00:00:00 IGIHE NETWORK KN KINYARWANDA EN ENGLISH FR FRANCAIS

Bazirikanye igihango: Imbamutima z’abaturage ba Gishambashayo bafitanye amateka n’Inkotanyi

Yanditswe na Evence Ngirabatware
Kuya 28 Ukwakira 2022 saa 12:29
Yasuwe :

Burya koko gira So yiturwa indi! Igihango n’umubano w’akadasohoka abaturage ba Gishambashayo bafitanye n’ingabo zahoze ari iza RPA ntibizibagirana kandi imbuto zabyo zituma bahorana akanyamuneza ku mutima no ku mubiri.

Abaturage ba Gishambashayo mu Murenge wa Rubaya mu Karere ka Gicumbi, bafite amateka yihariye mu gufatanya n’ingabo zahoze ari iza RPA ubwo zatangizaga urugamba rwo kubohora u Rwanda kuva mu myaka ya 1990 kugera 1994, ni ibintu bitari byoroshye ariko byashobotse none uyu munsi barasarura imbuto z’ubwo bufatanye.

Tariki ya 4 Nyakanga 2015, ubwo u Rwanda rwizihizaga umunsi wo kwibohora ku nshuro ya 21, Perezida Kagame yavuze ko abaturage ba Gishambashayo bafashije ingabo za RPA kuko ‘babarinze, bakabagaburira ndetse babafasha urugamba, bityo ngo umunsi wahizihirijwe mu buryo bwo kubitura nubwo uko babibuka kose bidahagije ugereranyije n’ukuntu bitanze.

Bamwe mu baturage bakuraga ibiribwa mu mirima yabo, ndetse bakabigemura mu bice byarimo imirwano babyikorereye ku mitwe yabo, bagafasha ingabo zari iza RPA kumenya amakuru y’aho ingabo za Habyarimana zabaga zikambitse, kwasa inkwi, kuvoma amazi n’ ibindi.

Kuri uyu munsi, aka gace kituwe ineza kagiriye izi ngabo harimo ibikorwaremezo begerejwe n’izi ngabo byiganjemo kubakirwa amashuri y’abana babo ataraharangwaga, umuhanda mwiza ubahuza n’umurenge wa Cyumba na Manyagiro byo mu karere ka Gicumbi, ndetse ukabahuza n’umurenge wa Bungwe werekeza mu karere ka Burera.

Bubakiwe n’ikigo nderabuzima cya Gishambashayo kigezweho, banahabwa isoko rya Kijyambere rigezweho ribafasha kudasubira kurema amasoko yo hakurya y’umupaka banyuze mu nzira zitemewe.

Abaturage bavuga ko yaba imihanda, amashuri, ivuriro ndetse n’isoko rigezweho byose babigejejweho mu murenge wa Rubaya ari nawo urimo akagari ka Gishambashayo, kandi bakabihabwa n’ingabo z’igihugu za RDF. Ni ibikorwa bafashe nk’igihango bafitanye nazo.

Siboyintore Evariste utuye mu mudugudu wa Nkurura, Akagari ka Gihanga mu murenge wa Rubaya, yakoraga akazi ko gusoroma icyayi. Yamenye ingabo za RPA ubwo bahuraga zikabagota zikababwira ko bagomba kuguma iruhande rwazo aho kugenda berekeza ahari amasasu n’ibindi biturika.

Ati “Duhura nabo bwa mbere batubajije niba tuzi inyenzi, turababwira ngo tuzumva kuri Radio, bahita badusobanurira ko bitwa Inkotanyi kandi ko nta nyenzi igenda ivuga ikinyarwanda. Twatangiye kubafasha, ariko nabo kuri ubu baduhaye amashuri meza abana bacu bamaze kwigiramo byinshi bigezweho, bazi gusoma no kwandika, nta mwanda ukibarwangwaho”.

Siboyintore akomeza agira ati “Baduhaye ishuri ryiza rya Gishambashayo nta mwana wacu ukirangwa n’amavunja nkuko mbere byahoze kuko abarimu babigisha isuku, batangiye kumenya gusoma no kwandika, amashuri yadufashije ko abana badakomeza kwijandika muri Kanyanga, abasirikare bayaduhaye nk’igihango natwe mubatubwirire ngo turabashimira”.

Nyirantezimana Emelita nawe utuye mu murenge wa Rubaya, ashima ko bahawe ikigo nderabuzima kigezweho kuko mbere ngo bakoraga urugendo runini bajya kwivuriza mu murenge wa Bungwe uri mu karere ka Burera.

Ati “Kwikorera umurwayi ukajya mu kandi karere ntibyari byoroshye, ivuriro rito baduhaye rifite ububasha bwo gucumbikira abarwayi, twivuza amaso, nta muturage ukijya kwikuza amenyo muri Uganda kuko hano izo serivisi zirahakorera kandi tugasubira mu rugo nta kibazo”.

Yongeraho ko iyo bibaye ngombwa ko umurwayi yoherezwa ku bitaro bikuru, bahita bahamagara Imbangukiragutabara ikaza yihuta kubera umuhanda mwiza na wo bakorewe n’ingabo za RDF, ubafasha mu guhahirana n’ indi mirenge cyangwa muri serivisi z’ubuzima.

Impinduka ni zose mu mibereho y’abatuye Gishambashayo

Ubwo IGIHE yasuraga ibikorwaremezo begerejwe n’ingabo z’igihugu (RDF), byiganjemo amashuri, ivuriro, umuhanda ndetse n’isoko rya kijyambere, yasanze impinduka mu mibereho y’aba baturage zivugira.

Umuyobozi w’ishuri rya G.S Gishambashayo, Mugenzi Emmanuel, yavuze ko iri shuri ryatangiye mu 2015 kandi ryaruhuye abana bakoraga ingendo ndende bajya kwiga.

Yagize ati “Mbere abana ba Gishambashayo bajyaga kwiga bakoze nibura ibirometero bitanu, kubona ishuri hano byorohereje abana”.

Mugenzi yavuze ko uyu munsi iri shuri rifite abanyeshuri 469 mu mashuri abanza, 127 mu mashuri yisumbuye ndetse n’abiga mu ishuri ry’ inshuke bagera kuri 73.

Ati “Turashima ko babasha no kubona amafunguro ku ishuri nk’ inkunga bemerewe n’ubuyobozi bw’igihugu”.

Iri shuri ryatangiye ari amashuri abanza gusa, nyuma ryongerwamo icyiciro rusange kuko abana bajyaga kwiga kure bakagera mu rugo barushye kuko hari n’abigaga mu Karere ka Burera.

Umuyobozi w’ivuriro rito rya Gishambashayo, Munyaneza Jean Claude, avuga ko iri vuriro ryafashije cyane abaturage bajyaga kwivuza muri Uganda, kubera hari serivisi zitabonekaga mu murenge wa Rubaya.

Avuga ko abenshi bajyaga hakurya y’umupaka kwivuza amaso n’amenyo, ariko ubu byose babyivuriza Gishambashayo.

Ati “Ivuriro rya Gishambashayo twakira abantu bagera kuri 900 ku kwezi, dutanga serivisi z’isuzumiro rusange, kubyaza, ubuvuzi bw’amaso, ubw’amenyo, dufite aho ducumbikira umurwayi, dufite ubushobozi bwo kuvura indwara zose abatuye hano bakenera kwivuza”.

Iyo bibaye ngombwa ko umurwayi yoherezwa ku bitaro bikuru bya Byumba birakorwa mu gihe kera wasangaga hari abajya muri Uganda.

Umunyamabanga Nshingwabikorwa w’Umurenge wa Rubaya, Bangirana Jean Marie Vianney, avuga ko bakomeje gufatanya n’abaturage kubungabunga neza ibikorwaremezo begerejwe n’ingabo, mu rwego rwo kubafasha kurushaho kujya mu mibereho yerekeza mu iterambere.

Ati “Dukomeza kubigisha bakamenya ko nabo hari uruhare rwabo bagomba kugira mu kubibungabunga, tubigisha gukoresha neza ubufasha bahabwa kugira ngo ibikorwa bizanarambe”.

Bangirana yongeraho ko kuba baregerejwe amashuri byabafashije kongera umubare w’abana bitabira kwiga, kudasubira gufata serivisi z’ubuvuzi butanagezweho hakurya y’umupaka, ku buryo bigaragara ko nta muturage ugitekereza kujya hanze y’igihugu.

Ibikorwaremezo byubakiwe abaturage ba Gishambashayo byahinduye ubuzima bwabo
Perezida Kagame yerekwa ibikorwaremezo byubakiwe abaturage ba Gishambashayo
Perezida Kagame asuhuza abaturage ba Gishambashayo mu 2015
Mu 2015 ubwo Perezida Kagame yizihirizaga umunsi wo kwibohora i Gicumbi
Ivuriro rya Gishambashayo rinatanga serivisi zo kuvura amaso
Iri vuriro rinatanga serivisi z'ubuvuzi bw'amenyo
Ivuriro rito rya Gishambashayo rifite ibikoresho bifasha abarwayi kubona serivisi nziza
Umuyobozi w'Ikigo cy'amashuri cya Gishambashayo Mugenzi Emmanuel avuga ko iri shuri ryafashije abana kwiga neza
Siboyintore ashimira ingabo z'u Rwanda zabazirikanye zikabubakira ibikorwaremezo bitandukanye
Munyaneza uyobora ivuriro rya Gishambashayo avuga ko ryaruhuye abaturage kujya kwivuriza kure

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .