00:00:00 IGIHE NETWORK KN KINYARWANDA EN ENGLISH FR FRANCAIS

Babyl yinjiye mu bufatanye na Britam Insurance Rwanda

Yanditswe na Balinda Yvette
Kuya 19 September 2022 saa 12:39
Yasuwe :

Ikigo gitanga serivise z’ubuvuzi hakoreshejwe ikoranabuhanga, Babyl, cyagiranye amasezerano y’ubufatanye na Britam Insurance Rwanda, agamije gufasha abakoresha ubwishingizi bw’iki kigo kubona serivisi za Babyl.

Ubufatanye hagati ya Babyl na Britam Insurance Rwanda bwashyizwe ku mugaragaro kuwa 12 Nzeri 2022, bubaye nyuma y’igerageza ryakozwe mu gihe kingana n’umwaka.

Muri iryo gerageza, abakoresha ubwishingizi bw’ubuzima bwa Britam Insurance Rwanda bashishikarijwe gukoresha ubuvuzi bwifashishije ikoranabuhanga ndetse babwirwa n’inyungu zabwo.

Abarwayi bashobora kubona iyi serivise bakoresheje telefone zabo, aho bakanda *811# cyangwa se bagahamagara kuri 8111 bagakurikiza amabwiriza, bakabona serivise za Babyl.

Izi serivise zitangwa kuva kuwa Mbere kugeza kuwa Gatandatu guhera saa moya z’igitondo kugeza saa moya z’umugoroba.

Umuyobozi wa Britam Insurance Rwanda, Andrew Kulayigye yavuze ko bagiranye amasezerano na Babyl mu rwego rwo korohereza abakiliya babo.

Ati “Britam iri gushyira imbaraga mu korohereza abakiliya bacu kubona serivise zacu. Ubu bufatanye ni intambwe yerekeza mu cyerekezo cyiza, atari gusa gushyira mu bikorwa intego yacu ya gahunda ya 2021-2025 yo kwita ku mpinduka z’abakiliya bacu ahubwo tunafasha Abanyarwanda bose kubona serivise z’ubuzima zinoze kandi bakazibona vuba.”

Yakomeje agira ati “ikoranabuhanga rero rizatuma dushobora kugera kuri iyo ntego. Twishimiye gutangiza uyu munsi ubu bufatanye na Babyl.”

Babyl yasinye amasezerano y’ubufatanye y’imyaka 10 na Leta y’u Rwanda mu 2022. Mu bihe bya Covid 19 ikaba yaranakurikiranye abarwayi ba Coronavirus, aho babaga barwariye mu ngo zabo kugeza bakize.

Umuyobozi wa Babyl Rwanda, Dr Shivon Byamukama yavuze ko umusaruro w’ikoreshwa ry’ikoranabuhanga muri serivisi z’ubuzima mu Rwanda usigaye wigaragaza.

Ati “Ikoreshwa ry’Ikoranabuhanga muri serivise z’ubuzima mu Rwanda ryabaye intangarugero. Abaganga n’abaforomo bo muri Babyl ubu ku munsi basuzuma abarwayi barenga 3500. Kugeza ubu twakoranaga na RSSB na Mituweri none turi kwagura ubufatanye bwacu no mu bigo by’ubwishingizi bitegamiye kuri Leta.”

“Ubu bufatanye ndetse n’igerageza ryakozwe hagati yacu na Britam ni intambwe ikomeye ku bakiriya bayo. Dukomeje gushaka ubufatanye n’ibindi bigo by’ubwishingizi kandi no korohereza buri Munyarwanda wese kubona umuganga umufasha aho yaba ari hose hakiri kare kandi vuba.”

Kugeza ubu abarenga milliyoni ebyiri n’igice mu Rwanda bamaze kwiyandikisha muri serivise ya Babyl, abarenga 3500 basuzumwa ku munsi, aho bafashwa n’abaganga ndetse n’abaforomo bagahabwa kode z’imiti bandikiwe cyangwa se ibizamini bya laboratwari bifatirwa kwa muganga.

Babyl ikorana n’ibigo nderabuzima birenga 501, n’amafarumasi arenga 128 ndetse n’amaraboratwari atandukanye mu gihugu hose.

Babyl yatangiye gukorera mu Rwanda mu 2016. Kugeza ubu Babyl ikorera mu bihugu bisaga 15 kandi ikoresha indimi 15. Muri 2021 nibura mu masegonda atanu yakiraga umurwayi kuko yakiriye miliyoni 1,7.

Britam Insurance Rwanda ibaye ikigo cya mbere kitegamiye kuri leta kigiranye amasezerano na Babyl
Britam Insurance Rwanda yashishikarije abakiliya bayo gukoresha ubuvuzi bwifashishije ikoranabuhanga
Kugeza ubu abarenga milliyoni ebyiri n’igice mu Rwanda bamaze kwiyandikisha gukoresha Babyl
Kugeza ubu Babyl ikorera mu bihugu bisaga 15 kandi ikoresha indimi 15
Abaganga n’abaforomo bo muri Babyl ubu ku munsi basuzuma abarwayi barenga 3500
Babyl ikorana n’ibigo nderabuzima birenga 501, n’amafarumasi ndetse n’amaraboratwari atandukanye
Ubufatanye bwa Babyl na Britam Insurance Rwanda buje nyuma y'igerageza rimaze umwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .