Iry’umwaka utaha rizabera muri Cameroon, u Rwanda rukazahangana na Uganda, Maroc na Togo mu itsinda rya gatatu.

Mashami Vincent utoza iyi kipe y’igihugu atangaza ko hari byinshi bikenewe kunozwa kugira ngo iyi kipe y’igihugu itazajya kugisebya ku ruhando rwa Afurika.

Ati “Harimo ibibazo byinshi, abakinnyi bari bamaze igihe badakora, kuva shampiyona yahagarara bari bamaze ibyumweru bibiri badakina, hari iby’ibanze tugomba gutangiriraho kugira ngo abakinnyi bagende bazamuka mu rwego rw’imbaraga (fitness) n’imyumvire.”

Uyu mutoza yavuze ko inzego bireba ziri kureba uko hategurwa imikino ya gicuti yabanza kongera kumenyereza abakinnyi bari bamaze igihe badakina nyuma y’uko shampiyona y’u Rwanda ihagaritswe mu rwego rwo kwirinda ikwirakwira ry’icyorezo cya Coronavirus.

Yagize Ati “Ni ngombwa cyane kuko [imikino ya gicuti] turayikeneye kuruta ibindi byose, shampiyona yacu ntihari [kandi] ni yo yari gufasha abakinnyi bacu kumenyerana […] ni cyo gihe cyo gutegura imikino yo kudufasha kugira ngo tugire byinshi dukosora cyane cyane ku imyitwarire yabo.”

Yongeyeho ati “Ngira ngo ababishinzwe barimo Minisiteri na FERWAFA babirimo, mu minsi mike iri imbere muzaba mwamaze kumenya gahunda yose y’imikino ya gicuti.”

Mashami ari kumwe n’abasore 31 bagomba kuzatorwamo intyoza zizaserukira igihugu, batandatu muri bo bazasanga iyi kipe mu myitegura mu kwezi gutaha, kuko bari gufasha ikipe yabo ya AS Kigali ikiri mu mikino nyafurika ihuza amakipe yitwaye neza iwayo, ikaba iri kwitegura kuzahangana na KCC yo muri Uganda.

Amavubi amaze kwitabira irushanwa rya CHAN inshuro enye zose, zirimo eshatu ziheruka, gusa ntarabasha kwegukana iryo rushanwa.

Amavubi ari mu myiteguro ikomeye yo kwitegura CHAN izatangira mu kwezi gutaha

Abasore 31 ni bo bahamagawe na Mashami Vincent utoza amavubi

Iyi kipe yatangiye ikora imyitozo yoroheje

U Rwanda rumaze kwitabira CHAN inshuro enye ariko ntirurayitwara