Babinyujije mu ndirimbo bahuriyemo uko ari batatu, umuhanzi Ben Kayiranga, Naissy n’umunyarwandakazi umaze kubaka izina ku isi mu kubyina, Marie Mwiza Ndutiye bagejeje ubutumwa bwabo ku Banyarwanda babibutsa ko Jenoside idateze kuzongera kubaho ukundi.

Muri iyi ndirimbo yitwa Komera, Ben Kayiranga na bagenzi be Naissy n’umubyinnyi Marie Mwiza Ndutiye, batanze ubutumwa bwibutsa Abanyarwanda ko kwibuka ari uguhozaho. Aba bahanzi mu butumwa boherereje IGIHE, bashimangiye ko kwibuka bitarangirana n’icyumweru cyo kwibuka gusa ahubwo bikomeza na nyuma y’iminsi 100 u Rwanda rwibuka Jenoside yakorewe Abatutsi akaba ari muri urwo rwego bashyize hanze iyi ndirimbo.

Hano Ben Kayiranga yari kumwe na Marie Mwiza Ndutiye Ninja mu Bufaransa ubwo bari bagiye kwifatanya n'abandi Banyarwanda bahatuye gutangira icyumweru cy'icyunamo.

Ben Kayiranga ati, “Imyaka yose u Rwanda ruribuka, twibuka abacu bazize Jenoside. Muri iyi minsi 100 yo kwibuka, ihwanye n’igihe Jenoside yamaze. Itariki ya 7 Mata 2014 niyo yabimburiye kwibuka ku nshuro ya 20 Abatutsi bazize Jenoside. Ntabwo bigomba kurangirira aho gusa ahubwo bigomba gukomeza guha agaciro abazize Jenoside”

Binyuze muri iyi ndirimbo, aba bahanzi bavuze ko bihurije hamwe kugira ngo bibutse Abanyarwanda n’amahanga ko iyi Jenoside idateze kuzongera kubaho ukundi.

Ben Kayiranga ati, “Twihurije muri iyi ndirimbo kugira ngo tubabwire ko bitazongera kubaho ukundi. Ntabwo bizongera ukundi”

Album ya kane ya Ben Kayiranga yakozwe na Pastor P gusa

Iyi ndirimbo Komera, ni imwe mu zigize album ye ya kane yise Ntunsige. Indirimbo ziyigize zatunganyijwe na Producer Pastor P wo muri Beyond Records.

REBA AMASHUSHO Y’IYI NDIRIMBO KOMERA:

Ben Kayiranga ati, “Iyi ndirimbo ni yo ibanziriza album yanjye ya kane . Hari hashize imyaka 3 tuyitegura na Pastor P. Ndamushimira byimazeyo kuko nyuma yo kuyumva no kumvisha inshuti n’abavandimwe bagiye bazumva bambwira icyo bayitekerezaho byansubije icyizere n’imbaraga zo kuyisohora nta n’abatera nkunga mfite. Uretse inshuti zagiye zinyereka ko zimfitiye icyizere mu gukoresha ijwi ryanjye neza ubu dushobora gutangira gutegura ibitaramo”

Mu myaka 20 Marie Mwiza Ndutiye benshi bita Ninja(ubyina muri iyi ndirimbo) amaze akora uyu mwuga wo kubyina yateye intambwe ishimishije haba ku mugabane w’u Burayi, Amerika n’ahandi dore ko yagiye akorana n’abahanzi bakomeye ku isi barimo Katy Perry, Lionel Richie, Ben L’Oncle Soul, Kiddy Smile, Shy’m, David Guetta, M Pokora....

[email protected]