00:00:00 IGIHE NETWORK KN KINYARWANDA EN ENGLISH FR FRANCAIS

Bimwe mu bikoresho byafungishije abayobozi bakuru ba IPRC Kigali

Yanditswe na Igizeneza Jean Désiré
Kuya 24 Ukwakira 2022 saa 03:40
Yasuwe :

Nyuma y’uko Guverinoma y’u Rwanda ifunze by’agateganyo IPRC Kigali mu gihe cy’ibyumweru bibiri, hagaragajwe ko bimwe mu bikoresho byibwe harimo iby’abanyeshuri, iby’ishuri ndetse n’ibindi biri mu mutungo rusange.

Kuri iki Cyumweru nibwo Minisiteri y’Uburezi yatangaje iki cyemezo, kugira ngo hakorwe iperereza ku bujura n’imyitwarire mibi yo kwiha umutungo rusange wa Leta.

Ibi bibazo byanatumye Urwego rw’Igihugu rw’Ubugenzacyaha, RIB, ruta muri yombi Umuyobozi mukuru wa IPRC-Kigali, Eng Mulindahabi Diogène, Umuyobozi Ushizwe Imari Muhimpundu Vander Thomas na Uwantege Mediatrice ushizwe ibikoresho n’abandi bakozi b’iri shuri, mu gihe iperereza rikomeje.

Umunyamabanga wa Leta muri Minisiteri y’Uburezi, Irere Claudette, yabwiye RBA ko ibikoresho byibwe biri mu byiciro bitatu birimo iby’abashyeshuri, ibikoresho bwite bya IPRC Kigali n’ibibarirwa mu mutungo rusange.

Ibibarirwa mu mutungo rusange ni ibikoresho byakozwe n’aya mashuri y’ubumenyingiro bigamije gufasha Leta muri gahunda yo kugaburira abanyeshuri bo mu bigo bitandukanye by’igihugu.

Irere ati "Ibyo birimo cyane cyane ibitekerwamo nka za muvero. Nabyo biri mu bikoresho byibwe ariko kandi ntabwo iperereza umuntu ariha imbago, bitewe n’ibyo bazagenda babona bazatwereka niba koko harimo n’ibindi."

Yavuze ko bamenye ko muri IPRC Kigali habayemo ubujura bitewe n’uko hari bimwe mu bikoresho byagendaga bibura mu buryo budasobanutse, byatumye hagaragara ko harimo ikibazo.

Ku bijyanye n’uko iri shuri rifunzwe mu bihe amasomo yari arimbanyije, Irere yavuze ko muri IPRC habamo ibigo bibiri, icy’amashuri yisumbuye n’icy’amashuri makuru.

Ku banyeshuri bo mu mashuri makuru, amasomo bari bayageze ku musozo. Irere yakomeje avuga ko ikibazo kiri ku ishuri ryisumbuye kuko bagiye gutakaza amasaha menshi yo kwiga.

Gusa asaba aba banyeshuri ko iyi minsi batayifata nk’ikiruhuko ahubwo bagomba gusubiramo amasomo yabo.

Ati "Umunsi bagarutse ku ishuri tubifatanijemo n’abarimu tuzashyiraho gahunda yihutishwa, aho bizasaba ko twongera amasaha, haba muri weekend cyangwa mu biruhuko kugira ngo bige umwanya munini. Tuzabikora mu kugaruza uyu mwanya wose bazaba bamaze batari ku ishuri."

Raporo y’Umugenzuzi mukuru w’Imari ya Leta igaragaza ko hari ibikoresho byagiye bigurwa ku biciro by’umurengera, Irere akavuga ko bidafitanye isano n’ibi byibwe n’ubwo nayo ari itoroshi nziza itungwa aho ibibazo biri, ubundi bigakurikiranwa.

Ati "Nk’ubwo twahise tubona ko hari ikibazo mu mitangire y’amasoko y’ibi bikoresho. Icya kabiri byatugaragarije ko dufite ikibazo mu kugenzura, igihe ibikoresho byaguzwe bikishyurwa twebwe tukajya kugenzura ku mashuri tukareba ngo n’ibiki byagezeyo."

Yavuze ko bagiye kwikubita agashyi mu bijyanye n’imigenzurire y’igurwa ry’ibikoresho, ahamya ko byongeye gusubira byaba ari ibibazo.

Irere avuga ko n’ubwo iri gurwa ry’ibikoresho ku biciro by’umurengera ridafite aho rihuriye n’ubu bujura bwabaye muri IPRC Kigali, "mu iperereza nibigaragara ko na bimwe mu bibazo iri shuri rifite na byo birimo nabyo bazabirebaho."

Abayobozi bakuru ba IPRC Kigali batawe muri yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .