Army Week: Umuhigo ingabo zari zahize zamaze kuwesa igikorwa kitararangira

Yanditswe na Uwishyaka Jean Louis
Kuya 23 Kamena 2017 saa 09:16
Yasuwe :
0 0

Nyuma y’ukwezi n’igice Ingabo z’u Rwanda zitangije icyumweru cyahariwe ibikorwa byazo bimaze kumenyerwa nka ‘Army Week’, zimaze gukora ibikorwa bikomeye by’umwihariko mu buvuzi bunyuranye aho intego zari zarihaye zamaze kuyirenza igikorwa nyir’izina kitararangira.

Ibikorwa bya Army Week bya 2017, byatangijwe ku mugaragaro tariki 4 Gicurasi bikazarangira itariki nk’iyo muri Nyakanga, binahurirana n’Umunsi wo Kwibohora wizihizwa kuri iyo tariki.

Ibi bikorwa byibanze cyane ku guha abaturage ubuvuzi bunyuranye ku buntu, kubaka no gusana ibiraro, imihanda, amavuriro, gutanga amazi meza, gutunganya ibishanga n’imisozi ihingwaho n’ibindi.

Mu rwego rw’ubuvuzi, ingabo zimaze kuvura abantu 90,440 biganjemo abafite ibibazo by’amaso nkuko KT Press ibitangaza.

Abaganga b’inzobere mu ngabo z’igihugu bavuye abantu 25,499 bari bafite ibibazo by’amaso ugereranyije n’abantu ibihumbi 10 zateganyaga mbere y’uko iki gikorwa gitangizwa, ariko muri rusange abavuwe indwara zinyuranye harimo abarwayi 27,778 bavuwe indwara zifata amaso.

Ubu buvuzi ntibwasize ab’igitsina gore kuko 3,949 baravuwe mu gihe iki gikorwa kijya gutangira ingabo zari zifite intego yo kuzavura 3000, bivuze ko zesheje umuhigo ku kigero cya 131.6%.

Abarwayi 201 bangana na 100.5% babazwe indwara zinyuranye mu gihe mbere bateganyaga ko nibura bazafasha abantu 200 bari bakeneye kubagwa. Gusa nubwo bimeze bityo ibikorwa byo birakomeje kugera ku munsi wa nyuma tariki 4 Nyakanga.

Urwego rw’ubuvuzi bw’amagufa nirwo rwabaye indashyikirwa muri ibi bikorwa kuko abamaze kwitabwaho bangana na 8170 mu gihe bateganyaga gufasha abantu 4000, bivuze ko icyo gikorwa kimaze gukorwa ku kigero cya 180%. Muri urwo rwego kandi abantu 500 barabazwe ugereranyije na 300 bari baritaweho nk’umuhigo, bawurenza ku kigero cya 144%.

Inzobere mu buvuzi bw’amatwi, amazuru n’umuhogo mu Bitaro bya Gisirikare i Kanombe, Maj. Dr Bukuru John, yavuze ko muri ibi bikorwa bafashije abantu benshi kubona ubuvuzi by’umwihariko abari bafite ibibazo by’amaso.

Ati “Twahuye n’ibibazo byinshi muri serivise zinyuranye; nk’ubuvuzi bw’amaso, twavuye abantu benshi bari bafite ibibazo byo kutabona neza. Byadusabye gukora kugeza no mu masaha akuze y’ijoro kuko twari dufite intego yo kuvura abarwayi bose babaga gaje batugana.”

Maj Dr Bukuru yasobanuye ko bakiriye abantu benshi bari bafite ibibazo by’amaso mu Karere ka Nyagatare bitewe n’uko izo serivise zitarahagera mu buryo bwiza.

Yavuze ko itsinda ry’abaganga ryabashije kugera mu bitaro n’ibigo nderabuzima 58 hirya no hino mu gihugu ndetse by’umwihariko Intara yose y’u Burasirazuba bamaze kuyigeramo. Yasobanuye ko muri buri karere bageraga ku bitaro bimwe n’ibigo nderabuzima nibura bibiri bakahahurira n’abarwayi babaga bafite ibibazo binyuranye by’ubuzima.

Uretse ibyo bikorwa, muri Army Week ingabo zatanze umusanzu mu kurwanya nkongwa yari yibasiye ibihingwa mu bice binyuranye by’igihugu zitanga kajugujugu yo kugeza imiti aho yari ikenewe, gufasha mu kuyitera n’ibindi ku buryo ubuyobozi bwazo buvuga ko ahatewe umuti nibura hakize ku kigero cya 95%.

Muri Army Week y'uyu mwaka, ingabo zavuye abarwayi benshi bari bafite ibibazo by'amaso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza