00:00:00 IGIHE NETWORK KN KINYARWANDA EN ENGLISH FR FRANCAIS

Bamwe baratwitswe abandi baterwa ibyuma: Iyicarubozo ku Banyarwanda banze kujya muri RNC muri Uganda

Yanditswe na Musangwa Arthur
Kuya 16 Nzeri 2021 saa 05:04
Yasuwe :
0 0

Kuva umubano w’u Rwanda na Uganda wazamo agatotsi, umubare w’Abanyarwanda bahohoterwa n’abicwa n’inzego z’umutekano z’iki gihugu ntusiba kwiyongera, kuko imibare igaragaza ko kuva muri Mata 2019 kugeza mu 2021, abamaze kugwa muri Uganda bagera kuri 23.

Muri aba Banyarwanda baguye muri Uganda harimo abo imirambo yabo yagiye itoragurwa bamaze kwicwa n’abapfuye biturutse ku bikomere n’imvune batewe n’inzego z’umutekano za Uganda. Aba Banyarwanda bagiye bicirwa mu bice bitandukanye bya Uganda birimo Kampala, Kabale, Mbarara na Kisoro.

Amakuru agaragaza ko mu mwaka wa 2019 (uhereye muri Mata) gusa hishwe Abanyarwanda batandatu. Aba barimo Theogene Dusengimana wishwe ku wa 11 Mata 2019 atewe ibyuma ndetse umubiri we ukangizwa bikomeye. Ibi byabereye mu Karere ka Kabarole.

Ku wa 22 Nyakanga 2019 undi Munyarwanda witwa Sendegeya yarasiwe n’igisirikare cya Uganda mu Karere ka Kisoro ndetse bimuviramo urupfu. Uyu yaje asanga Faustin Niyonzima na we wari wiciwe muri aka gace ku wa 6 Nyakanga atewe ibyuma.

Nyuma y’iminsi itandatu Sendegeya yishwe, ku wa 28 Nyakanga 2019, Janvier Nsanzimana na we yiciwe mu Karere ka Kyenjojo atemeshejwe imipanga.

Mu kwezi kwakurikiyeho, muri iki gihugu hongeye kwicirwa undi Munyarwanda witwa Nunu Johnson. Uyu we yitabye Imana biturutse ku ngaruka yasigiwe n’iyicarubozo yakorewe n’Urwego rw’Iperereza rwa Uganda (CMI). Iri yicarubozo yarikorewe ubwo yari afungiye mu kigo cya Gisirikare kiri ahitwa Mbuya. Yaguye muri Ntungamo nyuma y’iminsi mike arekuwe.

Silas Hategekimana, ni undi Munyarwanda witabye Imana mu 2019 biturutse ku iyicarubozo yakorewe n’inzego z’umutekano za Uganda. Uyu we yapfuye biturutse ku mvune y’urubavu no kwangirika kw’ibihaha yatewe no gukubitwa. Yitabye Imana ku wa 30 Kanama 2019 nyuma y’iminsi mike ajugunywe ku mupaka.

Umwaka ujya kurangira ku wa 31 Ukuboza 2019, Felicien Mbonabakeka wari ufite imyaka 35 akaba se w’abana bane yatewe n’abagizi ba nabi baramukubita bimuviramo urupfu.

Abishe uyu mugabo ni itsinda ry’urubyiruko rwiyemeje guhiga no kugirira nabi Abanyarwanda bari ku butaka bwa Uganda.

Abanyarwanda bagwa muri Uganda bicwa urw'agashinyaguro

Muri 2020 ntacyahindutse

Umwaka wa 2020 waje ntacyo uhindura ku mugambi mubi w’inzego z’umutekano za Uganda zo kugirira Abanyarwanda nabi, kuko bamwe bakomeje gukorerwa iyicarubozo abandi baricwa.

Mu Banyarwanda bishwe muri uyu mwaka harimo Gasore Semukanya, aho umurambo we wasanzwe umanitse mu giti mu ishyamba riherereye mu Karere ka Kisoro. Ibi byabaye kuya1 Gashyantare 2020.

Muri uku kwezi kandi hishwe Emmanuel Magezi, biturutse ku iyicarubozo yakorewe na CMI ubwo yari afungiye mu kigo cya gisirikare cya Mbuya. Umurambo we ntiwigeze ushyikirizwa u Rwanda.

Bosco Mwiseneza ni undi Munyarwanda waguye muri Uganda mu 2020. Yitabye Imana ku wa 19 Gashyantare, agwa mu Karere ka Kisoro, ni nyuma y’uko yimwe ubuvuzi kuko ari Umunyarwanda.

Ku wa 1 Kanama 2020, Emmanuel Baragahoranye yishwe atewe ibyuma. Ubu bugizi bwa nabi nabwo bwabereye mu Karere ka Kisoro.

Uretse abitabye Imana muri uyu mwaka wa 2020, inzego z’umutekano za Uganda zakomeje ibikorwa byo gufunga Abanyarwanda mu buryo bunyuranyije n’amategeko ndetse bamwe igihe barekuwe bakajugunywa ku mipaka ihuza u Rwanda na Uganda Gatuna, Kagitumba na Cyanika.

Umwaka wa 2021 nawo watangiye ari uw’amarira ku Banyarwanda baba n’abakorera Uganda. Ku wa 10 Gashyantare hishwe uwitwa Lawrence Sebusande.

Yarasiwe na CMI mu rugo rwe rwari ruherereye mu Karere ka Isingiro, nyuma y’iminsi ine muri Mbarara hiciwe undi Munyarwanda witwa John Mushabe. Nyuma y’ukwezi aba bishwe, muri Werurwe undi Munyarwanda witwa Alphonse Hitimana nawe yiciwe muri Kabale.

Urundi rupfu rwashenguye benshi mu Banyarwanda ni urwa Bazambanza Munyemana, wakubiswe aboheshejwe imigozi nyuma agatwikwa, ubu bugizi bwa nabi bwakozwe ku wa 6 Kamena uyu mwaka. Umurambo we wajugunywe ku mupaka.

Urupfu rwa Bazambanza Munyemana rwakurikiwe n’urwa Daniel Sibomana wiciwe mu Murwa Mukuru, Kampala umurambo we ujugunywa ku mupaka wa Cyanika.

Mbere y’uko aba bicwa muri Gicurasi 2021, undi Munyarwanda witwa Gaspard Izagira yarakubiswe bimuviramo urupfu ndetse umurambo we nawo ujugunywa ku mupaka wa Cyanika. Undi wishwe akajugunywa kuri uyu mupaka ni Jean Damascene Karuhije wishwe muri Gicurasi.

Muri Kanama 2021, muri Uganda hongeye kumvikana urupfu rw’Umunyarwanda. Uyu ni uwitwa Bahati Ntwali wari umukanishi muri Kampala, aho yari amaze imyaka ine aba. Yatewe n’abagizi ba nabi baramuboha, bamutera ibyuma kugeza ashizemo umwuka ubundi baramusahura.

Impfu ziheruka ni iz’Abanyarwanda babiri barimo uwitwa Paul Bangirana, na Theoneste Dusabimana. Aba bose baguye ku butaka bwa Uganda, ku wa 9 Nzeri imirambo yabo ishyikirizwa u Rwanda.

Iki gihe mukuru wa Dusabimana witwa Yohani Kanimba yabwiye itangazamakuru ko nyakwigendera yakoraga mu mirimo y’icyayi iherereye mu Burengerazuba bwa Uganda mu gace ka Tooro.

Kanimba yavuze ko bari biteze ko murumuna we azataha mu kwezi kwari kwabanje ariko baza gutungurwa n’inkuru y’akababaro y’uko yishwe.

Ati “Mu kwezi gushize twari dutegereje ko azataha. Twatangiye guhangayika igihe abandi batashye bava aho na we yakoreraga, bakatubaza niba atarageze mu rugo kandi atarahageze.”

Amakuru yizewe ni uko aba Banyarwanda bose bagenda bicwa ari abanze kujya mu mitwe igamije guhungabanya umutekano w’u Rwanda irimo RNC ya Kayumba Nyamwasa na FDLR.

Uretse abicwa, Inzego z’Umutekano za Uganda zikomeje no gufunga mu buryo bunyuranyije n’amategeko Abanyarwanda baba muri iki gihugu n’ababa bahakoreye ingendo kubera impamvu zitandukanye.

Ku wa 15 Nzeri 2021, u Rwanda rwakiriye abaturage barwo 15 bari bamaze igihe kinini bafungiwe muri Uganda mu buryo butemewe n’amategeko bagejejwe ku Mupaka wa Kagitumba uherereye mu Karere ka Nyagatare. Aba baje biyongera ku bandi benshi u Rwanda rwakiriye mu minsi ishize.

Mu kiganiro Perezida Paul Kagame aherutse kugirana na RBA, yavuze ko ikibazo cy’umubano mubi uri hagati y’u Rwanda na Uganda kigenda gifata indi ntera kuko ubu iki gihugu gisigaye gitwerera u Rwanda ibibazo rutanagizemo uruhare.

Yavuze ko kugeza ubu atarumva neza ikibazo Uganda ifite k’u Rwanda n’umurongo gikwiye guhabwa kugira ngo ibihugu byombi byongere kubana neza.

Ati “Ntabwo numva neza impamvu, no kugira ngo tubone uko tubikemura neza biracyagoye. Ikindi birazwi neza ko habaho abantu baba muri Uganda cyangwa banyura muri Uganda cyangwa bafashwa na Uganda kugirira nabi u Rwanda, murabizi hari n’abo dufite mu nkiko. Bamwe bakatiwe abandi bari mu nkiko bazakatirwa kubera imanza z’ibyo bagiyemo banyuze muri Uganda cyangwa bafashijwe na Uganda kudutera.”

“N’ubu hari ibindi birimo abantu bamwe muzi bari mu mahanga baba hanze muri Afurika y’Epfo no mu bihugu bindi bitandukanye bakorera muri Uganda ngo ibigamije mu gihe kizaza kugirira nabi u Rwanda.”

Yavuze ko ibibazo by’u Rwanda na Uganda bidatanga icyizere cyo gukemuka vuba kuko bisa n’umurongo wa Politike Uganda yafashe, gusa yemeza ko u Rwanda rwahisemo inzira yo kubaka ubushobozi bwo kwirinda.

Abanyarwanda bakomeje kwicirwa muri Uganda, aha umurambo wa Dusabimana Theoneste n'uwa Bangirana Jean Paul yari imaze kugezwa ku mupaka wa Gatuna
Uretse abicwa, hari n'abakomeje guhohotera, aba ni abagera kuri 13 bajugunywe ku mupaka wa Kagitumba uherereye mu Ntara y'Iburasirazuba
Aba ni abandi Banyarwanda batandatu barimo n'umwana w'imyaka ibiri baherutse kwirukanwa na Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .