Ba rwiyemezamirimo b’abagore bagaragaje ko kongererwa ubushobozi byahindura imicungire y’imishinga yabo

Yanditswe na Twarabanye Venuste
Kuya 11 Ugushyingo 2019 saa 10:31
Yasuwe :
0 0

Umuryango Nyarwanda utegamiye kuri Leta, ActionAid, n’Umuryango Nyafurika wita ku kongerera ubushobozi abakozi (ACBF) yatangiye guhugura abagore bafite imishinga itandukanye ku bijyanye n’imicungire yayo, kuyitegurira igenamigambi, kuyikurikirana no kuyamamaza bashaka amasoko.

Abo ba rwiyemezamirimo bagera kuri 40 bazakora amahugurwa mu byiciro bibiri hagamijwe ko buri muntu agira umwanya uhagije wo kugaragaza ikibazo agira mu micungire y’umushinga we kugira ngo ahabwe inyunganizi ku buryo bwuzuye.

Abagera kuri 20 batangiye kuri uyu wa Mbere nyuma y’iminsi itatu, hakazakurikiraho ikindi cyiciro nkuko Cyntia Nyam ushinzwe Ibikorwa muri ACBF yabitangaje.

Yavuze ko bayateguye nyuma y’ubushakasahatsi bakoze bagasanga abagore bafite ibibazo by’imicungire y’imishinga yabo, kutabona amahugurwa, gutegura imishinga, igenamigambi, kwakira abakiriya, no kubona ingengo y’imari bashora.

Ati “Twabashyize mu byiciro bibiri. Aba barahugurwa iminsi itatu, nyuma hazakurikireho abandi kugira ngo ababahugura bagere kuri buri muntu. Nakugeraho umubwire mu by’ukuri imiterere y’ibyo ukora n’ikibazo ufite ubundi twizere ko usobanukiwe.”

Abo 40 bazahugurwa barimo 20 bakorera mu mijyi na 20 bakorera mu bice by’icyaro.

Nyam yavuze nyuma y’ayo mahugurwa bazakora isesengura ryo kureba niba hari icyo yabamariye.

Uwamahoro Angelique ufite ikigo gikora ibijyanye n’insimburangingo n’inyunganirangingo, avuga ko yabyize ariko akaba atazi ibijyanye n’imicungire y’ubucuruzi, akaba aribwo bumenyi ategereje muri ayo mahugurwa.

Ati “Ubumenyi nshaka ni ibijyanye n’imicungire y’ikigo cy’ubucuruzi, kuko nubwo nize ibijyanye n’insimburangingo n’inyunganirangingo, ibijyanye n’imicungire y’ikigo n’iyamamazabikorwa kugira ngo twongere isoko, ntabwo nari mbizi cyane.”

Mugenzi we Uwera Marie Claire ukora ibijyanye no gufasha abantu gutunganya uruhu, we avuga ko bizamufasha kwamamaza, ati “Numva bizamfasha kurushaho kwimenyekanisha ku isoko. Nkeneye ubumenyi cyane mu kumenya .”

Umuyobozi wa Actionaid, Uwamariya Josephine, avuga ko ayo mahugurwa azabafasha kugira imishinga iteguye neza bashobora kujyana ku bigo by’imari n’abandi bafatanyabikorwa.

Gukora imishinga yabo neza bikazatuma n’abandi bagore bagira ubushake bwo guhanga imishinga kubera ko bazaba babona bagenzi babo babigezeho.

Ati “Tujya gutegura aya mahugurwa twasanze abagore bakeneye kongererwa ubushobozi mu buryo bw’imicungire y’imishinga mu buryo bwo kwamamaza, gukurikirana kugira ngo bashobore kugira imishinga ifatika cyangwa na bizinesi zabo zibe zikomeye kandi bafite n’imishinga bashobora kujyana ku bafatanyabikorwa kugira ngo bafatanye kongererwa ubushobozi mu bijyanye n’igishoro.”

Abagore baracyabangamiwe n’ibibazo bitandukanye bituma batitabira kujya mu mishinga ibyara inyungu ku bwinshi no kuyitegura neza, birimo umubare w’abatarabashije kugera mu shuri bagera kuri 30% n’imirimo yo kwita ku rugo gusa.

Murangira Bosco ushinzwe Iiterambere ry’Abagore mu Bukungu muri Minisiteri y’Uburinganire n’Iterambere ry’Umuryango, yavuze ko kongerera umugore ubushobozi birushaho gutuma babyaza umusaruro amahirwe bafite.

Agashimangira ko bituma igihugu kigira umuryango utekanye, agira ati “Nyuma yuko tugize amahirwe hakabaho gukuraho ya mategako aheza hakabaho gushyiraho amahirwe angana ubu icyo turi gukora ni ukubakira umugore ubushobozi kugira ngo igihugu kigire umuryango utekanye kandi uteye imbere.”

Abagore bajya mu bijyanye no guhanga imirimo bagenda biyongera. Mu 2012 abagore bagera kuri serivisi z’imari bari 36.1% mu 2016 bageze kuri 63%.

Avuga ko imirimo myinshi bihangira yiganje mu bucuruzi buciriritse n’uburinganiye kubera gufatanya akazi k’ubucuruzi n’inshingano nyinshi bagira mu rugo ibyo ngo bikaba binafitanye isano na ba bandi bagera kuri 30 % batageze mu ishuri.

Action Aid yateguye ayo mahugurwa ku bufatanye bwa ACBF na Banki y’Abarabu y’Iterambere (BADEA). Amahugurwa nk’ayo akorwa muri Malawi, Liberia, Mali, Repubulika Iharanira Demokarasi ya Congo n’u Rwanda.

Aya mahugurwa azatangwa n'inzobere zitandukanye mu by'ubukungu
Aya mahugurwa azafasha kumenya aho ba rwiyemezamirimo bakeneye ubumenyi ngo basobanurirwe byimbitse
Cyntia Nyam ushinzwe Ibikorwa muri ACBF yatangaje ko aya mahugurwa yitezweho kongera ubumenyi bw'abagore mu bucuruzi
Mu mahugurwa bazareba agaciro ko kwakira neza ababagana no gushaka amasoko
Murangira Bosco yavuze ko kongerera umugore ubushobozi bituma abyaza umusaruro amahirwe yahawe
Umuyobozi wa Actionaid, Uwamariya Josephine, avuga ko ayo mahugurwa azabafasha kugira imishinga iteguye neza
Uwera Marie Claire yavuze ko aya mahugurwa azamufasha kwamamaza umushinga we
Uwamahoro Angelique yizeye kunguka ubumenyi mu bijyanye n’imicungire y'ubucuruzi muri ayo mahugurwa
Icyiciro cya mbere cyitabiriwe na ba rwiyemezamirimo b'abagore 20

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza