi

Nyuma yo gusezererwa, Colonel Gatabazi yabwiye IGIHE ko impamvu batatekerezaga gutaha mu Rwanda byaterwaga ahanini nuko babeshywaga byinshi, birimo ko ugeze mu Rwanda ashobora kwicwa.

Ati "Uyu munsi ni ibyishimo byuzuye kuba tubashije kuba Abanyarwanda nyuma y’igihe kirekire duteza umutekano ku gihugu cyacu ndetse no mu Karere k’ibiyaga bigari. Turashima cyane ubuyobozi bw’igihugu bwatwakiriye bagaca inkoni izamba by’umwihariko Perezida wa Repubulika y’u Rwanda Paul Kagame."

"Impamvu twatindaga gutaha ni uko twabeshywaga byinshi, by’umwihariko nkanjye wari mu bayobozi bakuru bwo sinanabonaga n’urwinyagamburiro, ariko nyine igihe cyari kigeze ngo dutahe mu Rwanda."

Yavuze ko bisanze mu Rwanda mu buryo bugoye, ariko mu gihe gito bamaze i Mutobo, bagaruye ubuzima.

Ati "Twaje mu buryo bugoye tugera hano benshi muri twe barashaje, kubera ubuzima bukarishye, ku buryo umuntu wageze hano batwakira ashobora kubona hari abo atabona kubera uburyo igihugu cyatwakiriye, benshi twabaye ibibonge ubusaza bushiraho."

Yongeyeho ati "Ntitwafashwe neza ku mubiri gusa ahubwo banaturinze kugwingira ku bwonko, twize uburere mboneragihugu ku buryo ibyo twibwiraga ko ari ukuri turi mu mashyamba ahubwo twasanze baratubeshye."

"Inyingisho twahawe ziratwemerera kubana neza n’abanyarwanda tuzasanga mu gihugu. Twahawe inyigisho zituma twinjira ku isoko ry’umurimo, twize byinshi, ubu bamwe bakoresha amaboko yabo abandi baba barwiyemeza mirimo."

Col. Gatabazi Joseph ahamya ko mu gihe bo basubiye mu buzima busanzwe, imitwe babagamo iri mu marembera.

Ati "Intego twari dufite yari iyo gutera ubutegetsi buriho tukabukuraho, ariko twasanze bitashoboka. Icyo nabwira abandi basigaye yo ni uko bataha bakareka kwibeshya kuko ubuzima bwo mu Rwanda ari bwiza."

Hagenderwa kuki bamwe bafatwa, abandi bagataha?

Umuyobozi wa Komisiyo ishinzwe gusezerera no gusubiza mu buzima busanzwe abahoze ari abasirikare, Nyirahabineza Valerie, yabwiye IGIHE ko kugira ngo bamwe bakurikiranwe abandi batahe kandi babaga mu mutwe umwe witwaje intwaro, biterwa n’impamvu zitandukanye.

Kubarobanura ngo ntibikorwa na Komisiyo ubwayo, ahubwo inzego zitandukanye zishinzwe iperereza no kugenza ibyaha ziba zizi abagomba gukurikiranwa bigendanye na dosiye ya buri muntu.

Yavuze ko ahanini abahungiye muri Congo harimo abagize uruhare muri Jenoside yakorewe Abatutsi 1994. Abo iyo batahutse Urwego rw’ubugenzacyaha (RIB) rugaragaza amadosiye yabo n’ibyaha bakurikiranwaho, bakajyanwa mu nkiko.

Hari n’abandi ariko bajyanwa mu nkiko bashinjwa kuba mu mitwe yitwaje intwaro irwanya Leta, ariko ngo bikorwa hagendewe ku makuru inzego ziba zibafiteho.

Icyo gihe ngo iyo "hatabonetse raporo cyangwa dosiye ifatika ishinja umugenerwabikorwa mu bahungutse ku buryo yakoherezwa gukurikiranwa n’inkiko agororwa gusa, ahabwa uburere mboneragihugu ndetse agafashwa no guhabwa amasomo azamufasha mu kwihangira imirimo no kwibeshaho."

Nyirahabineza avuga ko nyuma yo gusezererwa, bashobora kwifashishwa mu bikorwa bitandukanye by’umwihariko bigamije kubungabunga umutekano w’igihugu.

Mu bishoboka harimo gushyirwa mu ngabo, mu rwego rw’inkeragutabara n’ahandi bashobora kwitabazwa.

Colonel Gatabazi ashyikirizwa impamyabushobozi nk'uwasoje amasomo i Mutobo
Gatabazi ahamya ko bahindutse mu myumvire
Nsabimana Callixte yagaragaje ko atumva impamvu yafunzwe, abayobozi be bagataha
I Mutobo, abatahutse batozwa imyuga itandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .