00:00:00 IGIHE NETWORK KN KINYARWANDA EN ENGLISH FR FRANCAIS

Ambasaderi Ron Adam yahamagariye abarokotse Jenoside kwandika ubuhamya bwabo

Yanditswe na Mugisha Christian
Kuya 29 May 2022 saa 10:41
Yasuwe :

Ambasaderi Ron Adam yasabye abagize amahirwe yo kurokoka, kwandika kugira ngo bizafashe abazavuka ndetse bibe n’intwaro yo guhangana n’ahakana cyangwa abapfobya Jenoside yakorewe Abatutsi.

Yabisabye kuri uyu wa Gatanu ku ya 27 Gicurasi 2022, ubwo abayobozi n’abakozi ba Ambasade ya Israel mu Rwanda, basuraga urwibutso rwa Jenoside yakorewe Abatutsi rwa Kicukiro, bagasobanurirwa amateka n’ubugome bya Jenoside byaranze aka gace mu 1994.

Urwibutso rwa Nyanza ya Kicukiro rushyinguyemo imibiri irenga ibihumbi 105 harimo n’abishwe bakuwe muri ETO Kicukiro, ubwo ingabo z’u Bubiligi zabasigaga mu maboko y’interahamwe.

Muri uyu muhango hafashwe umwanya wo kunamira imibiri y’inzirakarengane ishyinguye muri uru rwibutso ndetse hanashyirwa indabo ku mva zishyunguyemo iyi mibiri.

Umuyobozi Ushinzwe Gahunda muri Ibuka Rwanda, Olivier Brave Ngabo, yavuze ko mu 1994, kuri ETO-Kicukiro [ubu ni IPRC-Kigali] hari ingabo za Loni zishinzwe kugarura amahoro, akaba ari yo mpamvu yatumye Abatutsi benshi bari hafi aho bahahungira, bizeye ko ariho baza gukirira kuko bumvaga bari burindwe.

Yakomeje avuga ko izo ingabo zaje gufata umwanzuro wo kuva mu gihugu zigasiga Abatutsi mu maboko y’Interahamwe. Byarangiye Interahamwe n’ingabo za Leta y’icyo gihe bagiye kwicira abo Batutsi i Nyanza ya Kicukiro.

Yagize ati “Interahamwe zazanye Abatutsi hano kuko batinyaga ko bashobora kubonwa n’abanyamahanga banyuraga hafi ya Sonatube berekeza ku kibuga cy’indege mpuzamahanga cya Kigali. Bamwe mu Batutsi biciwe mu nzira bagana i Nyanza n’abazanywe hano bicwa bunyamanswa.”

Mu Batutsi barenga ibihumbi bitatu bazamuwe bavanwa ETO Kicukiro bajya i Nyanza, 90 muri bo ni bo bonyine babashije kurokoka.

Ambasaderi wa Israel mu Rwanda, Dr. Ron Adam, yavuze ko Jenoside yakorewe Abatutsi na Jenoside yakorewe Abayahudi bifite ibintu byinshi bihuriyeho.

Yagize ati “Njyewe nk’igisekuru cya kabiri cyarokotse Jenoside yakorewe Abayahudi nshobora kwiyumvisha uko bimera kumva wapfa akanya ako ariko kose. Kubura ubwihisho, gukusanyirizwa hamwe intumbero ari ukubica kubera uko mwavutse.”

Ibi abishingira ku nzira y’umusaraba Abayahudi banyuzemo mu gihe cy’intambara ya kabiri y’Isi, ubwo bakusanyirizwaga mu nkambi zitandukanye hirya no hino mu Burayi, kugira ngo bicwe urw’agashinyaguro.

Ambasaderi Adam yihanganishije imiryango y’ababuze ababo anasaba abarokotse Jenoside yakorewe Abatutsi gusangira ubuhamya bwabo uko bashoboye kandi bakabushyira mu nyandiko aho bishoboka, kuko ari intwaro y’ingenzi yo kurwanya Jenoside n’abayihakana.

Yagize ati “Ibi kandi bizafasha ibisekuruza bya nyuma ya Jenoside kumenya ukuri ku byabaye mu gihe cya Jenoside yakorewe Abatutsi kandi bashobore guhangana n’abayihakana.”

Nyuma yo gushyira indabo ku rwibutso, abakozi ba Ambasade ya Israel mu Rwanda basuye ’Jardin de la Mémoire’ [Ubusitani bw’urwibutso] iki akaba ari igice kiranga bimwe mu bihe bya Jenoside yakorewe abatutsi, kinagaragaza hamwe mu hantu hagiye hafasha Abatutsi bamwe na bamwe kubona ubwihisho.

Abakozi ba Ambasade ya Israel mu Rwanda bunamiye Abatutsi bishwe muri Jenoside mu 1994
Basobanuriwe amateka yaranze Jenoside yakorewe Abatutsi i Nyanza-Kicukiro
Basuye ubusitani bw'urwibutso buherereye i Nyanza ya Kicukiro, bugamije gusigasira amateka ya Jenoside yakorewe Abatutsi
Abarokotse Jenoside yakorewe Abatutsi basabwe kwandika ubuhamya bwabo kugira ngo abazavuka nyuma bazamenye amateka ya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .