Bimwe mu bimenyetso n’amarenga byaganishije kuri Jenoside yakorewe Abatutsi

Yanditswe na Nkurunziza Ferdinand
Kuya 7 Mata 2020 saa 06:52
Yasuwe :
0 0

Jenoside yakorewe Abatutsi ni igikorwa cyakozwe mu buryo butandukanye kandi bufite umwihariko, aho igice kimwe cy’abenegihugu cyafashe umwanzuro wo kwica abandi basangiye igihugu babaziza ubwoko.

Amateka agaragaza ko inyigisho zishingiye ku ivanguramoko zigishijwe abanyarwanda kuva kera mbere y’uko u Rwanda rubona ubwigenge.

Ubukana bwa Jenoside yakorewe Abatutsi bugaragaza neza uburyo abakangurambaga n’abacurabwenge ba Jenoside ari bo baremye abicanyi bakoze Jenoside binyuze mu nyigisho zikomeye batambutsaga mu buryo butandukanye.

Mu mugambi mugari wo gutsemba Abatutsi, abacurabwenge ba Jenoside babanje guhakana no gusibanganya isano ya bo na ba nyiramukubitwa (Abatutsi), babatwerera amabi yose yagwiriraga igihugu, binyuze mu mahuriro n’amashyaka bacuriragamo imigambi yo gukora Jenoside.

Inyandiko zibiba urwango

Hari agatabo kanditswe na Leta yakoze Jenoside binyuze mu yari Minisiteri y’Itangazamakuru, kasomwe ku munsi w’ubwigenge mu 1972. Ku rupapuro rwa kabiri rwa ko hari amagambo akomeye yahemberega urwango mu banyarwanda.

“Uwavuga akarengane no gusagarirwa kwa rubanda rugufi, ari rwo ahanini mwene Gahutu byakwiriza umunsi bigasingira undi. Ingoma Ntutsi, iyo ngoma ni yo nkuruzi y’ibyago mwene gahutu yagize byose, ikaba yari imeze nk’ikiguri cy’ubugiranabi.”

“Ingoma ya Gatutsi na Kazungu, aho abazungu badukiye mu Rwanda, aba banyamahanga bombi (Abatutsi n’abazungu) basangiraga kunyunyuza amaraso no kurya imitsi ya Gahutu, baramwonka karahava. Muri icyo gihe Abahutu barahumuka banga gushirira ku icumu […] ni bwo basabye ko ubwo bugome bwakwimurwa mu gihugu bugaha icyicaro ubuvandimwe n’umudendezo kuri bose.”

Aha hagaragaramo uburyo buri kintu kibi cyose cyagombaga gutwererwa ba nyiramukubitwa (Abatutsi) ndetse no kugaragaza ko ubwicanyi bwari bwarabaye mu 1959 ari ikintu cyiza bagereranya no kuba hari abantu bitabaraga mu gihe bari bagiye kugirirwa nabi.

Amategeko 10 y’abahutu yanditswe na Gitera yabanje kwandikwa mu Gifaransa nyuma ashyirwa no mu Kinyarwanda. Aya mategeko ubwayo yari nk’umuti w’uburozi wahawe intagondwa zari zimaze kumva neza inyigisho z’amacakubiri.

Amagambo ya Habyarimana agira ati “Ndi ikinani cyananiye abagome n’abagambanyi” na yo agaragaza uburyo hakoreshwa imvugoshusho zigaragaza ko hari umugambi mugari wo kwikiza Abatutsi.

Abagome bavugwaga muri iyi mvugo ni Abatutsi, mu gihe abagambanyi bari abahutu batemeraga politiki y’ivanguramoko ya Habyarimana.

Umushakashatsi ku mateka ya Jenoside, Tom Ndahiro, avuga ko icyo gihe hari hari inzira zitandukanye zakoreshwaga mu kubiba urwango mu banyarwanda nk’indirimbo n’inyandiko zerekanaga ko abahutu basinziriye, abatutsi babakiranye nyamara bari bakwiye kumenya ko igihugu ari icya bo (Abahutu).

Hari n’Abihayimana banenze leta bavuga ko isinziriye, abatutsi bakaba benshi mu mashuri no mu mirimo.

Inyandiko mpine ya Dr Léon Mugesera yamamaye cyane mu mahanga yo yavugaga ko inkotanyi zishaka gukorera Jenoside abahutu, zikongera kuzana ubwami mu karere ka Afurika y’iburasirazuba, kandi zifite ikimenyetso kimeze nk’icy’abanazi.

Itangazamakuru ryabaye umuyoboro wo kubiba urwango

RTLM ni yo yari ku isonga mu gukwirakwiza urwango mu banyarwanda. Mbere y’aho hari ibinyamakuru bikomeye nka Kangura na La Relève byandikaga inkuru zikangurira Abahutu kwanga Abatutsi.

Ikinyamakuru ‘La Releve’ cyandikirwaga cyane abize n’abanyamahanga, cyari kirimo ibintu abanyamahanga batashoboraga kwizera ko bishobora kuba mu Rwanda.

Abanyarwanda hagati ya bo ni bo babiganiragaho gusa kuko hari ibihugu byari bifite amategeko ashobora guhana ababyanditse.

Mu 1992, imbwirwaruhame ya Mugesera yakanguriye Abahutu kwica Abatutsi, aho yavuze ko Abatutsi bakwiye kunyuzwa iy’ubusamu.

Indirimbo z’uwitwa Bikindi Simon zanyuzwaga kuri RTLM ndetse na radio na televiziyo by’igihugu zari zigizwe n’amagambo akomeye yagaragazaga ko hari umugambi wo gutsemba Abatutsi bagashira.

Iyitwa ‘Twasezereye’ yasohotse mu 1989 yaramamaye cyane muri Jenoside kubera amagambo yari ayigize yahamagariraga buri cyiciro cyose cy’abanyarwanda by’umwihariko urubyiruko kwibuka ibikorwa byatumye Abatutsi birukanwa mu gihugu, bityo ko igihe kigeze ngo bongere bikize n’abandi basigaye mu Rwanda.

Izindi ndirimbo nk’izitwa ‘Akabyutso n’Intabaza’ humvikanamo imvugoshusho ibwira abantu bakuru kuruta urubyiruko kuko abakuru ari bo bagombaga kubwira abana.

Hari kandi na ‘Nanga ibihutu by’ibyihuture’ yakunzwe cyane n’abahezanguni b’Abahutu, bakajya banayibyina kubera uburyo yari icurangitse ariko inatanga ubutumwa bwo kwanga Abahutu batemeraga ibyakorwaga n’ubutegetsi bwari buriho icyo gihe.

Inama zidasanzwe zahuzaga intiti, inzego za Leta n’iz’umutekano

Dr Emile Rwamasirabo wigaga ubuvuzi muri Kaminuza y’u Rwanda mu 1972, avuga ko mu ishyamba rya Kaminuza i Butare haberaga inama nyinshi zitabirwaga n’abayobozi mu nzego za Leta n’iz’umutekano babaga bari kumwe na bamwe mu bafatwaga nk’intiti icyo gihe.

Muri icyo gihe hari gahunda yo kuza gushaka abanyeshuri bigaga muri Kaminuza, bakajya mu gisirikare, ariko abo mu bwoko bw’Abatutsi bitwaga abanyamahanga ntibemererwaga kujya mu gisirikare.

Ibi byiyongera kuri politiki y’iringaniza yari yarashyizweho na Leta y’icyo gihe, aho abana b’abahanga b’abatutsi batari bemerewe gukomeza amashuri n’ubwo babaga batsinze kuko imyanya yabanzaga guhabwa abo mu bwoko bw’Abahutu.

Benshi muri bo berekeje iy’ubuhungiro bajya kwiga hanze y’u Rwanda.

Ababashije guhunga bakajya kwiga hanze barahigwaga, abanyeshuri bari baragiye kwiga kuri bourse ya Leta iyo bageragezaga kumenyana n’abanyeshuri b’impunzi bakatirwaga bourse.

Odette Nyiramirimo wigaga mu mashuri yisumbuye mu 1972, avuga ko abari mu mashuri yisumbuye batangiye gutozwa umuco w’amacakubiri, abo mu bwoko bw’abahutu bagashaka gukubita Abatutsi.

Ibi abihuriraho Dr Emile Rwamasirabo wigaga muri Kaminuza y’u Rwanda icyo gihe, uvuga ko hari udutsiko tw’abantu bari biganjemo abakomoka mu cyahoze ari Ruhengeri na Gisenyi twahoraga turekereje dushaka guhohotera Abatutsi biganaga.

Ati “Hari amalisiti yamanitswe kuri Kaminuza asaba abayagaragaraho kuva muri kaminuza bagataha iwabo. Ntituzi uwari yayamanitse, ariko abari bayariho bose bavuye mu ishuri batarangije kwiga.»

Ishyaka PARMEHUTU ryari rifite umurongo ngenderwaho ko uburezi n’imirimo ari ibya mwene Gahutu kuva u Rwanda rwabona ubwigenge.

Ubwicanyi bwo mu 1959 bwagaragazwaga nk’ubwacikirijwe, abacengezamatwara bakavuga ko hakwiye gukorwa ikindi kintu cyatuma abahutu bamara indi myaka 30 barya bakaryama mu mahoro.

Ntibyoroshye ko abakiri bato bamenya imvugoshusho zakoreshwaga icyo gihe ndetse n’ubu zikaba zigikoreshwa n’abahakana bakapfobya Jenoside yakorewe Abatutsi.

Uyu ni umukoro w’abakuru bagomba kurushaho gusobanurira abato icyo imvugo nk’izo zabaga zihatse.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .