Amb Nyirahabimana yakebuye urubyiruko rwihutira gushakana n’umuntu bataramenyana

Yanditswe na Hakizimana Jean Paul
Kuya 20 Ukwakira 2020 saa 10:05
Yasuwe :
0 0

Umunyamabanga wa leta muri Minisiteri y’ubutabera, Amb Solina Nyirahabimana yasabye urubyiruko rugiye gushaka kujya rubanza gufata umwanya wo kumenyana no kwiganaho mbere yo gusezerana imbere y’amategeko ngo kuko aribyo byabafasha kubaka urugo rwiza kandi rukomeye.

Ibi yabigarutseho kuri uyu wa Mbere tariki ya 19 Ukwakira 2020, ubwo yari mu Karere ka Gatsibo ahaberaga umuhango wo gusezeranya imiryango 20 yabanaga mu buryo butemewe n’amategeko. Iyi miryango yiganjemo iyirukanwe muri Tanzania mu myaka ishize yatujwe mu Mudugudu w’icyitegererezo wa Nyabikiri.

Nyirahabimana yagiriye inama abakiri bato bifuza kurushinga gufata umwanya wo kurambagizanya n’uwo bagiye kurushinga bakamenyana birushijeho mbere yo kubana.

Ati “ Icyo tubwira urubyiruko n’abakiri bato ni ugufata akanya ko kubanza kumenyana bihagije mbere y’uko bajya gusezerana imbere y’amategeko, ni nayo mpamvu hari n’igihe cyo kubatoza no kubasaba ngo nabo ubwabo bamenyane hakabaho n’umwanya wo kubigisha ibijyanye n’umuryango.”

Yakomeje avuga ko atabashishikariza kubana mu buryo butemewe n’amategeko ahubwo abasaba gufata igihe gihagije cyo kumenyana no kwiganaho kuburyo bajya kubana baziranye kuri buri kimwe n’imiryango yabo yaramaze kumenyana.

Amb Nyirahabimana yavuze ko akenshi iyo abantu bihutiye kubana cyane cyane batasezeranye imbere y’amategeko, urugo rwabo rukunda kubonekamo ibibazo bishingiye ku kutizerana ndetse bikanagira ingaruka ku gihugu.

Yakomeje avuga ko umugabo cyangwa umugore ubayeho muri ubu buzima adashobora gukorera urugo rwe neza, bikaba intandaro y’ubukene mu miryango ndetse bikanatuma abantu batarukorera neza uko bikwiriye.

Amb Nyirahabimana yasabye urubyiruko kutihutira gushakana n'abantu bataramenyana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .