00:00:00 IGIHE NETWORK KN KINYARWANDA EN ENGLISH FR FRANCAIS

Aryoha asubiwemo: Indege esheshatu z’abakomeye zagaragaye i Kigali muri CHOGM (Amafoto)

Yanditswe na Iradukunda Serge
Kuya 28 June 2022 saa 07:12
Yasuwe :

Icyumweru gishize kiri mu byo Abanyarwanda batazibagirwa bitewe n’ubwinshi bw’abashyitsi bakomeye igihugu cyakiriye bitabiriye Inama ya CHOGM, abakurikirana iby’indege bo bakubwira ko biba gake cyane kuba Ikibuga cy’indege mu cyumweru kimwe cyakwakira indege z’abayobozi nk’abo icya Kigali cyakiriye.

Nyuma y’iminsi mike inama zibanziriza CHOGM zitangiye kuwa Gatatu tariki 22 Kamena nibwo Abakuru b’Ibihugu na za Guverinoma muri CHOGM batangiye kugera i Kigali.

Hari abakuru b’ibihugu na za Guverinoma bageze i Kigali mu ndege zabo bwite abandi bahitamo gutega izisanzwe zikoreshwa n’ibigo bikora ubwikorezi bwo mu kirere.

Benshi batunguwe no kubona hari abakuru b’ibihugu bafite indege zabo bwite zingana cyangwa ziruta iza bimwe mu bigo by’indege.

Ibijyanye n’indege zari i Kigali kandi biherutse kugarukwaho na Minisitiri w’Intebe w’u Bwongereza, Boris Johnson n’uwa Canada Justin Trudeau ubwo bari bitabiriye inama ya G7 iri kubera mu Budage.

Mu buryo bwo gushyenga, Boris Johnson yavuze ko yatunguwe n’uburyo indege mugenzi we wa Canadaga agendamo.

Ati “Nabonye Canada Force One, ni indege nini”, Trudeau nawe mu kumusubiza yagize ati “Ntabwo ari nini cyane nk’iyawe”.

Boris wasaga nk’uwakunze indege ya Trudeau yavuze ko “iye isanzwe cyane ndetse idafite ubunini bukabije.”

Can Force One

Canada Force One cyangwa se Can Force One ni indege itwara Minisitiri w’Intebe wa Canada. Kimwe na Air Force One itwara Perezida wa Leta Zunze Ubumwe za Amerika, iyi ndege nayo ifatwa nk’iy’igisirikare ndetse ni nacyo kigenzura ibikorwa byayo bya buri munsi.

Mu ijoro ryo kuwa Gatatu, tariki ya 22 Kamena 2022, nibwo iyi ndege yakandagiye ku Kibuga cy’Indege cya Kigali itwaye, Minisitiri w’Intebe wa Canada Justin Trudeau.

Canada Force One ni indege yo mu bwoko bwa Airbus CC-150 Polaris.

Iyi ndege yakozwe hagendewe kuri Airbus A310-300s, imyenyerewe mu gutwara abagenzi bisanzwe, iravugururwa, ihabwa ubushobozi bwo gukora ingendo ndende idahagaze.

Ku ikubitiro izi ndege zaguzwe ari eshanu na sosiyete ya Wardair ariko nyuma mu 1989 ziza kwegukanwa na Canadian Airlines nyuma y’uko iguze icyo kigo.

Nyuma uko ari eshanu zaje gukurwa n’igisirikare cya Canada kirwanira mu kirere. Enye zaje gukorerwa amavugururwa zitangira kwifashishwa mu mirimo ya gisirikare, imwe igenerwa gutwara abayobozi bakuru ba Canada ari nayo itwara Justin Trudeau kugeza n’uyu munsi.

Iyi ndege ifite ibyangombwa byose Minisitiri w’Intebe akenera mu rugendo nk’ubwogero, aho kurara, icyumba gitangirwamo serivisi z’ubuvuzi, icy’inama n’ibindi.

Itwarwa n’abapilote babiri, ifite uburebure (kuva ku imbere kugera inyuma ku murizo) bwa metero 46.66. ubugari bwayo (kuva ku muhero w’ibaba ryayo kugera ku w’irindi) ni metero 15.8.

Canada Force One ni indege itwara Minisitiri w'Intebe wa Canada, Justin Trudeau
Canada Force One ni indege yo mu bwoko bwa Airbus CC-150 Polaris

Airbus A321neo ya Boris Johnson

Minisitiri w’Intebe w’u Bwongereza, Boris Johnson avuga ko indege ya Justin Trudeau ari nini ntiyabeshyaga kuko mu burebure isumba iye ho metero ebyiri.

Airbus A321neo nibwo bwoko bw’indege itwara Minisitiri w’Intebe w’u Bwongereza n’abandi banyacyubahiri batandukanye bo muri iki gihugu.

Leta y’u Bwongereza yaguze iyi ndege mu 2021. Yagaragaye bwa mbere, ku Kibuga cy’Indege cya Stansted muri Werurwe 2021.

Guverinoma y’u Bwongereza yavuze ko yaguze iyi ndege ya kabiri kugira ngo ijye yifashishwa mu gutwara abayobozi bakuru b’u Bwongereza igihe bagiye mu ngendo zitari iza kure cyane.

Mbere yo kugera mu maboko ya Leta y’u Bwongereza iyi ndege yanyuze mu bindi bigo by’indege nka British Airways, easyJet na Titan Airways.

Ifite ubushobozi bwo gutwara abagenzi 244 kandi ikagira iby’ingenzi byose Minisitiri w’Intebe ashobora gukenera igihe ari mu rugendo.

Airbus A321neo itwara Minisitiri w'Intebe w'u Bwongereza, Boris Johnson ubwo yageraga i Kigali

RAF Voyager (Vespina) ya Prince Charles

Igikomangoma cya Wales mu Bwami bw’u Bwongereza, Charles n’abandi bo mu muryango w’i bwami bakoresha indege izwi nka RAF Voyager cyangwa se Vespina.

Imibare iranga iyi ndege mu Gisirikare cy’u Bwongereza kirwanira mu kirere ni ZZ336. Iyi ndege yakozwe hagendewe kuri ‘Airbus A330 MRTT’ iravugurwa ihabwa ibyangombwa byose abanyacyubahiro bakenera igihe bari mu rugendo.

Vespina ikoranye uburyo bw’itumanaho rikoresheje satellite ryizewe, uburyo bwo kwirinda ibisasu bya misile, ibyumba by’inama, urwambariro, intebe 58 mu myanya y’abanyacyubahiro (business class) n’indi myanya isanzwe 100.

Muri 2015 Leta y’u Bwongereza yemeje umushinga wo kugura indege izajya yifashishwa mu gutwara abayobozi b’imena, maze biciye mu kigo cy’ubwikorezi bwo mukirere, Royal Air Force (RAF) bagura indege zo mu bwoko bwa A330, asaga miliyoni £10.

Iyi ndenge ya VIP RAF Voyage yifashishijwe bwa mbere mu 2016 ubwo uwari Minisitiri w’Intebe, David Cameron yitabiraga inama ya NATO muri Pologne.

Iyi ndege yahoze ifite ibara rya gisirikare ariko riza guhindurwa mu 2020, iterwa irangi ry’umweru n’andi agize ibendera ry’Ubwami bw’u Bwongereza.

Mu ijoro ryo kuwa 21 Kamena 2022, nibwo iyi ndege yageze ku Kibuga cy’Indege cya Kigali itwaye Prince Charles

Iyi ndege yakunze gukoreshwa cyane n’Umwamikazi Elizabeth II ariko kuko atagikunze kugirira ingenzo mu mahanga kubera izabukuru isigaye yifashishwa n’Igimakomangoma Charles, Umuhungu we, William n’abandi.

Boeing 747-430 y’Umuyobozi w’Ikirenga wa Brunei

Umuyobozi w’Ikirenga wa Brunei akaba na Minisitiri w’Intebe w’iki gihugu, Hassanal Bolkiah ibni Omar Ali Saifuddien III ni umwe mu bayobozi bakize ku Isi dore ko abarirwa umutungo ufite agaciro k’arenga miliyari 30$.

Uyu mugabo ntasiba mu itangazamakuru kubera ubuzima buhenze abamo, uzasanga benshi batangarira ingoro ye izwi nka ‘The Istana Nurul Iman Palace’ kubera umwihariko wo kuba ifite ibyumba 1700, ubwogero 257 na piscines eshanu.

Abadatunguwe n’ibi bakubitwa n’inkuba iyo bamenye ko Hassanal Bolkiah afite imodoka 7000 zirimo n’izikozwe muri zahabu. Izi modoka zose bibarwa ko zifite agaciro ka miliyari 5$.

Uyu mugabo ni umwe mu bagendereye u Rwanda mu Cyumweru gishize kubera CHOGM.

Indege ye iri mu byangaje abari ku kibuganda cy’Indege cya Kigali kubera ubunini n’ubwiza bwayo.

Hassanal Bolkiah yageze mu Rwanda ari Boeing 747-430. Iyi ni imwe muri nyinshi afite.

Iyi Boeing 747-430, Hassanal Bolkiah yayiguze na Sosiyete ikora ingendo zo mu kirere yo mu Budage ya Lufthansa. Amakuru dukesha Forbes avuga ko yayiguze miliyoni 100$ ariko ayishoramo izindi miliyoni 120$ kugira ngo ishyirwemo ibindi byangombwa byose yari akeneye.

Imirimo yo kuvugurura iyi ndege yakorewe muri Leta Zunze Ubumwe za Amerika, yongerwamo ubwogero bugezweho, ibyumba byo kuraramo, ibikoni, uruganiriro, ibyumba by’inama n’ibindi. Ibyinshi mu bikoresho biba muri iyi ndege bikozwe muri Zahabu.

Inzego zishinzwe ubutasi muri Amerika zigeze gutangaza ko umutekano iyi ndege icungirwa n’imyiteguro bisaba kugira ngo Hassanal Bolkiah ayinjiremo yizeye umutekano we bigoye kurenza kwinjira ahabitswe imibare y’ibanga yakoreshwa mu kurasa intwaro za nuclear za Leta Zunze Ubumwe za Amerika.

Hassanal Bolkiah ubwo yari asoje uruzinduko yagiriraga mu Rwanda yuriye indege imusubiza muri Brunei

Airbus Airbus A340-300 y’Umwami Mswati

Umwami Mswati wa Eswatini ni umwe mu basize inkuru ikomeye mu Mujyi wa Kigali bitewe n’uburyo yageze ku Kibuganda cy’Indege Mpuzamahanga cya Kigali ari mu myambaro gakondo, aherekejwe n’umwe mu bagore be ndetse n’abana be babiri.

Mbere y’uko Mswati asohoka mu ndege yabimburiwe n’itsinda ryari rimuherekeje bose bambaye mu buryo bwa gakondo yabo.

Ikindi cyatangaje abantu ni ubwiza bw’indege uyu mwami agendamo.

Iyi ndege yo mu bwoko bwa Airbus A340-300 yageze i Kigali mu ijoro ryo kuwa Kane tariki 23 Kamena 2022.

Iyi Airbus A340-300 Mswati yayiguze mu 2018 ubwo yishimiraga ko yujuje imyaka 50.

Amakuru yizewe avuga ko Umwami Mswati yayiguze na China Airlines muri Taiwan, ubundi ayijyana i Hamburg mu Budage aho yakorewe amavugurura ishyirwamo ibyo yifuzaga byose.

Yashyizwemo ibyumba bitandukanye Mswati n’abagore be bashobora kwifashisha igihe bari mu rugendo, igikoni, uruganiriro n’ibindi.

Amakuru avuga ko iyi ndege yayiguze arenga gato miliyoni 16$ ariko agakoresha akandi kayabo muri ibi bikorwa byo kuyivugurura.

Boeing 747-8 BBJ ya Emir wa Qatar

Sheikh Tamim bin Hamad Al Thani wa Qatar ni umwe mu bitabiriye inama ya CHOGM ariko nk’umutumirwa kuko igihugu cye kitabarizwa mu Muryango w’Ibihugu bikoresha Icyongereza.

Yageze ku Kibuga cy’Indege cya Kigali ari mu ndege ye yo mu bwoko bwa Boeing 747-8 BBJ.

Ubwoko bw’izi ndege Sheikh Tamim bin Hamad agendamo, Boeing yazishyize bwa mbere ku isoko mu 1999.

Amakuru atangwa n’uru ruganda agaragaza ko indege imwe yo muri ubu bwoko igura miliyoni $367 ariko akaba ashobora kwiyongera bitewe n’impinduka umukiliya yifuza. Kugira ngo nibura uvugurure uburyo iteyemo imbere bikozwe na Boeing ucibwa hagati ya miliyoni $25-$50.

Iyi ni imwe muri nyinshi afite zirimo Airbus A319-100, Airbus A320-200s ebyiri, Airbus A330-200s ebyiri, Airbus А310-300, Airbus А340-200, Airbus А340-300 na Airbus А340-500.

Izi ndege zose zibarizwa mu cyiswe ‘Qatar Amiri Flight’, ikigo cy’indege zitwara abayobozi n’Umuryango w’Ubwami bwa Qatar.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .