00:00:00 IGIHE NETWORK KN KINYARWANDA EN ENGLISH FR FRANCAIS

Bahabwa akayabo nk’abakozi ba Loni : Ubuzima butavugwa bw’Abanyarwanda baheze muri Niger

Yanditswe na Mwene Ndabarasa
Kuya 30 May 2023 saa 11:23
Yasuwe :

Bamwe mu bari mu nzego nkuru muri Leta y’abajenosideri bahamwe n’ibyaha bya Jenoside abandi bakagirwa abere bari muri Niger, bakomeje guhabwa akayabo k’amafaranga kandi icumbi babamo ryishyurwa na LONI, kuko ibihugu bicumbikiye imiryango yabo byanze kubakira.

Abo bagera ku munani, Niger yemeye kubakira ariko ibaka ibyangombwa byabo ku buryo batemerewe kwidegembya muri icyo gihugu, baguma mu nzu bakodesherezwa na LONI.

Muri Nyakanga 2022, abari abayobozi muri Leta y’Abajenosideri bandikiye Urwego rwasigariyeho Inkiko Mpuzamahanga Mpanabyaha, (IRMCT) basaba ko buri wese yahabwa amadorali ibihumbi icumi. Aba bose barekuwe n’umucamanza Theodore Meron mu bihe bitandukanye.

Amasezerano hagati y’Urwego rwasigariyeho Inkiko Mpuzamahanga Mpanabyaha na Leta ya Niger bashyizeho umukono mu Ugushyingo 2021 yemeje ko Niger ibakira mu gihe hari gushakishwa ikindi gihugu kibakira kitari u Rwanda na Tanzania.

Ibihugu nk’u Bufaransa, u Bubiligi n’u Buholandi bucumbikiye bamwe mu miryango yabo bimaze imyaka irenga 14 bibima impapuro zinjirayo.

Bageze muri Niger tariki ya 6 Ukuboza 2021; buri wese yahawe ikarita iriho ibihumbi icumi by’amadorali. Niger yari izi ko ari iby’igihe gito, yafashe icyemezo cyo kwirukana aba bakatiwe n’inkiko tariki ya 24 Gashyantare 2022 ariko Tanzania nayo yanze kubakira, isaba ko bashakirwa ikindi gihugu kuko bari bamaze igihe muri icyo gihugu bakaba batari bwongere kubakira.

Nibwo bafatiriwe ibyangombwa byose babwirwa ko batemerewe gusohoka.

Umwanditsi w’Urwego rwasigariyeho Inkiko Mpuzamahanga Mpanabyaha yandikiye ibihugu bigera kuri 33, ariko byose bivunira ibiti mu matwi ku busabe bwo kwakira aba bagabo.

Nyuma yo kubura igihugu na kimwe kibakira, Niger yemeye ko baguma muri iki gihugu ariko ivuga ko itazabasubiza ibyangombwa ndetse ko batemerewe kurenga imbibi z’inzu babamo.

Aba bagabo bemerewe kugaruka mu Rwanda, igihugu bavukiyemo ariko kubera ibyaha bakoze bafite ipfunwe ryo kugaruka mu gihugu basize bagize umuyonga.

Nubwo aba bagabo batinya kugaruka mu Rwanda, hari abandi Banyarwanda barangije ibihano batashye, aha twavuga nka Major Ntuyahaga warangije igihano cy’imyaka 20 yakatiwe n’inkiko zo mu Bubiligi, kubera uruhare yagize mu rupfu rw’abasirikare babo 10 baguye mu Rwanda muri Jenoside yakorewe Abatutsi.

Hari kandi abahoze muri FDLR bagera ku bihumbi batashye, bakaba barasubijwe mu buzima busanzwe.

Tariki ya 2 Gicurasi 2022 aba bagabo ndetse n’itsinda ry’abahanga mu mategeko ribaburanira, bandikiye LONI ibaruwa isaba ko amafaranga bakira yakwiyongera akava ku madorali ya Amerika 350 akagera ku madorali 1400 buri kwezi, bivuze ko ari ugukuba kane kubera ubuzima buhenze muri Niger.

Nk’uko iyo baruwa IGIHE yaboneye Kopi ibivuga, muri aya madorali 1400 ntabwo harimo amafaranga y’ubwishingizi bw’ubuzima.

Nyuma y’amezi atatu, tariki ya 29 Kanama 2022 abunganizi mu mategeko ba Prosper Mugiraneza na François Xavier Nzuwonemeye bandikiye Perezida w’Urwego basaba gushyira mu bikorwa iki cyifuzo, asaba LONI kubishyura amadorali ibihumbi cumi buri muntu.

Hashize igihe gito n’abandi bunganizi mu mategeko batandatu na bo bandikiye uru rwego basaba ko baha abakiliya babo ibihumbi icumi by’amadorali.

Tariki ya 12 Mutarama uyu mwaka, umucamanza yemeje ko buri wese ahabwa ayo mafaranga n’Urwego rwasigariyeho Inkiko Mpuzamahanga Mpanabyaha kandi LONI igakomeza kubaha amafaranga ya buri kwezi yo kwishyura icumbi.

Uru rwego kandi tariki ya 3 Werurwe 2023 rwongeye kwandikira ibihugu bitandukanye rusaba ko aba bagabo babona ibibakira, ariko ikigaragara nta gihugu na kimwe kibashaka harimo n’ibyahaye ubwenegihugu imiryango yabo.

Gusa umuntu yakwibaza niba bazakomeza guhabwa aka kayabo nk’aho ari abakozi ba LONI.

Mu gihe abari ku isonga mu gutegura no gushyira mu bikorwa umugambi wa Jenoside bafashwe nk’aho ari abakozi, ingaruka ni nyinshi ku barokotse Jenoside: Abenshi baracyabana n’ibikomere bya Jenoside haba ku mutima no ku mubiri, abapfakazi benshi barokotse bafashwe ku ngufu bafite ubwandu bw’agakoko gatera sida, abafite indwara zidakira n’ibindi, nyamara LONI ntacyo yigeze ibamarira.

Muri aya mafaranga kandi bahabwa na LONI harimo ayo bagura internet, bagamije guhakana no gupfobya Jenoside yakorewe Abatutsi bateguye bakanayishyira mu bikorwa.

Muri Mutarama umwaka ushize, Capt Sagahutu yagiranye ikiganiro kuri Zoom n’urubyiruko rukomoka ku bakoze Jenoside, bibumbira hamwe ngo bahakane ibyaha by’ababyeyi babo, akwirakwiza ingengabitekerezo asanganwe ababwira ko bafungiwe ubusa, ko abakoze Jenoside bibereye i Kigali.

Usibye amagambo ahakana kandi agapfopbya Jenoside yakorewe Abatutsi, Sagahutu yijeje urwo rubyiruko ko bazasubira vuba mu Rwanda bakarwisubiza. Yabashishikarije nabo kubigiramo uruhare.

Ibi Sagahutu avuga yanagerageje kubishyira mu bikorwa kuko tariki ya 10 Werurwe 2017, yatorotse inzu ya LONI yabagamo muri Tanzania yerekeza muri FDLR, afatirwa ku mupaka uhuza Tanzania n’u Burundi.

Kuba ingengabitekerezo ya Jenoside no gupfobya Jenoside yakorewe Abatutsi ikomeje gukaza umurego, ni uko abari ubwonko bwa Jenoside ubu abenshi bafunguwe barimo Ferdinand Nahimama, Sagahutu n’abandi, bakaba ari n’umurage n’inshingano bahaye abana babo.

Aba bafashwe nk’abakozi ba LONI barimo Protais Zigiranyirazo, muramu wa Perezida Habyarimana, yakatiwe ibyaha bya Jenoside mu rubanza rwabaye mu mwaka wa 2005 ariko agirwa umwere mu bujurire muri 2009.

Undi ni Col Anatole Nsengiyumva wari ukuriye ibikorwa by’imirwano mu karere ka Gisenyi. Yahamwe n’ibyaha bya Jenoside yakorewe Abatutsi akatirwa gufungwa burundu ariko mu bujurire akatirwa imyaka 15 maze arekurwa n’umucamanza Theodor Meron muri 2011.

Ni kimwe na Major François Xavier Nzuwonemeye wari ukuriye batayo yo gushaka amakuru y’urugamba mu ngabo za Habyarimana. Yahamwe n’ibyaha bya Jenoside yakorewe Abatutsi akatirwa imyaka 20 nawe aza kurekurwa n’umucamanza Theodor Meron mu 2014.

Hari kandi Capt Innocent Sagahutu wabarizwaga muri batayo yo gushaka amakuru y’urugamba ariko akaba yari soma mbike wa Perezida Habyarimana. Yahamwe n’ibyaha bya Jenoside yakorewe Abatutsi akatirwa imyaka 20 yagabanutse iba 15 maze arekurwa n’umucamanza Theodor Meron mu 2014.

Undi ni Col Alphonse Nteziryayo wari muri Gendarmerie yaje kugirwa Perefe wa Butare muri Kamena 1994. Yahamwe n’ibyaha bya Jenoside yakorewe Abatutsi akatirwa imyaka 30 yaje kuba 25 mu bujurire. Yarekuwe atararangiza igifungo muri 2016.

Harimo na Col Tharcisse Muvunyi wakatiwe imyaka 25 nyuma yo guhamwa n’ibyaha bya Jenoside yakorewe Abatutsi yagizwe imyaka 15 mu bujurire. Yarekuwe atarangije igihano mu 2012.

Uwa karindwi ni Prosper Mugiraneza wari Minisitiri w’ubucuruzi n’inganda muri Guverinoma yiyise iy’abatabazi. Yakatiwe imyaka 30 mu rubanza rwabaye muri 2011 mu ruhare yagize muri Jenoside yakorewe Abatutsi. Yaje kurekurwa n’umucamanza Theodor Meron.

Hari kandi André Ntagerura wari Minisitiri wo gutwara ibintu n’itumanaho muri Guverinoma y’Abajenosideri. Yagizwe umwere mu rubanza rwabaye mu 2004.

Aba bagabo nyuma yo gufungurwa banze gutaha mu Rwanda, babura n'ibindi bihugu byabakira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .